हिब्रू 3:1 - राना थारु नयाँ नियम

¹ जहेमारे परमेश्वर स्वर्गमे बाके सँग सहभागी होनके बुलाएभए बिश्वासी ददाभइयओ, येशूमे मन लगाओ, जो हमरे ताहीं परमेश्वरको चुनो भओ चेला और प्रधान यहूदी पुजारी हए।

परमेस्वर को सच्चो वचन

¹ जहेमारे, हे पवित्र भईय्यौ और बहेनियौ, तुम जो स्वर्गिय बुलावा के भागीदार हौ, बौ प्रेरित और बड़े पुजारी ईसु के ऊपर ध्यान करौ।

हिब्रू 3:1 Cross References

यूहन्ना 17:3

कभी फिर नाश नाए होन बारो जीबन जहेहए, कि आदमी एकए इकल्लो सत्य परमेश्वरके चिन्हएं, और येशू ख्रीष्टके, जौनके तुम पठाए हओ।

यूहन्ना 20:21

येशू फिर बिनसे कही, “तुमके शान्ति मिलए! जैसी दौवा मोके संसारमे पठाइ हए, उइसीयए मए फिर तुमके पठाएरहो हओं।”

यूहन्ना 20:27

तओ येशू थोमाके अपनो हात देखाएके कही, “अपनी उँगरी हियाँ लाएके मेरे हातके देख और अपन हात लाएके मेरे कोखमे डार और शंखा करन बन्द कर बल्कि बिश्वास कर, कि मए जिन्दा हुइगओ हओं।”

प्रेरित 1:15

और बे दिनमे पत्रुस, बिश्वासी ददाभइयनके बीचमे पत्रुस ठाणो (जो लगभग: एक सओ बीस बिश्वासी इकट्ठा रहएं) और कही,

रोमियों 11:17

इस्राएलके आदमी एक अच्छे जैतूनके पेणके हँगा कता हएं और पुर्खा अब्राहाम, इसहाक और याकूब बे पेणके जर कता हएं। अगर कोइ हँगा काटेगए और तुम एक जंगली जैतून हुइके फिर असल जैतूनमे कलमी भए हओ कहेसे जंगली जैतूनको हँगा असल जैतूनको रुखामे कलमी हुइके बो रुखासे फाइदा पाओकता, तुम यहूदी आदमीनसे फाइदा पातहओ।

रोमियों 15:27

बे जा खुशीसे करीं, बे यरूशलेम सहरके रहान बारे आदमीनके कर्जीदार रहएं, काहेकी यहूदी आदमी गैर-यहूदीनके सँग परमेश्वरसे पाओभओ असल चीज बाँटिं। जा सही हए, कि गैर-यहूदी आदमी, यहूदी आदमीनके सँग जा संसारके अच्छी बात बाँटिं।

रोमियों 15:8

मए कहात हओं, कि जो प्रतिज्ञा पुर्खनके दओगओ रहए बे प्रतिज्ञाके सच करनके ताहीं ख्रीष्ट जा दिखानके ताहीं खतना करेभए आदमीनको सेवक बानो, जा दिखानके ताहीं कि परमेश्वर बिश्वासयोग्य हए।

रोमियों 9:24

हम, जौनके यहूदीनसे इकल्लो नाए, पर गैर-यहूदीनसे फिर मोके छानी हए कहेसे, का भओ तओ?

1 कोरिन्थी 1:2

मए जा चिट्ठी तुमके पठाएरहो हओं, जो कोरिन्थ सहरमे भए परमेश्वरके मण्डली हएं, अर्थात् हम जे बात लिखत हएं, जौनके परमेश्वर अपने आदमीनके रुपमे अलग करीहए। बा तुमके ख्रीष्ट येशूमे एकजुटमे बाँधी हए, और बा तुमके पबित्र आदमी होनके बुलाइ हए; उइसीयए, जैसे परमेश्वर औ सब आदमीनके छानी हए, जौन हमरे ठिहामे हमर प्रभु येशू ख्रीष्टको सेवा करत हए, काहेकी बा हमर सबको प्रभु हए।

1 कोरिन्थी 10:17

एक रोटी जा बातको संकेत हए, कि हम बहुत जनै ख्रीष्टमे एक शरीर हएं। काहेकी हम सब जनै एकए रोटीसे खात हएं।

1 कोरिन्थी 9:23

और मए सब कुछ ख्रीष्टके बारेमे अच्छो समाचारके परचार करनके ताहीं करत हओं, ताकी मोके अच्छो समाचारमे प्रतिज्ञा करेगए आशिषको हिस्सा दओजाए सकए।

