Jeremias 21:2 - Ang Pulong sa Dios

² “Palihog hangyoa ang  Ginoo sa pagtabang kanamo, kay gisulong kami ni Nebucadnezar nga hari sa Babilonia. Basin pag maghimog milagro ang  Ginoo sama sa iyang gihimo kaniadto, ug mohunong pagsulong si Nebucadnezar.”

Ang Biblia 2011

² “Pagpakisayod sa Ginoo alang kanamo kay si Nabucodonosor nga hari sa Babilonia nakiggubat batok kanamo; basin pa ug ang Ginoo maghimo kanamo sumala sa tanan niyang mga kahibulongang buhat ug magpasibog kaniya gikan kanamo.”

Maayong Balita Biblia

² “Pangaliyupo sa Ginoo nga maghimo siyag milagro alang kanamo nga katawhan sa Juda kay gisulong kami sa hari sa Babilonia nga si Nabucodonosor. Basin pag pugson sa Ginoo si Nabucodonosor sa pagsibog.”

Ang Bag-ong Maayong Balita Biblia

² “Pangaliyupo sa Ginoo nga maghimo siyag milagro alang kanamo nga katawhan sa Juda kay gisulong kami sa hari sa Babilonia nga si Nabucodonosor. Basin pag pugson sa Ginoo si Nabucodonosor sa pagsibog.”

Jeremias 21:2 Cross References

Genesis 10:10

Ang una nga gingharian nga gidumalahan ni Nimrod mao ang Babilonia, Erek, Acad, ug Calne. Kini silang tanan anaa sa yuta sa Shinar.

2 Mga Hari 1:3

Unya, miingon ang anghel sa Ginoo kang Elias nga taga-Tishbe, “Tagboa ang mga mensahero sa hari sa Samaria ug isulti kini kanila: Nganong didto man kamo mangutana sa dios sa Ekron nga si Baal Zebub? Wala ba diay Dios sa Israel?

2 Mga Hari 17:24

Nagpadala ang hari sa Asiria ug mga tawo ngadto sa Samaria nga gikan sa Babilonia, Cut, Ava, Hamat, ug Sefarvaim, ug gipapuyo niya sila sa mga lungsod sa Samaria puli sa mga taga-Israel. Busa gisakop nila ang Samaria ug ang uban pang mga lungsod sa Israel.

2 Cronicas 32:21

Unya nagpadala ang Ginoo ug anghel nga milaglag sa maisog nga mga sundalo, mga komander, ug mga opisyal sa kampo sa hari sa Asiria. Busa mipauli si Haring Senakerib nga naulawan. Ug sa pagsulod niya sa templo sa iyang dios, gipatay siya sa pipila sa kaugalingon niyang mga anak pinaagi sa espada.

Exodo 9:28

Hangyoa ang Ginoo nga hunongon na niya kining hilabihan kakusog nga dalogdog ug ulan nga yelo. Palakwon ko na kamo. Dili na kinahanglan nga magpabilin pa kamo dinhi.”

Isaias 48:2

Gitawag pa ninyo ang inyong kaugalingon nga mga lumulupyo sa balaang siyudad ug nag-ingon nga nagsalig kamo sa Dios sa Israel, nga ang ngalan Ginoo nga Makagagahom.”

Jeremias 15:11

Miingon ang  Ginoo kanako, “Sa pagkatinuod, mahimong maayo ang tanan alang kanimo. Manghangyo ang imong mga kaaway nga i-ampo mo sila sa panahon sa ilang kalisdanan ug katalagman.

Jeremias 21:3

Apan mitubag si Jeremias, “Ingna ninyo si Zedekia nga mao kini ang gisulti sa Ginoo, nga Dios sa Israel: Dili ninyo mapuslan ang mga armas nga inyong gigamit sa pagpakig-away kang Nebucadnezar ug sa iyang mga sundalo nga naglibot sa inyong mga paril. Tigomon ko sila taliwala niining siyudad.

Jeremias 32:17

“O Ginoong Dios, gihimo mo ang langit ug ang kalibotan pinaagi sa imong dakong gahom. Wala gayoy butang nga dili mo mahimo.

Jeremias 32:24

“Ug karon nagtapok ug yuta ang mga taga-Babilonia sa kilid sa paril sa Jerusalem aron makasaka sila niini ug mailog ang siyudad. Ug tungod sa gira, kagutom, ug balatian, mailog sa mga taga-Babilonia ang siyudad sumala sa imong giingon.

Jeremias 34:1

Gisulong ni Nebucadnezar nga hari sa Babilonia ang Jerusalem ug ang mga lungsod sa palibot niini. Uban niya sa pagsulong ang tanan niyang sundalo lakip ang mga sundalo gikan sa tanang gingharian nga sakop niya. Niadtong higayona miingon ang  Ginoo, nga Dios sa Israel, kang Jeremias, “Adto kang Zedekia nga hari sa Juda ug ingna siya nga ako, ang  Ginoo, nag-ingon: Itugyan ko kini nga siyudad sa mga kamot sa hari sa Babilonia ug sunogon niya kini.

Jeremias 37:17

Unya, gipakuha siya ni Haring Zedekia ug gipadala sa palasyo diin gisekretohan siyag pangutana ni Zedekia, “Adunay mensahe ka ba gikan sa Ginoo?” Mitubag si Jeremias, “Oo, aduna. Itugyan ka ngadto sa hari sa Babilonia.”

Jeremias 37:3

Sa gihapon, gisugo ni Haring Zedekia si Jehucal nga anak ni Shelemia ug ang pari nga si Sofonias nga anak ni Maasea nga moadto kang Propeta Jeremias aron paghangyo niini nga mag-ampo ngadto sa Ginoo nga ilang Dios alang kanila.

Ezequiel 7:26

Moabot kanila ang sunod-sunod nga mga panghitabo ug mga daotan nga balita. Mangayo silag mga mensahe gikan sa mga propeta apan wala silay madawat. Dili na itudlo sa mga pari ang bahin sa Kasugoan ug wala na usay mga tambag gikan sa mga pangulo.

Mga Maghuhukom 20:27

(Niadtong panahona, ang Sudlanan sa Kasabotan sa Dios didto sa Betel ug ang nag-alagad didto mao si Pinehas nga anak ni Eleazar ug apo ni Aaron.) Nangutana sila pag-usab sa Ginoo, “Makig-gira pa ba kami pag-usab sa among mga kadugo nga Benjaminhon o dili?” Mitubag ang Ginoo, “Pakig-gira kamo pag-usab kay ugma padag-on ko na kamo batok kanila.”

1 Samuel 10:22

Busa nangutana ang mga tawo sa Ginoo, “Ania ba siya dinhi?” Mitubag ang Ginoo, “Oo, ania siya. Nagtago lang siya sa mga kargamento.”

1 Samuel 28:15

Miingon si Samuel kang Saulo, “Nganong gisamok mo ako pinaagi sa pagtawag kanako?” Miingon si Saulo, “Aduna akoy dako nga problema. Nakig-gira kanako ang mga Filistihanon ug gitalikdan na ako sa Dios. Wala na niya ako tubaga, bisag pinaagi sa mga propeta o mga damgo. Busa gipatawag ka nako aron sultihan mo ako kon unsa ang akong himuon.”

1 Samuel 28:6

Busa nangutana siya sa Ginoo, apan wala siya tubaga sa Ginoo bisan pinaagi sa mga damgo, mga propeta, o pinaagi sa Urim.