Roma 5:6 - Sura Malelaha

⁶ Nodemi ahina Pue Ala irikita: i tempo au napakanoto Pue Ala, hangko damani ara rohonta mokaraohi dosanta, i tempo iti Kerisitu mate mopahuruke nauri bara manike mengkoru i Pue Ala.

Roma 5:6 Cross References

Roma 11:26

Nodomi rarana to Yahudi ina tehoremahe hangko i huku dosanda, bona tepabukei lolitana Pue Ala au teuki i lalu Sura Malelaha: “Hambela tempo, Datu Topehompo ina mesuwu hangko i Bulu Sion, hai mopakarao ope-ope dake hangko i pemuleana Yako bona malelaha tuwonda.

Roma 4:25

Yesu itimi au mokira wataNa rapapate mohuru salanta. Hai roo indo, Pue Ala mopatuwo hule Yesu bona mewalike manoto i peitaNa.

Roma 4:5

Agaiana pohintuwuta hai Pue Ala bara nodo tauna au mampedurei, lawi Naimbake Pue Ala manoto i peitaNa bara anti kamaroana babehianta agaiana anti pepoinalainta Iria au mopamanoto tauna madosa.

Roma 5:10

Hangkoia, tanganta mani mampoiwali Pue Ala, Ia motudumi mai AnaNa mate mohuru dosanta bona hintuwuke hai Ia. Mewali, ide-ide hintuwumoke hai Pue Ala, hai Yesu ara liliu i lalu katuwonta. Ido hai manotomi katekabahanta hangko i karumpuna Pue Ala i alo pebotusi.

Roma 5:7

Masusa talambi ara tauna au mau rapapate mopahuru rangana au manoto. Agaiana ane ara tauna au maroa laluna, babila ara mpuu hadua au mau mate mopahuru tauna iti.

Roma 5:8

Agaiana ahina Pue Ala bara nodo. Pue Ala bara mampegia pengkaroonta mobabehi dosa hangko Natudungiarike ahiNa. Lawi Kerisitu mate mopahuruke tangantato madosa.

Roma 8:32

Ia bara mampokabohi AnaNa au haduduaNa, bona mate mopahuruke, noumba kadanta ina Nawei paka-pakana?

Roma 8:34

Barapi ara au ina manguli hangangaa rahukuke. Lawi Yesu Kerisitu au matemi mohuru dosanta, hai au tuwo hulemi, hai au mohuda ntanda i koanana Pue Ala, Iami au mamperuruike.

Galatia 2:20

Hai ide-ide barapona tuwo moula peundeaku haduduangku, agaiana Kerisitumi au tuwo i lalu katuwongku. Mewali, tangangku mani tuwo i dunia ide, batengku mepoinalai i Anana Pue Ala au mampokakaiana hai au mokira wataNa rapapate bona mewalina manoto i peitana Pue Ala.

Galatia 4:4

Agaiana i tempo au Napakanotomi Pue Ala, Ia motudumi AnaNa mai i dunia, au napoanaka hadua anantowawine, hai Ia tuwo nodo to Yahudi au mengkoru i Aturana Musa.

Epesu 5:2

I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.

Kolose 2:13

Hangkoia hangko damanikau mepoinalai i Kerisitu, nodo manikau tauna au mate, lawi moliungikau hawana Pue Ala, hai barakau ratile. Agaiana nauri hangkoia nodokau tauna au mate, ide-ide anti pohintuwumi hai Kerisitu, Napatuwo hulemokau hihimbela hai Kerisitu, hai Naampungimi ope-ope dosami.

1 Tesalonika 5:9

Napileike Pue Ala bona barake rahuku, agaiana Napileike bona molambike katuwo maroa i lalu kaNahoremanta Amputa Yesu Kerisitu.

1 Timotiu 1:9

Hangangaa takatuinao apa tunggaiana Aturana Musa bona kana katapopobunduna. Aturana Musa barake rawei bona mokambaroa tauna au manoto babehianda. Agaiana tunggaiana bona mokonto: tauna au madosa tauna au molingkai atura iti, tauna au meewa, tauna au barahe mengkoru i Pue Ala, tauna au barahe moagama, tauna au mohaoki pea peundeana laluna, tauna au mopapate inana hai umana ba tauna ntanina,

Titu 2:12

Hai Napaturoke bona mokabahake babehianta au moula pea peundeana lalunta au kadake hai au bara hintoto hai peundeaNa. Napaturoke bona mewalike matopa, tapamaroa babehianta, hai mengkoruke Iria lianta mani tuwo i dunia ide.

Ibarani 8:3

Ope-ope Tadulako Mpenomba Mahile raangka bona mohuhu binata hai popenomba ntanina i Pue Ala. Nodo wori, Yesu Tadulako Mpenomba Mahilenta hangangaa mohuhu popenombaNa i Pue Ala, iami wataNa haduduaNa.

Ibarani 9:26

Lawi ane rapana nodo, kebosa belana Ia hangangaa mantodiha kapari duuna mate mepongka hangko i pewalina dunia hangkoia. Mewali, ide-ide hawe i kahopoa dunia au tepakanotomi, Ia mai i dunia moumpahi dosa manusia hambela pea, i pohuhuNa wataNa rapapate.

1 Peturu 1:20

Hangko damani dunia rapopewali, Yesumi au napakanoto Pue Ala mewali Topehompo. Ide-ide, i tempona hungkumi kahopoa dunia, Ia hawemi bona mohuru dosami.

2 Peturu 3:7

Langi hai tampo au ara hawe ide-ide nakadipura Pue Ala hai NgkoraNa duuna i alo pebotusi. I tempo iti, langi hai tampo ide ina Nagero Pue Ala hai api, hai ope-ope tauna au bara mengkoru Iria ina Nahuku.

Yudasi 1:15

Ia ina mai mampohuda-hudaa kara-karanda ope-ope tauna, hai Ia ina mohuku ope-ope tauna au mosapuaka kuasaNa anti babehianda au kadake. Ope-ope tauna au bara mengkoru Iria ina Nahukuhe, hai ope-ope lolitanda au mepapakoi ina Nahurungiahe.”

Yudasi 1:18

Au rauliangaamokau iami: i alo-alo au ina hawe hangko damani alo pebotusi, arahe tauna au ina mampopowadi-wadi pepoinalainta. Moula peahe peundeana lalunda au kadake, hai barahe mengkoru i Pue Ala.

Yudasi 1:4

Kuuli ope-ope ide lawi arahe guru agama au mesua i olomi au moantihe paturo au sala. Tauna iti mangulihe, kaihiranami halalunta hampepepoinalai, agaiana katouana barahe mengkoru i Pue Ala. Rauli wori, peisatoke mampeulai peundeana lalunta au kadake, lawi Pue Ala maahi laluNa. Paturo iti kadake, lawi mobalikihe paturo au tou kana i kabulana laluna Pue Ala, hai mosapuakahe Datunta hai Amputa, Yesu Kerisitu. Ia pea au hintoto tapengkorui. Guru au mepakanawohe iti, ina rahukuhe, lawi hangkoia ara mpuuhe nabi au mampololita kana i hukuanda au napakanotoahe Pue Ala.