2 कोरिन्थी 1:7

और तुमर ताहीं हमर आसरा मजबुत हए। काहेकी हम जानत हएं, कि जैसी तुम हमर दुखमे सहभागी हओ, अइसियए हमर सान्त्वनामे फिर तुम सहभागी होबैगे।

2 कोरिन्थी 9:13

जा देन बारो सेवा तुम सत्य हओ कहिके प्रमाणित करत हए और बहुत आदमी परमेश्वरको प्रसंसा करत हएं। काहेकी तुम ख्रीष्टको अच्छो समाचार सत्य हए कहिके बिश्वास करत हओ। और तुम गरीब बिश्वासीनके और औ बिश्वासीनके खुल्ला मनसे दइके जाके पालन करत हओ।

इफिसियों 3:6

और रहस्य जा हए, कि येशू ख्रीष्टके सँग हमर सम्बन्धके कारण अच्छो समाचारसे यहूदीनको समुह कता गैर-यहूदी फिर बहे आशिषन्के पामंगे, और बे एकए शरीरके सदस्य हएं और परमेश्वरको करोभओ बाचन्के हिस्सेदार हएं।

इफिसियों 4:1

जहेमारे मए जो जेलमे हओं, काहेकी मए प्रभु येशूको सेवा करत हओं। और तुमसे बिन्ती करत हओं, कि बो बोलावटके सँग जोमे परमेश्वर तुमके अपनो सन्तान होनके ताहीं बुलाइ हए, बहे लायकको अनुसार अपन जीबन जीइबओ।

इफिसियों 4:4

हम सबए बिश्वासी एकए शरीरके अंग कता हएं, और हम सबके एकए पबित्र आत्मा मिलो हए; जैसे तुमके एक आसरा दओगओ रहए, जब तुमके परमेश्वरके आदमी होनके ताहीं बुलाओ गओ।

फिलिप्पी 3:14

लक्ष्य घेन दौरत जात हओं, ताकी बो इनाम पामओं। जाको इनाम जा हए, कि परमेश्वर मोके स्वर्गमे बुलानडटो हए काहेकी येशू ख्रीष्ट मेरे ताहीं मरो।

कलस्सी 1:12

और दौवा परमेश्वरके धन्यबाद करत रहाबओ, और स्वर्गके राज्यमे बाको पबित्र आदमीनके मिलन बारो चीज तुमके फिर मिलन बारो लायक बनाइ हए।

कलस्सी 1:22

पर परमेश्वर अपनो लौंणा ख्रीष्टके आदमी बनाइ, और हमर पापको मोल तिरनके ताहीं क्रूसमे मरो, ताकी तुमके अपने अग्गु पबित्र, शुद्ध और निर्दोष बनाएके मेलमिलाप करए।

कलस्सी 3:12

जहेमारे जबकी परमेश्वर तुमके अपने पबित्र आदमी होनके ताहीं चुनी हए, और तुमसे प्रेम करत हए, तभीमारे तुम सब करुणा, भलाइ, नम्रता और धैर्य धारण करओ।

1 थेसलोनिकी 2:12

कि अइसो जीबन जिइयओ, जो परमेश्वरके खुसी करत हए, जो तुमके अपने राज्य और महिमामे बुलातहए।

1 थेसलोनिकी 5:27

मए तुमके प्रभुमे हुकुम देत हओं, कि जा चिट्ठी सब बिश्वासी ददाभइयनके सुनाए देओ।

2 थेसलोनिकी 1:11

जहेमारे लगातार हम, तुम सबके ताहीं प्राथना फिर करत हएं, ताकी हमर परमेश्वर तुमके बहे करनके लायक बनाबए जो करनके ताहीं बा तुमके बुलाइ हए। और परमेश्वर अपनो शक्तिके द्वारा सब काममे मदत करए ताकी तुमर सब भले इच्छा पुरा होएं और जो कुछ फिर तुम बिश्वाससे कर रहेहओ, बो पुरा होबए।

2 थेसलोनिकी 2:14

परमेश्वर बहे अच्छो समाचारके प्रयोग करी, जौनको हम तुमके बचानके बुलाओट देनके ताहीं तुमर बीचमे परचार करे, ताकी तुम हमरे प्रभु येशू ख्रीष्टको महिमामे सहभागी हुइ पाबओ।

