Efesios 1:11 - Manityanati Tupax

¹¹ Aɨbuti Cristo, uiti Tupax samamekana oñɨ aukiapae tɨkañe nauki basuriu aruki axɨmanu toxiobo uiti oemo, sane takana nixhankaxti Tupax aisamunenti, tyopiki nanaiña isamunenti auki noñemaxti.

Manitanati Tuparrü

¹¹ Uiti Cristo pertenecebo oñü caüma ümoti Tuparrü. Itopiqui ümo itacümanauncunuti oñü auqui ñemonco. Arrti Tuparrü tiene que aisamunenti ñana isiuqui manu ñapensacarrti.

Efesios 1:11 Cross References

Hechos 13:48

Naukiche onkoimia axɨna sane axɨmanuma chɨtɨpɨ judíos pukɨnuñama nuxia uixh, auki namatɨ ta uxia axɨna nuraxti Yɨriabux. Namanaiña ikokotama axɨmanuma tɨsamamekanama nauki aye uimia axɨna champɨ nityakɨru nisɨborikixhimia.

Hechos 2:23

Axti maniki ñoñɨnx, sane takana ñakionkoxti Tupax, toxioti ɨmo axɨbama chuxiampɨ uimia ɨmoti, aboi apityabairoti, apakɨpuka ɨmoma axɨbama chuxiampɨ nisɨborikixhimia aityakubaxiromati kɨtɨpɨ kurusɨx.

Hechos 20:27

ityopiki xhanunekaka aume nanaiña axɨna nixhantɨmoti Tupax, champɨ axɨna chisurapoipɨ.

Hechos 20:32

“Kaɨma masarukityaiki ityoximiakaño ɨmoti Tupax, ɨmointyo axɨba omixha nuraxti. Ui noñemaxti sunaunti Espíritu Santo aukɨtɨpɨ nauki aityoximiatityo aume axɨmanu aukiapae xhanxti aityoximiati ɨmo axɨbama aɨtoxti.

Hechos 26:18

Ikɨpukɨ axɨpekuma nauki aiyaɨbu nisɨtoxɨma nauki tapɨ amenkomainki au tomikianene, tari amenkoma au nanentax. Nauki ataesɨbuma pɨnanaki nɨriakaxti chobores, nauki aɨromatɨ isiuti Tupax. Sane aikokoromañɨ nauki asuriuma maximiakatax ityopiki axɨna nomɨnantɨ uimia nauki asuriumaintyo ñana nikuaxɨma kauta nakaxti Tupax.’

Hechos 4:28

Tapɨ axɨma amonkomantai isamutema axɨna aukiapae maɨbo, axianka nauki uxiane.

Romanos 11:34

“¿Ñakuti naki isuputakaiti ñakionkoxti Yɨriabux? ¿Ñakuti naki uiche aiñununekanati?

Romanos 8:17

Tyopiki aɨtoxti Tupax oñɨ, ane ñana toxiobo oemo nenaxixhti axɨmanu ɨriotɨ tɨkañe uiti oemo tyone axɨna basutiu chepeti Cristo, tyopiki utakisɨrɨka chepeti nauki ayetyo osoi chepeti au nɨriakaxti.

Romanos 8:28

Tusiu oemo axti Tupax toxio uiti nanaiña nixhantɨmoma axɨbama kuasɨrɨti ɨmoma, axɨbama ane batasukux ɨmoma uiti nauki aisamunema axɨna nixhantɨmoti.

Romanos 8:29

Axɨbama tɨsamamekanama uiti Tupax aukiapae tɨkañe, nauki aisamunema takanati Aɨtoxti, nauki axti Aɨtoxti tyonenti naki kusɨrɨboti aɨbuma namanaiña axɨbama yarukityoxti.

Romanos 8:30

Axɨbama samamekanama uiti Tupax aukiapae tɨkañe, batasurutityo ɨmoma. Axɨmanuma batasuruti ɨmoma, uiti uxia nisɨborikixhimia, toxio uiti ɨmoma aɨromatɨ tyupekuti au napes.

Romanos 9:11

Chabomainkipɨ iku kɨx, chisamutempɨmaintyo axɨba chomixhampɨ takanaintyo axɨba omixhia

Gálatas 3:18

Sane, axtɨ axɨmanu ɨriotɨ atoxi oemo uiti Tupax basutiu isiuki axɨmanu bakɨpukux, chityonenkipɨ axɨna ɨriotɨ. Axɨna ñemanauntu ta axti Tupax axɨmanu ɨriotɨ tɨkañe uiti ɨmoti Abraham champɨ ityoboche.

Efesios 1:14

Axti Espíritu Santo tyonenti kusɨrɨboti uiche atusi ta ñemanauntu toxio ñana axɨmanu ɨriotɨ uiti Tupax, axtɨ tɨtane maximiakatax ɨmo namanaiña oemo axɨbama aɨtoxti, nauki namanaiña machampienka tyopki yarusɨrɨx nɨriakaxti.

Efesios 1:18

Xhankikiaityo pɨnanakiti Tupax nauki aye nuxia aboi kausane niyarusɨrɨkɨx axɨmanu maximiakatax ɨmoma axɨbama ikokoromati Tupax.

Efesios 1:5

Samamekana oñɨ tɨkañe nauki aɨtoxti oñɨ, auki nakaxti Jesucristo, naki esache bakɨpukux oemo, takana noñemaxti ui nipukɨruxti.

Efesios 1:8

Tyopiki nikonkoxti Cristo kɨtɨpɨ kurusɨx, axti Tupax xhimiakana uiti oemo axɨba nomɨnantɨ osoi añekanaintyo oñɨ uiti ñopɨnanaki nanaiña axɨba chomixhampɨ uisamukio. Axɨna sane isamutenti ui taruku ñakumananaunkuxti. Uityo taruku ñapanaunkuxti,

Efesios 1:9

tusiankana uiti Tupax usukarɨ axɨmanio nixhantɨmoti aisamunenti axɨba amonkio umanekana uiti axɨna kaɨma xhanxti aisamunenti aɨbuti Cristo,

Efesios 3:11

Tyone axɨna tɨkañe nixhantɨmoti Tupax aisamunenti aukiapae, tyone axɨna kaɨma isamutenti aɨbuti Jesucristo naki Yɨriabux oemo.

Colosenses 1:12

apachampienkaka ñana ɨmoti Tupax naki Uyaɨ, tyopiki uiti aiñununekanati oñɨ nauki basuriu, au nanentax axɨmanu toxiobo uiti ɨmoma axɨbama ikokoromati.

Colosenses 3:24

Tyopiki tɨtusiu aume toxio ñana uiti Tupax aume ityobo axɨmanu ɨriotɨ tɨkañe uiti ɨmoma axɨbama aɨtoxti. Apakionsaño ta apaserebikia ɨmoti Cristo naki ñemanaunkuxatoe Yɨriabuxti aume.

Tito 2:14

Axti ityoximianatiyɨ ɨmo nikonkoxti utaku, nauki aikiaɨburuti oñɨ omeanaki nomɨnantɨ naukityo aisɨbuti nanaiña okɨtɨpɨki, sane kaɨma aɨtoxti oñɨ, nauki osoimatoe uisamunio axɨba omixhia.

Tito 3:7

chɨkoñopɨtɨ oemo, tapɨti yasuriuruti oñɨ uiti atusi oemo ta ñemanauntu ñana toxio oemo axɨmanu osɨborikibo champɨ nityakɨrux ensɨmunu tɨkañe.

Hebreos 6:17

Saneityo axti Tupax, naukiche xhanxti aityusiankati ta ñemanauntu toxio ñana uiti axɨmanu ɨriotɨ uiti ɨmoma axɨmanuma ɨmoche anityati, ta isamutenti ñana sane takana axɨmanu nuraxti.

Santiago 2:5

Masarukityaiki, amonsapesio axɨna sane: Axti Tupax samamekanama uiti axɨbama taruku nityakisɨrɨkɨxɨma ikuki axɨna kɨx, nauki nenaxixhimia tyone ñana axɨna ñakokonaunkuxɨma nauki asuriuma enaxiboma nanentakax au napes axɨna ɨriotɨ tɨkañe uiti ɨmoma axɨbama manaunuma ɨmoti.

1 Pedro 1:4

uitityo toxio ñana aume nanaiña axɨmanu ane aɨburu uiti au napes, axɨmanu champɨ isane uiche amameso ñana.

1 Pedro 3:9

Axtɨ isamutema aume axɨna chuxiampɨ, tapɨ sane aboi ɨmoma, axtɨ uratokioma aume, tapɨ apiñumuta nuratokikixhimia. Apanki tyone pɨnanakiti Tupax apukɨruti tyakuma, tyopiki uiti aityasuruti año nauki apasuriu nipukɨruxti.