इफिसियों 1:7 - राना थारु नयाँ नियम

⁷ ख्रीष्ट मरत पेती हमर ताहीं खुन बहानके द्वारा परमेश्वर हमके छुटकारा करदइ हए, और परमेश्वर हमर पापनके क्षमा करदइ हए, और बाको अनुग्रह बहुत महान हए जो हमके मिलो हए।

परमेस्वर को सच्चो वचन

⁷ बामै हमकै बाके खून से छुटकारा, मतलब गल्तियन की माफी, बाके बौ अनुग्रह के धन के तराहनी मिलो है,

इफिसियों 1:7 Cross References

मत्ती 20:28

जैसी आदमीको लौंणा फिर सेवा पानके नाए, पर सेवा करन और बहुतनको पापनके मोल तिरके छुटानके ताहीं मोलके रुपमे अपन प्राण देन आओ।”

मत्ती 26:28

काहेकी जा नयाँ करारको बलिदानको खुन हए, जा बहुतके ताहीं पापनको क्षमाके ताहीं बहोहए।

मत्ती 6:12

हमर पाप क्षमा करियओ, जैसी हम अपन अपराधीन्के पाप क्षमा करेहएं, बे जौन हमर बिरुद्धमे गलत काम करी हएं।

मर्कूस 14:24

और बा बिनसे कही, “जा दाखको रसा मिर बलिदानको खुन हए। मिर खुन बहुत आदमीनके घेनसे बलिदानके रुपमे अख्नाओ जाबैगो। जा, बो नयाँ करारके साबित करैगो, जो परमेश्वर अपन आदमीनके ताहीं बहान डटो हए।

लूका 1:77

बो अपन आदमीनके पाप क्षमा द्वारा उद्धारको बारेमे ज्ञान देबैगो।

लूका 24:47

और यरूशलेम सहरसे लैके सब जाति-जातिके आदमीनके पाप करन छोडके परमेश्वर घेन घुमानके ताहीं और पापनको क्षमाको परचार येशूको नाउँमे होबैगो।

यूहन्ना 20:23

जौनके पाप तुम क्षमा करैगे, बिनको पाप क्षमा हुइजए हए, पर जौननको पाप तुम क्षमा नाए करैगे, बे पापको क्षमा नाए पामंगे।”

प्रेरित 10:43

सबए अगमबक्ता बाको गवाही दइं रहएं। बामे बिश्वास करन बारे बाको नाउँको शक्तिके कारण अपने पापसे क्षमा पामंगे।”

प्रेरित 2:38

पत्रुस बिनसे कही, “पाप करन छोडके परमेश्वर घेन घुमओ, और तुम पाप क्षमाके ताहीं येशू ख्रीष्टको नाउँमे तुम सबए बप्तिस्मा लेओ, तओ तुम पबित्र आत्माको बरदान पाबैगे।

प्रेरित 20:28

तुम अपन ताहीं और अपने पुरा समुहके ताहीं साबधान रहियओ। पबित्र आत्मा तुमके समुहको मण्डलीको अगुवा बनानके कारणसे तुम, ख्रीष्टको अप्नो खुनसे किन भओ परमेश्वरको मण्डलीको रेखदेख तुम करओ।

प्रेरित 3:19

जहेमारे पाप करन छोडके परमेश्वर घेन घुमओ, ताकी तुमर पाप क्षमा करे जाएं, तओ परमेश्वरके तरफसे आत्मिक समर्थको समय आबैगो।

रोमियों 2:4

का तुम परमेश्वरकी भलाइ, सहनशीलता और धिरजरुपी धनके तुच्छ मानत हओ? और तुम जा नाए सम्झत हओ, कि परमेश्वरकी भलाइ तुमके पाप करन छोडके परमेश्वर घेन घुमन सिखात हए?

रोमियों 3:24

पर परमेश्वर अपनो अनुग्रहसे हमके येशू ख्रीष्टके द्वारा हमर पापनको दण्डसे छुटकारा करत हए, हम कुछ करे बिना परमेश्वर हमके धार्मि घोषित करी हए।

रोमियों 3:25

परमेश्वर, ख्रीष्ट येशूके हमर ताहीं पाप क्षमाको बलिदान स्वरुप दइके ख्रीष्टको खुन हमर ताहीं बहाओ गओ हए कहिके बिश्वास करन बारे आदमीनको पाप मिटाए दइ हए। परमेश्वर पापको सजाय ख्रीष्टमे दइके अपनएके न्यायी दिखाइ। परमेश्वर ख्रीष्ट आनसे पहिले अपनो गुस्सा थामके आदमीके पापको सजाय नाए दइ।