1 तिमोथी 6:12

युद्धमे एक अच्छे सैनिक हानी, जो लडाइमे कभी हार नाए मानत हए, तोके फिर परमेश्वरमे भरोसा करनके और बाकी आज्ञाके पालन करन नाए छोडनके हए। और कभी फिर नाश नाए होन बारो जीबनके मजबुतसे पकणले, जौनके ताहीं तए बुलाओ गओ हए, और बहुत आदमीके अग्गु, तए स्पष्ट रुपसे कहो रहए, कि तए ख्रीष्टमे भरोसा करत हए।

1 तिमोथी 6:2

और जौननके मालिक बिश्वासी हएं, मालिकके बे बिश्वासी ददाभइया होनके कारण मालिकनके ठिक सम्मान देमएं; बल्कि उनके कमैयनके ताहीं और मेहेनतसे काम करन चाहो, काहेकी उनके फाइदा होनो अपनुवए प्यारो बिश्वासी दादा-भइयनके फाइदा होनो हए। जे बातनको उपदेश दएकर और बिनको पालन करनके ताहीं सबके उत्साहित कर।

2 तिमोथी 1:9

जौन हमर उद्धार करी, और हमके एक पबित्र जीबनके ताहीं बुलाइ, और बा हमके जाकेमारे नाए बुलाइ, कि हम अच्छे काम करेहएं; पर अपनो योजना और अनुग्रहके अनुसार बुलाइ हए, जो संसारको सृष्टिसे पहिलीए येशू ख्रीष्टके पठाएके परमेश्वर हमके बाको अनुग्रह दिखानको योजना बनाएलै रहए।

2 तिमोथी 2:7

जाके बारेमे सोँचओ, कि जा उदाहरण का सिखात हए, और प्रभु तुमके जे सब बातके सम्झनमे मदत करैगो।

हिब्रू 10:19

जहेमारे हे बिश्वासी ददाभइया और दिदिबहिनियओ, येशू हमर ताहीं अपनो जीबन खुनको बलिदान करके कारणसे हम स्वर्गको महापबित्र ठाउँमे सहाससे घुस पातहएं।

हिब्रू 10:21

और परमेश्वरके आदमीनमे राज्य करन बारो हमर सँग एक जनै महान पुजारी भओके कारणसे,

हिब्रू 10:23

हम जो आसरा करेहएं बोके मजबुतसे पाकणे रहमएं, काहेकी बाको करोभओ प्रतिज्ञा बा पुरा करैगो कहिके हम परमेश्वरमे बिश्वास करपामएं।

हिब्रू 13:22

हे मेरे बिश्वासी ददाभइयओ, मए तुमसे बिन्ती करत हओं, कि हौसलाको जा बचनके धिरजसे सुनओ, काहेकी मए तुमर ताहीं छोटकरीमे लिखो हओं।

हिब्रू 2:11

काहेकी पापसे शुद्ध बनान बारो और पापसे शुद्ध भए सबएनको दौवा अर्थात्, परमेश्वर एकए हए। जहेमारे येशू बिनसे, बिश्वासी भइया-बहिनीया कहानमे शर्मात नाए हए।

हिब्रू 2:17

जहेमारे हर बातमे येशूके दुस्रो आदमी कता बनन पणो। उइसीयए बा परमेश्वरको दयालु और बिश्वासयोग्य प्रधान यहूदी पुजारी बनो। ताकी बाको बलिदानसे आदमी अपनो पापसे क्षमा पाए जामएं।

हिब्रू 3:12

हे मेरे बिश्वासी ददाभइयओ, होश करओ, तुम मैसे कोइमे भओ दुष्ट और अबिश्वासी ह्रदय, तुमके जिन्दा परमेश्वरसे दुर नाए लैजाबए।

हिब्रू 3:14

अगर हमर सुरुमे रहो भओ बिश्वासमे हम जीबनको अन्त तक मजबुत रएहएं तओ हम ख्रीष्ट सँग साझा हकदार हुइहएं।

हिब्रू 6:20

हमरे ताहीं येशू हमसे अग्गु जा ठाउँमे जाएके बैठिगओ हए। मल्‍कीसेदेक पुजारी कता, बा सब दिनके ताहीं प्रधान यहूदी पुजारी भओ हए।

हिब्रू 7:26

येशू हमके चाहो भओ प्रधान यहूदी पुजारीको राजा हए। बा पबित्र, निर्दोष, और शुद्ध हए। और परमेश्वर बाके पापी आदमीनसे अलग करके सबसे जद्धा आदरसे स्वर्गमे बैठाइ।

हिब्रू 7:28

काहेकी मोशाको नियम कानुन कमजोर आदमीनके, प्रधान यहूदी पुजारी नियुक्त करत हए, पर मोशाको नियम कानुनसे पिच्छु आन बारो कसम, परमेश्वरको लौंणाके, प्रधान पुजारी नियुक्त करी रहए। और बा सदिमानके ताहीं सिद्ध प्रधान पुजारी भओ हए।

