2 Kɔlɛ̂ŋtɛ 8:8 - Kɑɑ Fí

⁸ Ŋ kɑ́ pɔ́ ńcú pɑ́Ꞌɑ ńdɔk ńcú pɔ yɛcɔ́ nu yi pʉʉ ɡʉ ŋ́ɡɛ pɔ́. Ɛ sẅíi wʉ́ʉ pɔ pɑ́Ꞌ mɛcɔ́ mɛcúꞋlɛ-pʉɔ-Kɛlístɔ sɛ́ zɑŋɛ mbʉʉ ŋ́ɡɛ pɔ́Ꞌɔ, ńdɔk ŋ́ɡɑ́ wʉ́ʉ nɛ́ shʉ́ nɛɡɛ pɛ́ jí ŋɡɔ pʉʉ ɡẅɛɛ ŋkɔŋɛ tɛ ɛ́sẅíi nu.

2 Kɔlɛ̂ŋtɛ 8:8 Cross References

Pʉɔ-Lɔ́mɑ 12:9

Pʉʉ kɔŋ pʉɔmɛsɔŋ pɔ nɛ́ tʉ́m yʉ́ʉ tsʉʉ. Pʉʉ kʉ̈ɔ́ nu kɛpɔŋ tɛ ńtɔ́ŋ mɛkɑ́ɑ, ŋ́kúꞋlɛ pɔ nu sʉ́Ꞌnɛ tɛ ɛ́ tɛn.

1 Kɔlɛ̂ŋtɛ 7:12

Ɛ́ ɡʉ nǔu pɛcɔ́ pʉɔ, n cú ŋɡɔ: «Ŋu lɑɑ ḿbɔ́ ŋu-Kɛlístɔ, ŋ́ɡẅɛɛ mɑŋɡɛ́ ẅí ɑ kɑ pɔ́ ŋu-Kɛlístɔ pɔ́, ẅîwɑ́ mɑŋɡɛ́ pɛ́m ŋɡɔ pɔ́pnɛ́ ńnɑ́ŋ kɔɔ ŋɡɑŋ zuŋ wɛ́.» Mɔ cúnɛ yɔ nu, Tsɑpʉɔ kɑ́nɛ cú pɔ́.

1 Kɔlɛ̂ŋtɛ 7:25

Ɛ́ ɡʉ nǔu pʉɔ pi pɔ́p ŋkɑɑ zɔ́Ꞌ, mbɔ Tsɑpʉɔ kɑ kɛ́ ńcú nu yi mɔ ńcú mbɔ̌ pɔ́p. Lɑ́, mɔ ńcú pɑ́Ꞌ mɔ sɛ́ ŋ́kwɑŋɛ yɑ́ɑ nǔu nu yɔ́p, ńdɔk pɑ́Ꞌ mɔ ŋu ẅí Tsɑpʉɔ kɑ tsɑ́ɑnɛ mɛjʉ́ŋ mɑ́ɑ, ńdɔk wɑ́ɑ ŋ́ɡɛ ŋu ẅí m bɔ́ ńcú nu pɛ́ zúꞋ.

1 Kɔlɛ̂ŋtɛ 7:6

Ɛ́ kɑ́ pɔ́ pɑ́Ꞌɑ ḿbɔ́ pɔ nɛpʉ́ʉ ni n zɑ́pnɛ pɔ́, ŋ ɡʉ ńcú pɔ yúu mi pʉʉ lɑɑ ŋ́ɡɛ ɛ́ pɔŋ.

2 Kɔlɛ̂ŋtɛ 6:6

Pɛk sɛ́ ńdɔk wɛk mɑt ńnyɛt ŋɡɔ pɛk pɑfɑꞋ fɑꞋ-Sɛ́. Pɛk ɡẅɛɛ tʉ́m Lɛ́ɛnɛ́nɛ, mbɑ jínu yi ɛ́ fúnɛ mbɔ̌ Sɛ́, ŋ́ɡɛ kɔkmbʉʉ. Pɛk ɡẅɛɛ pɔ pɔŋtʉ́m nzʉʉ pʉɔmɛsɔŋ, ńzẅíꞋlɛ yɛ́k kʉ̈ɔ́ lɑ́ pɔ mbɔ̌ Zẅikŋɛ Lɛ́ɛnɛ́nɛ, ŋ́ɡẅɛɛ ŋkɔŋɛ yi ɛ́ kɑ́ pɔ́ ŋkɔŋ-mík pɔ́,

2 Kɔlɛ̂ŋtɛ 8:10

Ŋ ɡʉ ŋkɔ̂ɔnɛ nɛsẅíi wʉ́ʉ nɛ́ yúu mi mɔ sɛ́ ŋ́kwɑŋɛ nǔu yɔ nu-ŋkɑ́p. Ɛ́ kɑ pɔ́ ŋɡuꞋlɑɑ m biitɛ ŋ́kwɑŋɛ ŋɡɔ mbɔ pɛ́ ɡɑ́ yúu ńdɔk ńcẅɛ́lɛ pʉɔ-Kɛlístɔ. Pʉʉ pɛn ḿbiitɛ nɛzɛ. Yúu mi pʉʉ lɑɑ ŋ́ɡɛ ŋkɔ̂ɔnɛ ɛ́ pɔŋ,

2 Kɔlɛ̂ŋtɛ 8:24

Pɔ́p pɛ́pɔ́p lɑɑ ńtɔ́, pʉʉ ɡɛ tɛ pɔ́p jí ŋɡɔ pʉʉ sɛ́ ŋ́kɔŋ wɔ́p tɛ ɛ́sẅíi nu. MɛcúꞋlɛ-pʉɔ-Kɛlístɔ ɡɔ́ɔ ŋ́kɛ́ ńjí ŋɡɔ pɛk lɔk nu yʉ́ʉ ŋ́kɑꞋtɛ mbi pɔ́p pɑꞋnɛ tɛ ɛ́sẅíi nu.

