I Timoti 6:13 - Ibibiliya mu Shimakonde Imbodi Yaambi na dimbande dya Imbodi Yakala

¹³ Ninkukulamulila pamevo pa Nnungu jo áing'a shingumi vinu uti na pamevo pamwe Klistu Yesu áumidye ushuda wambone pamevo pamwe Ponji Pilatu,

I Timoti 6:13 Cross References

Mateu 27:11

Napanelo Yesu vandímwimidya pamevo pake nang'olo walijimbo nae kutwala kumudya, “Da wako ni umu wavayuda?” Yesu kushidoni, “Wako ni úvalanganga.”

Mateu 27:2

Nadoni vanavo vakamunga kumuukanavo kumwe Pilatu nang'olo walijimbo.

Nshuwau 14:6

Yesu kushidoni, “Nangu ni Indila, Umwiu na Shingumi. Hapali wakwida kumwe Atata pakapitila kwangu nangu.

Nshuwau 19:11

Yesu kushidoni, “Wako haunavenavo madalaka kwangu nangu leka madalaka alo akaalakadile kuwa. Nadoni aijá ángukamudidye kwako wako ni ávenavo madambi akumamodya.”

Nshuwau 5:21

Doni, mo mwavadyuwidya Tatamunu vakupela kuvapa shingumi, nimumo momo avalá vávalota Mwana, ankuvapa shingumi.

Nshuwau 5:26

Doni, mo mwavalelenavo Atata shingumi shimpandukánga jo mwene, anintadya Mwanamunu momo avenavo shingumi shimpandukánga jo mwene

Vitendo 17:25

na ata hanatumikiligwa kwamakono ashimunu kenga shipali shimwóva mwaa nae ni ávapa vanu uti shingumi, imumu na uti vinu.

II Vakolintu 9:13

Kwaindila yakulilodya ngala utumika au, vanavo vandamupa lishangelo Nnungu kwamwaa wakwigwilila kwenu kwalakéla mukulyaula kwenu nkati muntenga wambone umwe Klistu na kwamwaa wakujaulanga kwenu munshango kwavanavo na kwavanu uti.

Vagalata 3:26

Mwaa mwenu uti mmanavake Nnungu kwaindila yalikulupililo nkati mumwe Klistu Yesu

I Timoti 1:12

Ninkunnambwalela aijá ángupele dimongo, Klistu Yesu Umu wetu mwaa nae aningwona kuva wakukulupilika anguvika mushimadengo shake

I Timoti 1:15

Shitangodi ashi ni shakukulupilika na shindivaikila shiitikiligwe: doni, Klistu Yesu andida mushilambo ndavaambola vakutega, pakati pavakutega avo, nangu po, ni ngumamadidye.

I Timoti 2:5

Mwaa ankupagwa Nnungu jumo na kupagwa nkúdumangila jumo pakati pamwe Nnungu na vanu: munu jo Klistu Yesu

I Timoti 5:21

Ninkumya ushuda pamevo pamwe Nnungu, pamwe Klistu Yesu na pavanjelo vakutandalegwa doni, vinu avi vikila kuntima bila kupambula paukatandedya shoeshoe kwashitete.

I Timoti 6:12

Tenda ing'ondo yambone yalikulupililo. Kamulila shingumi shíkamalilika ashilá shavakushamalele sho shaulyawile pamevo pamashuda oe.

Maono 1:5

na vyakwalakela kumwe Yesu Klistu nshuda wakukulupilika, ntandi kudyuka pakati pavakupela na nkútawala wavaumu vamushilambo. Nae ankutunagwaledya na kwamyadi vyake anditwambola mumadambi etu,

Maono 21:6

Aníngwaulila kavili doni, “Vindiwikila popo. Nangu ni Alupa na Omega, Nantandi na Wamwisho. Ávenavo inyota ndamupa akumbile monyo papandukenge medi ashingumi.

Maono 22:1

Napanelo njelo aníngulodya lundi lwamedi ashingumi kenga shilolo shakulangala, áshaaloka pashiteng'u shake Nnungu na sha Ngandolo,

Maono 3:14

“Njelo waliganisha lya ku Laudisheya mwandikile, ‘Avi atangola Ame, nshuda wakukulupilika na waumwiu, ntipu wa avilá vyakandyenge Nnungu: