Daniel 5:23 - Ang Pulong sa Dios

²³ giisip mo hinuon ang imong kaugalingon nga labaw sa Ginoo sa langit. Gipakuha mo ang mga imnanan nga gikan sa Templo sa Dios ug giimnan mo kini kauban ang imong mga dungganon nga bisita, mga asawa, ug uban pa nga mga asawa nga sulugoon. Gawas pa niana, imong gidayeg ang mga dios nga hinimo sa plata, bulawan, bronsi, puthaw, kahoy, ug bato. Mga dios-dios nga dili makakita, makadungog, o makasabot. Apan wala mo dayega ang Dios nga nagkupot sa imong kinabuhi ug nagbuot sa tanan mong himuon.

Ang Biblia 2011

²³ Apan nagmapahitas-on ikaw sa imong kaugalingon batok sa Ginoo sa langit ug ang mga galamiton sa iyang balay gidala nganhi sa imong atubangan ug ikaw ug ang imong mga kadagkoan, ang imong mga asawa ug ang imong mga puyopuyo nanginom sa bino gikan niini. Ug gidayeg nimo ang mga dios nga plata ug bulawan, bronsi, puthaw, kahoy ug bato nga dili makakita o makadungog o makaila, apan ang Dios nga sa iyang kamot anaa ang imong gininhawa ug iya ang tanan nimong mga pamaagi, wala nimo pasidunggi.

Maayong Balita Biblia

²³ Nagpasigarbo ka hinuon batok sa Ginoo sa langit ug gipakuha mo ang mga galamiton sa iyang Templo aron tagayan nimo sa bino sa imong pagpakig-inom uban sa imong mga kadagkoan, mga asawa ug mga puyopuyo. Gidayeg nimo ang mga diosdios nga bulawan, plata, bronsi, puthaw, kahoy ug bato nga dili makadungog o makakita o mahibalo apan wala mo hinuon pasidunggi ang Dios nga maoy naghatag kanimog kinabuhi ug sa imong kadato.

Ang Bag-ong Maayong Balita Biblia

²³ Nagpasigarbo ka hinuon batok sa Ginoo sa langit ug gipakuha mo ang mga galamiton sa iyang Templo aron tagayan nimo sa bino sa imong pagpakig-inom uban sa imong mga kadagkoan, mga asawa ug mga puyopuyo. Gidayeg nimo ang mga diosdios nga bulawan, plata, bronsi, puthaw, kahoy ug bato nga dili makadungog o makakita o mahibalo apan wala mo hinuon pasidunggi ang Dios nga maoy naghatag kanimog kinabuhi ug sa imong kadato.

Daniel 5:23 Cross References

Genesis 14:19

Gipanalanginan niya si Abram nga nag-ingon: “Hinaut pa nga panalanginan ka, Abram, sa Labing Halangdong Dios nga nagbuhat sa langit ug sa yuta.

Genesis 2:7

Unya gibuhat sa Ginoong Dios ang tawo gikan sa yuta. Gihuypan niya ang ilong sa tawo sa gininhawa nga naghatag ug kinabuhi, ug ang tawo nahimo nga buhing binuhat.

2 Mga Hari 14:10

“Amazia, tinuod nga napildi mo ang Edom ug mibukad na ang imong atay tungod niini. Makontento ka nalang sa imong kadaogan ug pagpuyo diha sa imong palasyo. Nganong mangita ka pa man ug samok nga magdala ug kalaglagan kanimo ug sa Juda?”

Job 12:10

Anaa sa iyang kamot ang kinabuhi o ang gininhawa sa tanang binuhat, apil na ang sa tawo.

Job 31:4

Nasayod ang Dios sa tanan kong ginahimo.

Salmo 104:29

Apan kon pasagdan mo sila, mangahadlok sila; kon kuhaon mo ang ilang gininhawa, mangamatay sila ug mobalik sa yuta nga maoy ilang gigikanan.