हिब्रू 9:11

जहेमारे ख्रीष्ट अब हियाँ भए सब असल चीजके उपर प्रधान यहूदी पुजारी हुइगओ हए। येशू स्वर्गमे भओ बहुत महान और सिद्ध तम्भुमे प्रबेश करीहए, जो आदमीनसे नाए बानो हए और जा संसारको फिर नाए हए।

हिब्रू 9:15

जहेमारे ख्रीष्ट परमेश्वरसे आदमीनके ताहीं नयाँ करारको मध्‍यस्‍थकर्ता हए। परमेश्वरके माध्यमसे बुलाएभए आदमीनके बाको प्रतिज्ञा करोभओ आशिष पाए सकत हएं, बो आशिष सदाके ताहीं रहबैगो। ख्रीष्ट मरोके कारण, बे आशिष पाइं, ताकी पुरानो करारमे रहान बारे पापसे छुटकारा हुइपामएं।

1 पतरस 2:9

पर तुम उइसे नाए हओ, काहेकी तुम परमेश्वरके चुनेभए आदमी हओ, तुम परमेश्वरके पुजारी हओ, जो राजा हए। तुम परमेश्वरको सेवा करन समर्पित भए आदमी और परमेश्वरके निजी प्रजा हओ। बा तुमके अंधियारोसे अपनो अदभुत ज्योतिमे लाइ हए, ताकी तुम परमेश्वरके अचम्मे कामको घोषणा करपाबओ।

1 पतरस 3:5

काहेकी अइसियए ब्यबहार बहुत अग्गुके बैयर आदमीनमे रहए, जौनको जीबन पबित्र रहए और जो परमेश्वरमे आसरा करत रहएं। बे बैयर सुन्दर भइं, काहेकी बे अपनो लोगाके अधिनमे बैठीं।

1 पतरस 5:1

मए हुवाँके मण्डलीके अगुवनके फिर कुछु कहान चाँहत हओं। काहेकी मए फिर तुमर कता एक अगुवा हओं। मए अपनए ख्रीष्टके मिलो भओ दुखके बहुत समय अग्गु देखो हओं। जब बा फिरसे लौटके आबैगो, मए फिर बाके महिमामे साझेदार होमंगो। अब मए तुमके आग्रह करत हओं,

1 पतरस 5:10

परमेश्वर, जो पुरा रुपमे अनुग्रहकारी हए, बा हमर येशू ख्रीष्ट सँगको सम्बन्धके कारण अपनो अनन्त महिमामे हमके साझेदार होनके बुलाइ हए। तुम कुछ देरतक दुख उठाएके पिच्छु, परमेश्वर तुमके असल बनाबैगो, ताकी तुममे कोइ गल्ती नाए होबए, और बा तुमर मनके मजबुत बनाबैगो और मजबुत होनके ताहीं बामे बिश्वास करन बारे बनाबैगो।

1 यूहन्ना 1:3

येशूके बारेमे जो कुछ हम देखे और परचारके सुनेहएं, बहे समाचार तुमके फिर देत हएं। जहेमारे कि तुम फिर हमर सँग संगती करओ, और जा संगती दौवाके सँग और बाको लौंणा येशू ख्रीष्टके सँग हए।

यहूदा 1:1

मए यहूदा जा चिट्ठी तुमके लिखनडटो हओं। मए येशू ख्रीष्टको दास और याकूबको भइया हओं। मए जा चिट्ठी परमेश्वरमे बिश्वास करनके बाके द्वारा बुलाएभए आदमीनके लिखनडटो हओं। तुमके परमेश्वर हमर दौवा प्रेम करत हए और येशू ख्रीष्टमे सुरक्षित रक्खी हए।

प्रकाश 17:14

बे थुमाके बिरुद्धमे युद्ध करंगे, पर थुमा उनके हराए देबैगो, काहेकी बा प्रभुनको प्रभु और राजनको फिर राजा हए। बा अपनो बुलाएभए, चुनेभए और विश्वासयोग्य आदमीनके सँग बिनके हराए देबैगो।”

प्रकाश 18:20

तुम जो स्वर्गमे बैठत हओ, बोके सँग भओ बातमे आनन्द मनाबओ! हे पबित्र आदमी, चुनेभए चेला और अगमबक्ता आनन्द मनाबओ। काहेकी परमेश्वर बेबिलोन सहरके बे बातनके ताहीं दोषी ठहिराइ हए, जो काम बा तुमर सँग करीहए।”