2 Kɔlɛ̂ŋtɛ 9:2

MbíꞋŋɡɔ mɔ sɛ́ ńjí ŋɡɔ pʉʉ ɡẅɛɛ pɔŋtʉ́m nǔu yɔ nu, lɑ́ mbɔ ŋ kɑ lɔk nu yʉ́ʉ ŋ́kɑꞋmɛ mbi pʉɔ-Kɛlístɔ pi pɔ́p Mɑsɛndwɑn. Ŋ kɑ sẅíi wɔ́p ŋɡɔ pʉɔ-Kɛlístɔ pi pɔ́p nǔu pɑk-ŋɡɔŋ-Akɑ̂y, tʉ́ʉ nɛɡɑ́ yúu tɛ ɛ́fú ŋɡuꞋlɑɑ. Wʉʉ nɛzɑŋɛ mbʉʉ ŋ́ɡɑ́ yúu kɑ ɡɛ nɛzɑ́ɑ pʉɔ nǔu pɔ́p ɡẅɛɛ pɔŋtʉ́m nɛɡɑ́ yɔ́p yúu.

2 Kɔlɛ̂ŋtɛ 9:7

Pɔ́Ꞌɔ lɑ́, ɛ́ pɔŋ ŋɡɔ mbɑ wɔ̌ lɑ́ ɡɑ́ yúu pɔ pɑ́Ꞌ ɑ ŋ́kwɑŋɛnɛ tsɛt tʉ́m yɛ́, ŋ́ɡɑ́ kɛ́ ńzɑ́ŋ lɔ́ŋ, kɛ́ pɔ́ yi pɛ́ fyɛ́t wɛ́ fyɛ́tnɛ, mbíꞋŋɡɔ Sɛ́ kɔŋ ŋu ẅí ɑ lɔk tsɑ́ɑtɛ ŋ́ɡɑ́ yúu.

Ɛ́fɛ̂zɛ 4:15

Tɛ ńtsʉ́Ꞌ pɔ́Ꞌɔ, pɛkŋɛ kɔŋɛ mɛmbʉʉ mɛkŋɛ, ŋu sẅíi nu nɛ́nẅín mbɔ̌ mɔ́ɔmɑ́ wɛ, ŋ́ɡúꞋ nǔu mɛshʉ́ tsʉʉ, Kɛlístɔ ɡɛ pɛkŋɛ pɔ́ ńdɔk ndɑ̌ɑ ndɑɑ ŋ́kẅiꞋ ḿbɔ́ pɑ́Ꞌ jʉ́ ẅi ɑ tú nǔu mbɑp-mbʉʉ.

Ɛ́fɛ̂zɛ 6:24

Sɛ́ pɔ́ mbɔ̌ ŋu tsʉʉ ẅí ɑ kɔŋnɛ Tsɑpʉɔ wɛkŋɛ Yɛ́su Kɛlístɔ nɛ́ ntɛ́ ŋkɔŋɛ yi ɛ́ kɑ́ pɔ́ ŋ́ɡʉ ńdɑ́Ꞌ ḿmɛ pɔ́.

Ɛ́bɛlʉʉ 10:24

Kɔɔ ŋu wɛkŋɛ likŋɛ nɛlíŋɛ mɔ́ɔmɑ́ wɛ, ḿbɛn ńdíŋɛ wɛ́, ńjí ŋɡɔ pɛkŋɛ ɡʉ ńdɔk pɔ́Ꞌɔ, ńníꞋ mɛtʉʉ mɛkŋɛ nǔu nɛɡẅɛɛ ŋkɔŋɛ mbɑ nǔu nɛfɑꞋ mɛfɑꞋ sʉ́Ꞌnɛ.

1 Pyɛ̂ 1:22

Pʉʉ kɑ lɔk nɛpɛ́m nu yi ɛ́ nɛ́nẅín, ɛ́suk tʉ́m yʉ́ʉ. Nɛpɔ́ yi pʉʉ ɡʉ ŋ́kɔŋ pɔ́ɔpɛ́mɑ́ pʉ́ʉ pi pʉʉ pɛpɔ́p zɑ́pnɛ tʉ́m nǔu Sɛ́, ŋ́kɔŋ wɔ́p tɛ ɛ́sẅíi nu. Pɔ́Ꞌɔ lɑ́, pʉʉ ɡẅɛɛ kwɑꞋ ŋkɔŋɛ tsɛtsɛt pʉʉ, ŋu kɔŋ mɔ́ɔmɑ́ wɛ nɛ́ tʉ́m yɛ́ tsʉʉ.