रोमियों 9:23

काहेकी बा दिखान चाँहत रहए, कि बा कित्नो महान हए, जब बा आदमीनके उपर दया करी जौनके बा अपनी महिमामे भागीदार होनके ताहीं चुनी हए।

1 कोरिन्थी 1:30

पर परमेश्वर तुमके येशू ख्रीष्टमे एकजुट बनाइ हए, और ख्रीष्टद्वारा परमेश्वर हमके अपनो बुद्धि दइ हए। परमेश्वर हमके अपनो नजरमे धर्मी फिर ठहिरात हए। ख्रीष्टके द्वारा हम सब पबित्र बनाए गए हएं, और बा हमके पापसे छुटकारा करत हए।

2 कोरिन्थी 8:9

तुम हमर प्रभु येशू ख्रीष्टको अनुग्रह जानत हओ, कि बा धनी हुइके फिर तुमर ताहीं कंगाल बनिगओ ताकी बाके कंगाल हुइजानसे तुम धनी हुइजाबओ।

इफिसियों 1:14

काहेकी परमेश्वर हमके पबित्र आत्मा दइ हए। हम जा बातसे पक्का हुइपात हएं, कि परमेश्वर हमके उद्धारके ताहीं बो उत्तराधिकार देबैगो जो बा देनको प्रतिज्ञा करीहए और जा फिर कि बा हमके अपने आदमीनके रुपमे खरिदी हए ताकी बाको महिमाको स्तुति होबए।

इफिसियों 1:18

मए जा फिर प्राथना करत हओं, कि बा सच्चाईके सम्झनमे तुमर मदत करैगो ताकी तुम बाको महिमाको धनके जान पाबओ, कि बो आसरा जो तुमके दओगओ हए, जब परमेश्वर तुमके चुनी रहए। और ताकी तुम जानपाबओ, कि बे आशिष कित्ने महान और महिमामय हएं जौनको प्रतिज्ञा परमेश्वर अपने पबित्र आदमीसे करीहए।

इफिसियों 1:6

जा अनुग्रह, बयान करन नाए सिकन बारो हए जहेमारे हम बाकी महिमामय अनुग्रहके ताहीं परमेश्वरके स्तुति करत हएं जो बा हमके सेँतएमे दइ हए। काहेकी बाको लौंणाके सँग हमर सम्बन्ध हए।

इफिसियों 1:8

परमेश्वरके ठिन बहुत ज्ञान और समझ हए और बे चीज बा हमके प्रशस्त करके दइहए।

इफिसियों 2:4

पर परमेश्वर बहुत दयालु हए, बा अपनो महान प्रेमसे हमके प्रेम करी।

इफिसियों 2:7

परमेश्वर अइसो जाकेमारे करी ताकी आन बारो दिनन्मे बा संसारके आदमीनके दिखाए पाबए कि बाको अनुग्रह कित्नो महान हए। जो कुछ बा हमर ताहीं करीहए हमके जा अनुग्रह दिखाओगओ हए जो येशू ख्रीष्टके सँग एकतामे हएं।

इफिसियों 3:16

मए प्राथना करत हओं, कि बाकी महिमाकी धन अनुसार शक्तिसे तुमके जा दान देबए और बाको आत्मा तुमके शान्ति देबए ताकी तुम अपनी आत्मामे मजबुत होबओ।

इफिसियों 3:8

तहुँफिर मए परमेश्वरके सब पबित्र आदमीनके ताहीं सबसे कम महत्वपूर्ण हओं। परमेश्वर, अनुग्रहके द्वारा मोके जा मौका दइ, कि मए गैर-यहूदीनके अच्छो समाचार परचार करपामओं कि ख्रीष्ट असिम आशिर्बादको स्रोत हए।

फिलिप्पी 4:19

और परमेश्वर फिर अपनो बो धनके अनुसार जो महिमा सहित ख्रीष्ट येशूमे हए, बा तुमर हरेक घटिकमीके पुरा करैगो।

कलस्सी 1:14

बाको लौंणाको बलिदानसे परमेश्वर हमके छुटकारा दइ हए, अथवा हमर पाप क्षमा करीहए।

कलस्सी 1:27

बिनके सब गैर-यहूदीनके ताहीं धरो भओ बडो रहस्यकी बातके खोलदेनो परमेश्वरको योजना हए। रहस्य ख्रीष्ट अपनए हए, जो तुमर भितर हए। ख्रीष्टको महिमाके ताहीं हमर सिरफ एकए आसरा हए।

कलस्सी 2:13

और तुम फिर अपन अपराध और अपन पापी स्वभाबको शक्तिसे स्वतन्त्र नाए रहओ। तओ परमेश्वर तुमके ख्रीष्ट सँग जीइबाइ, और हमर सब अपराधके माफ करी।