Salmo 115:16

Ang kalangitan iya sa Ginoo, apan ang kalibotan gitugyan niya sa mga tawo.

Salmo 139:3

Gibantayan mo ako sa akong paglakaw ug pagpahulay. Nahibalo ka sa tanan kong ginahimo.

Salmo 146:4

Kon mamatay sila mobalik sila sa yuta, ug nianang adlawa ang ilang mga plano matapos usab.

Mga Panultihon 20:24

Ang Ginoo maoy nagbuot sa atong kinabuhi, busa dili nato mahibaloan ang atong kapalaran.

Isaias 13:11

Miingon ang  Ginoo, “Silotan ko ang kalibotan tungod sa iyang kadaotan, ug ang mga tawong daotan tungod sa ilang mga sala. Santaon ko ang mga garboso, ug sumpoon ko ang pagkamapahitas-on sa mga tawong walay kaluoy.

Isaias 14:13

Miingon ka sa imong kaugalingon, “Mosaka ako sa langit, ug ibutang ko ang akong trono ibabaw sa mga bitoon sa Dios. Molingkod ako ibabaw sa bukid nga tigomanan sa mga dios didto sa amihan.

Isaias 2:12

Kay adunay adlaw nga gitagana ang  Ginoo nga labing gamhanan sa pagpaubos sa tanang mga mapasigarbohon, mga mapahitas-on, ug sa mga nag-ila sa ilang kaugalingon nga gamhanan.

Isaias 33:10

Miingon ang  Ginoo, “Mao na kini ang panahon nga molihok ako, ug pasidunggan ako sa mga tawo.

Isaias 37:19

ug gipangsunog ang ilang mga dios, kay dili man usab kini tinuod nga mga dios kondili mga bato lang ug mga kahoy nga hinimo sa tawo.

Isaias 37:23

Kinsay imong giinsulto ug gipasipad-an? Kinsay gipataasan mo sa imong kilay ug gisingkahan? Dili ba nga ako, ang Balaang Dios sa Israel?

Isaias 42:5

Mao kini ang giingon sa Dios, ang  Ginoo nga nagbuhat sa kalangitan nga iyang gibukhad nga daw tela. Gibuhat niya ang kalibotan ug ang tanang anaa niini. Siya usab ang naghatag ug gininhawa sa mga tawo ug sa tanang mga binuhat nga anaa sa kalibotan.

Jeremias 10:23

Ginoo, nasayod ako nga ang kinabuhi sa tawo dili iya. Dili siya makabuot sa iyang kapalaran.

Jeremias 48:26

“Huboga ang Moab, kay naghuna-huna siya nga labaw siya kanako. Moligid siya sa iyang kaugalingong suka ug mahimong kataw-anan.

Jeremias 50:28

Paminawa ang mga tawo nga nakaikyas gikan sa Babilonia. Nagsugilon sila didto sa Jerusalem kon giunsa pagpanimalos sa Ginoo nga atong Dios ang Babilonia tungod sa ilang gihimo sa iyang Templo.

Jeremias 50:29

“Ipasulong ninyo sa mga mamamana ang Babilonia. Paliboti ninyo kini aron walay makaikyas. Balosi ninyo siya sumala sa iyang gibuhat. Buhata ngadto kaniya ang iyang gibuhat ngadto sa uban, kay misukol siya sa Ginoo, ang Balaan nga Dios sa Israel.

Ezequiel 28:17

Nahimo kang garboso tungod sa imo nga katahom. Gigamit mo sa kabuang ang imo nga kaalam aron mahimo kang bantogan. Mao nga gilabay ka nako sa yuta, ug nahimo kang talan-awon sa uban nga mga hari.

Ezequiel 28:2

“Tawo, ingna ang pangulo sa Tiro nga ako, ang Ginoong Dios, nag-ingon: “Sa imo nga pagkagarboso nag-ingon ka nga ikaw usa ka dios nga naglingkod sa trono taliwala sa kadagatan. Apan ang tinuod, bisan kon naghuna-huna ka nga maalam ka sama sa usa ka dios, dili ka Dios kondili tawo ka lamang.

Ezequiel 28:5

Pinaagi sa imo nga abilidad sa pagnegosyo, nadugangan pa gayod ang imo nga bahandi, ug tungod sa imo nga bahandi nahimo kang garboso.

Ezequiel 31:10

Busa miingon ang Ginoong Dios, “Tungod kay nagpasigarbo kini nga kahoya sa iyang kahabog ug sa kalabong sa iyang mga sanga,

Daniel 11:12

Tungod sa iyang kadaogan, magpasigarbo siya ug daghan pa gayod ang iyang laglagon. Apan dili siya magpabilin nga madaogon,

Daniel 4:37

Busa karon akong dayegon ug pasidunggan ang Hari sa langit, tungod kay husto ug matarong ang tanan niyang binuhatan ug ginapaubos niya si bisan kinsa nga nagpasigarbo.

Daniel 8:11

Giila niini ang iyang kaugalingon nga gamhanan kaysa Pangulo sa langitnon nga mga binuhat. Gipaundang niya ang adlaw-adlaw nga paghalad sa Templo sa Dios, ug gipanamastamasan niya ang Templo.

Habacuc 2:4

“Lantawa ang mga kaaway nga magarbohon; ang iyang tinguha dili tarong, apan ang matarong nga tawo mabuhi sa pagkamatinud-anon.

Mga Buhat 17:25

Wala usab siya magkinahanglan ug tabang gikan sa mga tawo tungod kay siya mismo ang naghatag ug kinabuhi kanato, ug sa tanang gikinahanglan nato.

1 Mga Taga-Corinto 8:4

Busa kon mahitungod sa mga pagkaon nga gihalad ngadto sa mga dios-dios, nasayod kita nga walay tinuod nga dios-dios diri sa kalibotan, kay adunay usa lang gayod ka Dios.

1 Timoteo 3:6

Kinahanglan dili siya bag-ong tumutuo, kay basin unya ug magpasigarbo siya ug tungod niini silotan siya sama sa Yawa.

Mga Hebreo 4:13

Walay makatago gikan sa Dios; ang tanan makita niya ug dayag gayod sa iyang panan-aw, ug kaniya kita mohatag ug husay sa atong mga binuhatan.

Gipadayag 9:20

Apan ang mga tawo nga nahibilin, nga wala mangamatay pinaagi niining tulo ka mga katalagman, wala gihapon maghinulsol sa ilang daotan nga mga binuhatan ug wala gayod mobiya sa mga dios-dios nga ilang gibuhat. Nagpadayon pa gihapon sila sa pagsimba sa mga demonyo ug sa mga rebulto nga bulawan, plata, bronsi, bato, ug kahoy. Kini nga mga rebulto dili makakita, dili makadungog, ug dili makalakaw.

Mga Maghuhukom 16:23

Usa niana ka higayon, nagtigom ang mga pangulo sa mga Filistihanon aron paghimo ug dakong kasaulogan ug paghalad ug daghang mga halad sa ilang dios nga si Dagon. Kay matod nila, “Gitugyan kanato sa atong dios si Samson nga atong kaaway.”

1 Samuel 17:26

Nangutana si David sa mga tawo nga nagtindog duol kaniya, “Kinsa ba gayod kanang Filistihanon, nga wala nakaila sa Dios, nga nanghagit sa mga sundalo sa buhi nga Dios? Ug unsa ang madawat sa tawo nga makapatay kaniya aron maundang ang iyang pagpakaulaw sa Israel?”

1 Samuel 17:36

Nahimo ko kini sa liyon ug sa oso, ug himuon ko usab nianang Filistihanon nga wala nakaila sa Dios, tungod kay gihagit niya ang mga sundalo sa buhi nga Dios.