1 कोरिन्थी 9:20 - राना थारु नयाँ नियम

²⁰ यानिकी, जब मए यहूदीनके सँग हओं, तओ मए उनके ख्रीष्टमे लानके ताहीं एक यहूदी कता रहात रहओं ताकी जद्धासे-जद्धा आदमीनके ख्रीष्टमे बिश्वास करनके ताहीं लाओं। जब मए बे आदमीनके सँग रहओं जो यहूदी नियम कानुनके मानत हएं, तओ मए फिर बो नियम कानुन कता रहात रहओं। हियाँतककी, मोके नियम कानुनके माननके जरुरत नाए हए। मए अइसे जहेमारे करो ताकी मए बे आदमीनके ख्रीष्टमे लाए पामओं, जो नियम कानुनके अधीनमे हएं।

परमेस्वर को सच्चो वचन

²⁰ मैं यहूदिन के ताहीं यहूदि बनो कि यहूदियन कै खींच लामौं, जो आदमी नियम के अधीन हैं उनके ताहीं मैं नियम के अधीन नाय होन मैं भी नियम के अधीन बनो, कि उनकै जो नियम के अधीन हैं, जीत लामौं।

1 कोरिन्थी 9:20 Cross References

प्रेरित 16:3

पावल, तिमोथीके सँगए-सँग लैजानके मन करी, और यहूदीनके कुछु बाधा नाए होबए कहिके बो तिमिथिको सहरमे यहूदी चलन अनुसार खतना करदइ। काहेकी बो क्षेत्रमे बैठन बारे सबए यहूदीनके, तिमोथीको दौवा ग्रीक देशमे बैठन बारो हए कहिके पता रहए।

प्रेरित 18:18

पावल बहुत दिनतक प्रभुमे बिश्वासी ददाभइयनके सँग कोरिन्थ सहरमे बैठो। तओ फिरके बो बिदा हुइके समुन्दरको डगर हुइके सिरिया परदेशमे चलो गओ। बोके सँग प्रिस्‍किला और अकिलास फिर रहएं। सिरिया परदेश जानसे पहिले किंक्रिया सहरमे पावल अपनो बार खौरबाएलै, काहेकी बो एक भाकल करी रहए।

रोमियों 11:14

ताकी कुछ रितिसे मए मरे अपने यहूदी जातिनसे जलन कर्बाएके उन मैसे कोइ एकको उद्धार करपाओं।

रोमियों 3:19

हम जानत हएं, कि नियम कानुन जो कुछ कहात हए, बो उन्हीनसे कहात हए जो नियम कानुनके अधिनमे हएं जहेमारे, ताकी आदमीनके बहाना बनानसे रोक पाबए और संसारके सब आदमी परमेश्वरके न्यायके अधिनमे होमएं।

गलातियों 2:19

मए सम्झत हओं, कि मोशाको नियम कानुनको पालन करनसे मोके धर्मी घोषित नाए करोजाए सकत हए। जहेमारे मए अइसो मानत हओं, कि मए पबित्र-शास्त्रके ताहीं मरीगओ, ताकी मए परमेश्वरके ताहीं जिन्दा रहेपामओं।

गलातियों 4:21

और तुम, जो मोशाको नियम कानुनको अधिन होन चाँहत हओ! मेरी बात सुनओ! मए तुमके बतामंगो, कि मोशाको नियम कानुनको किताबमे का लिखो हए।

गलातियों 4:5

ताकी बा हमके छुटकारा कर पाबए, जो मोशाको नियम कानुनके अधीनमे रहात रहएं। और बा हमके अपनुवए बच्चाके रुपमे बनाएलै।

गलातियों 5:18

और अगर तुम पबित्र आत्माको अगुवाईके अनुसार चलत हओ, तओ मोशाको नियम कानुनके अधीनमे मत् रहाओ।