कलस्सी 2:2

मए अइसो करो, काहेकी मए तुम सबके आत्मिक उत्सहा देन चाँहत हओं। और एक-दुस्रेके प्रती तुमर प्रेम तुमके एकजुटमे बाँधए। ताकी तुमरमे पुरा समझ होबए, जौनके ताहीं तुम परमेश्वरको रहस्य पता पाबओ, जो ख्रीष्ट अपनए हए।

1 तिमोथी 2:6

ख्रीष्ट पाप और मृत्युकी शक्तिसे मोल तिरके छुटानके ताहीं अपनएके बलिदान करदइ। बाको मृत्युके द्वारा परमेश्वर सही समयमे सबुत दइ, कि बा चाँहत हए, कि सब आदमी बचाए जामएं।

तीतुस 2:14

येशू ख्रीष्ट अपनएके हमरे फाइदाके ताहीं बलिदान करदइ। ताकी हम अधर्म कामसे छुटकारा पामएं, और हमके नैतिक रुपसे शुद्ध करपाबए। और ताकी हम बाके अपने खास आदमी बन जाएं, जो भले काम करनके ताहीं पुरी तरिकासे समर्पित होत हएं।

तीतुस 3:6

हमर मुक्तिदाता येशू ख्रीष्ट जो करी, बाके द्वारा परमेश्वर जा पबित्र-आत्माके, हमरे भितर रहानके ताहीं स्वतन्त्रसे और प्रसस्ततासे पठाइ।

हिब्रू 9:22

मोशाको नियम कानुन कहात हए कि लगभग सब चीजके खुन छिँटके शुद्ध बनान पणत हए, और खुन नाए चढाएके पाप क्षमा नाए होत हए, जो मृत्यु दिखात हए।

1 पतरस 2:24

जब ख्रीष्ट मरो, बा क्रूसमे हमर पापके ताहीं अपनो शरीरमे दण्ड भोगी। बा अइसो करी, ताकी हम पाप करन छोडके धार्मि हुइके जीबन जीइन सुरु कर पामएं। और बाको सहीभइ चोट द्वारा हम अच्छे भए हएं।

1 पतरस 3:18

मए अइसे कहात हओं काहेकी हमर पापके कारण ख्रीष्ट फिर दुख भोगी और मरो। बा एकए चोटी इकल्लो मरो और जाके दुस्रो चोटी करनके जरुरी नैयाँ। बा एक धर्मी आदमी रहए, जो पापी आदमीनके ताहीं मरो। ताकी बा हमके परमेश्वरके जौँणे लाए पाबए। बे बाको शरीरके मारीं, पर बाको आत्मा जिन्दा हए।

1 यूहन्ना 2:12

मेरे प्यारे बालकओ, मए तुमके जाकेमारे लिखत हओं, कि येशू ख्रीष्टके नाउँसे तुमर पाप क्षमा भओ हए।

1 यूहन्ना 2:2

और हमर पाप क्षमा करनके ताहीं, ख्रीष्ट एक बलिदान बनिगओ: और हमर ताहीं इकल्लो नाए बल्कि पुरो संसारके आदमीनको पापके ताहीं हए।

1 यूहन्ना 4:10

सच्चो प्रेम जा हए, कि हम परमेश्वरसे प्रेम नाए करे बल्कि परमेश्वर हमके प्रेम करीहए, और हमर पाप क्षमा करनके ताहीं अपन लौंणाके बलिदान होनके पठाइ।

प्रकाश 14:4

बिनको जीबन पबित्र हए। बे बेहीं लोग कता हएं जौन कभी फिर व्यभिचार नाए करी हएं, जौन कभी फिर आराधना नाए करी हएं, बे थुमाको इकल्लो आराधना करत हएं। जहाँ थुमा जातहए, हुवाँ बेहुँ जात हएं, बे आदमी बेहीं हएं जौननके पृथ्वीके सबए आदमीनके बीचसे छुटावगओ हए। आदमी अपनो फसलको पहिलो फल परमेश्वरके चढाओकता, बे परमेश्वर और थुमाके पहिलो भेँटीके रुपमे चढाएगए हएं।

प्रकाश 5:9

और बे अइसे करके थुमा अर्थात् येशू ख्रीष्टके बारेमे गान लागे, “तुम जा खलरीको चिट्ठीको मोहरके तोणन और जाके खोलनके लायक हओ। काहेकी तुमके मारडारोगओ रहए और अपनो मृत्युके खुनसे तुम संसारके हर कुल, भाषा, आदमी और जातिसे परमेश्वरके ताहीं आदमीनके छुटकारा दए।