John 8:26 - Annaahk John Manistsitsinikatahpi Jesus Manistsipaitapiihpiai 1979

²⁶ Ki iika̱kaoi nanista̱akohtsiʼpoyihpi kiisto̱aawa; ika̱kawoyi ko̱mohtakokakihtsimatohpoaawaistsi; kii, ki anna̱a̱hka nito̱ʼtsskookahka iiko̱kamoʼtaʼpssiwa, ki a̱nnohka nika̱a̱kanistawa mata̱piiwa nita̱a̱ni̱yihpistsi annaahka nito̱ʼtsskookahka.”

John 8:26 Cross References

John 15:15

Nima̱takattaniihpa kiisto̱aawa kika̱kanikapiimatohpoaawa. Takaa oma̱a a̱yanikapiimatawa, ma̱takssksinima anniska ota̱a̱nikapiimakkiska ota̱wanisttsiihpiayi. Niʼto̱i kima̱tanistsspoaawa. Ki̱tssksinima̱atsoohpoaawa ni̱tohkanawaani̱yihpistsi ni̱nna. Na̱a̱hkanisttsissi. Nima̱takattaniihpa kika̱kanikapiimatohpoaawa. A̱nnohkayi ta̱kahtsawaanii kita̱kkaamohpoaawa.

John 8:40

Kitsi̱i̱kamoʼtanistohpoaawa no̱mohtoʼtoohtsiihpistsi A̱ʼpistotookiwa, ki kiisto̱aawa kita̱i̱ssaksiʼnikkihpoaawa. Abraham ma̱tanistapitapi̱i̱waatsi.

John 17:8

Ki̱tohkokkihpi issksksi̱moʼtaani, nitsi̱i̱stapohkotayaawayi, ki sota̱moʼtsimiaawa. Sota̱mitsiitaʼpssksinimiaawa no̱mohtoʼtoohsi kiisto̱i. Ki sota̱momaiʼtsimiaawa kito̱ʼtsskookssi.

John 7:28

O̱ki. A̱nniai Jesus sota̱mitsipiima omii o̱mahkitawaatsi̱moihkaaoʼpi. A̱i̱sohkssitsipssatsiiwa omi̱i̱ksi ota̱i̱ssksinima̱atsaaiksi manista̱ksokaʼpoohto̱yihpiaiksi. A̱a̱niiwa, “Oki. Kanistsi̱ksimsstaahpoaawa, ka̱a̱hkssksinookihpoaawa kii no̱mohtoʼtoohpii. Kitsi̱pahtsiiksimsstaahpoaawa. Kita̱o̱kamoʼtanistohpoaawa iitsstsi̱i̱hpa nitsipo̱o̱hsapsskooki. A̱nnahkayi no̱mohtoʼtoo. Nima̱ta̱wattaistoohpa. Osto̱yi nitsipo̱o̱hsapsskooka. Ki kiisto̱aawa kima̱tssksinoaawaawaatsiksi.

John 16:12

O̱ki. A̱nnoohka itsi̱i̱stapakawoyi ka̱a̱hkanistohpoaawaistsi. A̱nnohka kima̱takohkottanistohpoaawaistsaawa. Kita̱kiiko̱mayikiʼtsiihpoaayaawa.

John 7:16

Jesus sota̱manistsiiwaiksi, Nima̱tohtaissksinima̱atstohkihpa niisto̱wa niksi̱msstaanistsi. Annaahka A̱ʼpistotookiwahka, nito̱ʼtsskookahka a̱nnahkaoʼka o̱mohtoʼtsstsiihpiaawa nitssksini̱maatstohkssiistsi.

John 3:11

Kita̱kanisto niitsi̱i̱yi. Niisto̱nnaan no̱mohta̱i̱ʼpoyiihpinnaan ni̱tssksiniihpinnaanistsi kii nita̱i̱tsinikatoohpinnaan nitsini̱i̱hpinnaanistsi, ki kiisto̱aawa kima̱taisskaakomaiʼtookihpinnaan nita̱waaniihpinnaanistsi.

John 8:25

Ki a̱nniai omi̱i̱ksi a̱a̱nistsiiyaawa Jesusi, “Tsa kanista̱i̱ksimssta̱a̱hpa ka̱a̱hkami.” Ki Jesus sota̱manistsiiwaiksi, “A̱amok pitsisto̱yika ki a̱nnohka, kita̱i̱sksawaanistohpoaawa nita̱mihpi.

John 8:27

Jesus niitapa̱waaniiwa ki̱nnooni A̱ʼpistotookiiyi. Omi̱i̱ksi o̱tssitsipssataiksi oma̱totsistapiʼtookaatsaaiksi.

John 18:20

Itani̱i̱wa oma̱a Jesus, “Nitsi̱tssksinimaatstohki otsi̱takaitapisskohpi, kana̱a̱tapiiyi ma̱a̱hkoohtsissaawa. Nitsi̱taika̱pipstssksinimaatstohki omi̱i̱stsi itawa̱atsi̱moihkaaoʼpistsi ki o̱o̱mi o̱mahkitawaatsi̱moihkaaoʼpi. Anni̱i̱ksi Jews iihkana̱i̱tomowo̱oyaawa. Nima̱tsikakitsisimissksinimaatstohki.