II Timoti 2:10 - Ibibiliya mu Shimakonde Imbodi Yaambi na dimbande dya Imbodi Yakala

¹⁰ Napavedoni uti ninkulipililila kwamwaa wavakutandalegwa pakulota navanavo vapate kwambolegwa kupagwíte nkati mumwe Klistu Yesu pamo na lishangelo líkamalilika.

II Timoti 2:10 Cross References

Mateu 24:22

Leka Umu akapungwile maduva alo hanapagwe ata munu jumo e akambwalégwe, napane kwamwaa wavakutandalegwa, maduva lo, andipungula.

Mateu 24:24

Mwaa vandaumilila vaklistu vakushang'apa na vakulava vakushang'apa. Vovo vandatenda vimanyikilo vikumene na vyakutikinikanga kwambangidya vavaashadyange ikaululika ata mpaka vakutandalegwa.

Mateu 24:31

Muwakati wowo nae andavatumidya vanjelo vake vaditalumbeta dyakuma namene vauke vakavatwalange vakutandalegwa vake mudisemu nsheshe dyamushilambo kutunduvangila nkono unji wakuwa ndamalilila nkono unji.

Lukashi 18:7

Kushi Nnungu vakutandalegwa vake vannamadikíla shilo na mui vo, havapa ishaliya? Mwona kenga andatimatimanga kwavanavo?

Lukashi 22:57

Patulu doni, “Gwee! Nangu munu ajo hanimmanyite.”

Nshuwau 11:52

na ata i gweka venentete avo, namomo kwamwaa wavana va Nnungu vamwadilikanénge pakulota vanavo, nae avaunganiange vave shipinga shimo.

Nshuwau 17:24

“Atata, vaungupele vo, ninkulota vapagwe po panguvele nangu vone lishangelo; lishangelo lyo lyaungupele mwaa uningunagwaledya shilambo shikanava kukandyangigwa.

Nshuwau 17:9

“Nangu ninkuvajugwila vanavo; hangunavajugwila shinu vashilambo, ila avalá vaungupele mwaa vàko wako umwene.

Valoma 2:7

Kwa avalá valóta kunanopa nkati mukutandedya wambone, valambéla lishangelo, ishima na ungapela, andavapa shingumi shíkamalilika

Valoma 9:23

pakulota uumbala walishangelo lyake umanyike kwavyombo avilá vyamushididi shake vyapanganienge kaladavo kwalishangelo,

I Vakolintu 1:21

Doni, kutunduvangila mo mulimanyilo lyake Nnungu shilambo hashuukile nammanya Nnungu kwaindila yalimanyilo, inínnagwela Nnungu kwaindila yaujinga aulá watuvalanganga wetu kuvaambola avalá vakulupidíle.

I Vakolintu 9:22

Kwavakudabadabanga nangu nguukilé ndava nkúdabadabanga kwambangidya ndivapate vakudabadabanga. Nguukilé ndava uti kwavanu uti kwambangidya kwadindila dyoedyoe ndivaambole vanji.

II Vakolintu 1:6

Ikava kenga tunkupata mauvilo ni kwamwaa wakupambadyangigwa na kwambolegwa kwenu mwenu; ikava kenga tunkupambadyangigwa ni kwamwaa wakupambadyangigwa kwenu mwenu akulá kwamupata mulipililila mauvilo lolo átuuvauvanga wetu.

II Vakolintu 12:15

Nangu kwantima wambone ndajaanga na ndalijaangila uti kwamwaa waungumi wenu. Ikava kenga nangu ninkunnagwaledya namene mwenu, ndanagwaleka padyoko?

II Vakolintu 4:15

Mwaa uti avi ni kwapaida yenu mmene kwambangidya umonyo uvawikíla kula wakati vanu voe utadye lilambwalalelo lyanjadyeke kwalishangelo lyake Nnungu.

II Vakolintu 4:17

Mwaa mauvilo awakati au, maangolo na akupita, anavo ankwidanavo kwetu wetu lishangelo líkamalilika liidópa namene kupunda uti

Vaepeshu 3:13

Nadoni ninkunjugwa hamunadabadabange kwamwaa wamauvilo ánguvenavo yenu mwenu mwaa lolo lo, alishangelo lyenu.

Vakoloshu 1:24

Napanelo ninkupuwangila mumauvilo angu kwamwaa wenu mwenu mwaa nkati mumili mwangu, ninkuumbadya mauvilo aovíte amwe Klistu kwamili wake lìvele lyo liganisha.

Vakoloshu 1:27

Kwavanavo, Nnungu andyamuwa avatadye vamanye ukumene shani wamali alishangelo lyashipii ashi pakati pavamidi; shipii asho ni Klistu nkati mwenu, lilindilililo lyalishangelo.

I Vateshalonika 5:9

Mwaa Nnungu hatupangidile kwashitundi kanji pakulota tupate kwambolegwa kwaindila imwe Umu wetu Yesu Klistu

II Vateshalonika 2:14

Kwakwambolegwa aku nae aninshema mwenu kwaindila yantenga wambone wetu kwambangidya mupate lishangelo limwe Umu wetu Yesu Klistu.

II Timoti 1:1

Paulu, myombe umwe Klistu Yesu kwalilotelo lyake Nnungu kwakwodanavo kulivikila kwashingumi shipagwíte nkati mumwe Klistu Yesu,

II Timoti 2:1

Napavedoni wako mwanangu nanopa muumonyo upagwíte nkati mumwe Klistu Yesu.

II Timoti 2:3

Liinjidyange mumauvilo kenga mwíng'ondo wambone umwe Klistu Yesu.

Titu 1:1

Paulu, ntumwa umwe Nnungu na myombe umwe Yesu Klistu kwaupande walikulupililo lyavakutandalegwa na kwakumanya umwiu kulingananavo kunjopa Nnungu,

I Patulu 2:10

Mwenu kala po, ata padyoko vela hamuvéle mmenentete kanji ambi apa mmenentete vake Nnungu; kala po hamushanaangiligwa shididi kanji napane mundyanangiligwa.

I Patulu 5:10

Nnungu waumonyo uti ánshamile mwenu kwalishangelo lyake líkamalilika nkati mumwe Klistu Yesu, jojo jo ling'oto lyakuvauvanga mwenu padyoko, anandyuwangidya, andamwakikisha, andamupa dimongo na anammika pashanya shitunduvangilo.