Kolose 1:12 - Sura Malelaha

¹² Mekakaengkai bona matana lalumi hai mangulikau ngkaia kamaroana i Umanta, lawi Iami au mampopewalikau anaNa, alana hintotokau molambi kirami hihimbela hai ope-ope taunaNa i lalu poparentaNa au mabaa.

Kolose 1:12 Cross References

Matiu 25:34

Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

Yohane 14:6

Nauli Yesu, “Ikomi rara, Ikomi au mopahawe paturo au tou, hai Ikomi au moweikau katuwo au bara mokahopoa. Bara ara hadua au peisa hawe i UmaNgku, ane bara mepoinalai Iriko.

Yohane 20:17

Nauli Yesu i Maria, “IneeNa nukingki, lawi bara maniNa mengkaore lao i UmaNgku. Laomoko i halaluNgkuhe, nuuliangaahe ina laomona i UmaNgku hai Umamu wori, Pue AlaNgku hai Pue Ala au nipenombai.”

Yohane 4:23

Agaiana ina hawe tempona, hai katouana hawemi tempo iti, i lalu peninina Inao Malelaha ina moisa mpuuhe hema Pue Ala i katou-touana, hai ina menombahe Iria, moula rara mpenomba au naunde Pue Ala Umanta.

Suro 20:32

Ide-ide, halalu, kupekakaeakau i Pue Ala bona Nakadipurakau. Kuweikau lolita bona mampeulai liliukau Ngkorana Pue au mopakanotoake kabulana laluna Pue Ala irikita. Lawi Pue Ala pea au makuasa mopakaroho lalunta hai moweike pewati au Napasilolongaamohe tauna au Napatani mewali anaNa au malelaha.

Suro 26:18

Idemi tunggaiaKu motuduko lao irihira bona tebungkahi matanda, hai mopalehihe kamakaindi lao i kamabaana, hai tekabahahe hangko i kuasana Datu Tokadake hai mepoinalaihe i Pue Ala. Mewali, anti pepoinalainda Iriko, teampungimi dosanda, hai mewalimohe taunana Pue Ala.’ ”

Roma 11:17

To Yahudi peisahe rapandiri nodo hangkau kau saitun au rakadipura. Daana au hantanga rahapeki, hai i pohapekiana iti, Pue Ala mampopentaka daa kau saitun au bara tekadipura bona katuwona daa iti marudu hangko i uaka kau au rakadipura. Daa au Napopentaka iti, iami ikamu au barakau to Yahudi.

Roma 15:27

Iti rababehi mentumbu hangko i kamatanana lalunda. Hai hintoto mpuu ane tauna au barahe to Yahudi mokira-kiraahe to Yahudi anu-anu dunia, lawi hangko i to Yahudi iti, tauna au bara to Yahudi molambihe bakuna tanoananda.

Roma 8:17

Mewali, ane napoanamoke Pue Ala, taisa kaina molambita pewati au napasilolongami Pue Ala i anaNahe. Pewati iti tahumba hihimbela hai Kerisitu. Ane mantodihake himbela hai Kerisitu, i alo pebotusi ina molambi worike katuwo mahile hihimbela hai Ia.

Roma 9:23

Anti kasabaraNa, ido hai tongawa kamahilena tuwoNa i tauna au Napokaahi hai au Napatani amihe molambi kiranda i lalu peawana tuwoNa.

1 Korintu 8:6

Agaiana irikita, hadua pea Pue Ala, iami Umanta au mampopewali hinangkana au ara; Ia pea pongkana katuwonta. Hai hadua wori Amputa, Yesu Kerisitu, Iami au napopatoa Pue Ala mampopewali hinangkana au ara. Iami au moweike katuwo.

1 Korintu 9:23

Ope-ope iti kubabehi bona tetambai tauna au mepoinalai i Ngkora Marasa hai bona molambi worina katuwo maroa hihimbela hai ihira.

2 Korintu 11:14

Bara tapotingkara babehianda, lawi nodo wori babehiana Datu Tokadake au mobaliki watana mewali nodo hadua malaeka au mewangka.

2 Korintu 5:5

Pue Ala haduduaNa au mopasilolongaake hinangkana iti, hai Ia moweike Inao Malelaha mewali tanda kaina Naweinta wata au wou i suruga.

Epesu 1:11

Pue Ala mobabehi hinangkana moula peundeaNa hai pobotusiNa haduduaNa. Napileimoke hai Napakanotomi kaikitana au mewali taunaNa anti pohintuwuta hai Kerisitu.

Epesu 1:18

Kuperapi Pue Ala ina mopamanoto lalumi bona niisa apa au peisa taharunga hangko i kanakakionta Pue Ala mewali anaNa, hai ina Niisa wori noumba kamahilena sosora au Napasilolongaahe tauna au Napoana,

Epesu 2:18

I lalu pohintuwuta hai Kerisitu, peisake hungku i Pue Ala Umanta, maroa ikami to Yahudi, maroa ikamu au barakau to Yahudi. Peisake hungku i Pue Ala anti kuasana Inao Malelaha.

Epesu 3:6

Tunggaia iti iami: tauna au barahe to Yahudi molambi worihe pewatina Pue Ala hihimbela hai to Yahudi. Napopewalimohe Pue Ala hawata-wata hai to Yahudi bona molambi worihe apa au nadandi Pue Ala i ope-ope anaNa. Iti ralambi anti pohintuwunda hai Kerisitu Yesu, lawi mopoinalaihe Ngkora Marasa.

Epesu 4:6

Hadua pea Pue Ala au rapouma ope-ope tauna, au makuasa irikita ope-ope, au ara i lalunta hai au mampobago ope-ope melempo irikita.

Epesu 5:11

Mewali, inee nipeulai babehianda tauna au makaindi mani lalunda, lawi bara ara babehia maroa au mesupa hangko i lalu au makaindi. Agina nipatongawaa peamohe kakadakena babehianda iti.

Epesu 5:20

i hinangkana niuli ngkaia kamaroana i Pue Ala Umanta i lalu hangana Yesu Kerisitu Amputa.

Epesu 5:4

Inee worikau metatarahu ba mohowara lolita au bara mobundu au bara hintoto rahadi tauna. Aginari mangulike ngkaia kamaroana i Pue Ala.

Epesu 5:8

Hangkoia, makaindi mani lalumi, agaiana ide-ide mabaami lalumi anti pohintuwumi hai Pue. Mewali, hangangaa tuwokau i lalu kamabaa.

Kolose 2:2

Tunggaiaku bona maroho lalumi hai mombepokaahikau, alana mohintuwukau hadua hai hadua. Peundeaku bona tongawa i lalumi tunggaiana Pue Ala au tewuniangi hangkoia hai bara bata-bata lalumi; tunggaiaNa iti bona moisakau Kerisitu.

Kolose 3:15

Pue Ala mokakiokau hai Napopewalikau hawata-wata anti pohintuwumi hai Kerisitu. Mewali, nipakaroho liliu kahintuwumi au hangko i Kerisitu. Hai niuli liliu ngkaia kamaroana i Pue Ala.

Kolose 3:17

Apa pea au nibabehi ba au nipololita, hangangaa nibabehi hai nipololita hintoto hai poanti tauna au meula i Pue Yesu. Hai niuli ngkaia kamaroana i Pue Ala Umanta i lalu hangana Pue Yesu.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Ibarani 12:23

Hawemokau i poguluanda ananahe Pue Ala au towutu au teukimi hanganda i lalu suruga. Hawemokau i Pue Ala au mobotusi kara-karanda ope-ope tauna. Molindomokau tanoananda tauna au manoto babehianda hangkoia hai au rapamalelahamohe i peitana Pue Ala.

Ibarani 3:1

Halalu-halalu au mewali taunana Pue Ala au Nakakio mesua i suruga, nipailalu kahemana Yesu. Ia tuduana Pue Ala hai Tadulako Mpenomba Mahile au tapoinalai.

Ibarani 3:14

Lawi ikita ide mohintuwu hai Kerisitu, asala apa au tapoinalai hangko i nguru-nguruna takingki liliu hangko i lalunta au bara bata-bata duuna i kahopoana.

Yakobu 3:9

Dilanta peisa tapake motoia Pue Ala Umanta. Agaiana peisa wori tapake mopapakoi ranganta au napopewali Pue Ala moula lenggeNa haduduaNa.

1 Peturu 5:1

Ara wori pamperapiku irikamu au mewalikau penatua. Kuukiakau ide lawi iko wori hadua penatua, hai moita matamona kapari au morumpa Kerisitu hangkoia. Hai ane hawe Kerisitu i lalu peawana tuwoNa au ina rapatongawa i ope-ope tauna, ina molambi worina kirangku i lalu peawana tuwoNa iti.

1 Yohane 1:3

Apa au kiita hai kihadimi, iti au kipahaweakau bona ikamu wori mepoinalaikau hai peisakau mohintuwu hai ikami i lalu pohintuwuki hai Pue Ala Umanta hai Yesu Kerisitu AnaNa.

Pampetudungia 21:23

Wanua iti bara paraluu nasimbaki alo ba wula, lawi peawana Pue Ala mopamabaa wanua iti, hai Ana Dimba mewali nodo hulo wanua.

Pampetudungia 22:14

Morasihe tauna au mobahoi hampinda hawe maitu, lawi ihira au ina rapaliu maande wua Kau Ngkatuwo. Ihira au peisa moliu i babaka mesua i lalu wanua iti.

Pampetudungia 22:5

Barapi ara kaindi, hai ampu boea iti barapohe moparaluu hulo ba pesimbaki alo, lawi pewangkana Pue Ala au ina mosimbakihe. Hai ina moparentahe nodo datu hawe i hae-haena.