Juan 19 - Ang Biblia 2011

¹ Busa gikuha ni Pilato si Jesus ug iyang gipalatigo.

² Ug ang mga sundalo nagbuhat ug korona gikan sa tunokon nga sagbot ug gibutang nila kini sa iyang ulo ug gisul-oban nila siya ug kupo nga tapol.

³ Miduol sila kaniya ug miingon, “Mabuhi ang Hari sa mga Judio!” ug unya gisagpa nila siya.

⁴ Unya si Pilato migula na usab ug miingon kanila, “Tan-awa, ania gidala nako siya kaninyo sa gawas aron mahibalo kamo nga wala akoy nakitang sala diha kaniya.”

⁵ Ug si Jesus migula nga sinul-oban sa korona nga tunokong sagbot ug sa kupo nga tapol. Si Pilato miingon kanila, “Tan-awa, ania ra ang tawo!”

⁶ Sa pagkakita sa mga pangulong pari ug sa mga tinugyanan kaniya, sila naninggit nga nag-ingon, “Ilansang siya sa krus! Ilansang siya sa krus!” Si Pilato miingon kanila, “Kuhaa ninyo siya ug ilansang sa krus, kay wala akoy nakitang sala diha kaniya.”

⁷ Ang mga Judio mitubag kaniya, “Kami adunay balaod, ug sumala sa maong balaod kinahanglan siyang patyon kay siya naghimo sa iyang kaugalingon nga Anak sa Dios.”

⁸ Sa pagkadungog ni Pilato niining sultiha, misamot siya pagkahadlok.

⁹ Ug siya misulod pag-usab sa palasyo ug miingon kang Jesus, “Taga diin ba ikaw?” Apan si Jesus wala motubag kaniya.

¹⁰ Busa si Pilato miingon kaniya, “Dili ba diay ikaw makigsulti kanako? Wala ba ikaw mahibalo nga may kagahom ako sa pagbuhi kanimo ug kagahom sa pagpalansang kanimo sa krus?”

¹¹ Si Jesus mitubag kaniya, “Wala ka untay kagahom ibabaw kanako kon wala pa ikaw hatagi niini gikan sa kahitas-an, busa ang nagtugyan kanako nganha kanimo dako pa ug sala.”

¹² Tungod niini si Pilato naninguha sa pagbuhi kaniya apan ang mga Judio naninggit nga nag-ingon, “Kon imong buhian kining tawhana, dili ikaw higala ni Cesar. Ang tanan nga magpakahari nakigbatok kang Cesar.”

¹³ Sa pagkadungog ni Pilato niining mga pulonga, gidala niya si Jesus sa gawas ug milingkod siya sa lingkoranan alang sa paghukom, sa usa ka dapit nga ginganlan ug Plataporma nga Bato, ug nga sa Hebreo Gabata.

¹⁴ Ug kadto adlaw sa Pangandam alang sa Kasaulogan sa Pagsaylo, sa udtong tutok. Ug siya miingon sa mga Judio, “Tan-awa, ania ang inyong Hari!”

¹⁵ Apan sila naninggit nga nag-ingon, “Ipalayo siya, ipalayo siya, ilansang siya sa krus!” Si Pilato miingon kanila, “Ilansang ba diay nako sa krus ang inyong Hari?” Ang mga pangulong pari mitubag, “Wala kami hari gawas kang Cesar.”

¹⁶ Busa gitugyan niya si Jesus ngadto kanila aron ilansang sa krus.

Si Jesus Gilansang sa Krus

¹⁷ Busa ilang gikuha si Jesus ug siya milakaw nga nagpas-an sa iyang kaugalingong krus, paingon sa dapit nga ginganlan ug dapit sa kalabera, nga sa Hebreo gitawag ug Golgota.

¹⁸ Ug didto gilansang nila siya sa krus ug uban kaniya duha pa ka tawo, ang matag usa sa isigkakilid ug si Jesus sa taliwala nila.

¹⁹ Ug si Pilato nagsulat usab ug usa ka pahibalo ug gibutang niya kini sa krus. Ang pahibalo nag-ingon, “Si Jesus nga taga-Nazaret, ang Hari sa mga Judio.”

²⁰ Daghan sa mga Judio nakabasa sa maong pahibalo, kay ang dapit diin si Jesus gilansang sa krus duol ra man sa siyudad, ug kini gisulat man sa Hebreo, Latin ug Grego.

²¹ Unya ang mga pangulong pari sa mga Judio miingon kang Pilato, “Ang isulat nimo dili, ‘Ang Hari sa mga Judio,’ kondili, ‘Kining tawhana nag-ingon: Ako ang Hari sa mga Judio.’ ”

²² Si Pilato mitubag, “Ang akong nasulat, nasulat na.”

²³ Unya ang mga sundalo, sa dihang gilansang na nila si Jesus, mikuha sa iyang mga bisti ug ila kining gibahin sa upat, usa alang sa matag sundalo. Apan ang iyang kamisola walay tinahian, dayon kini gikan sa taas hangtod sa ubos.

²⁴ Ug sila miingon sa usa ug usa, “Dili nato kini tabastabason kondili ripahon nato kon kinsay makapanag-iya niini.” Kini aron matuman ang kasulatan nga nag-ingon, “Ilang gibahinbahin ang akong mga bisti alang sa ilang kaugalingon, ug ang akong sapot ilang giripahan.”

²⁵ Busa mao kini ang gibuhat sa mga sundalo. Apan sa duol sa krus ni Jesus nagtindog ang iyang inahan, ug ang igsoon nga babaye sa iyang inahan, ug si Maria nga asawa ni Clopas, ug si Maria Magdalena.

²⁶ Sa pagkakita ni Jesus sa iyang inahan ug sa tinun-an nga iyang pinalangga nga nagtindog sa duol, siya miingon sa iyang inahan, “Babaye, tan-awa ang imong anak!”

²⁷ Unya miingon siya sa tinun-an, “Tan-awa ang imong inahan!” Ug sukad niadtong tungora gipapuyo siya sa kaugalingong balay sa tinun-an.

²⁸ Human niini, si Jesus nga nahibalo nga ang tanan natapos na, miingon (sa pagtuman sa kasulatan), “Giuhaw ako.”

²⁹ Ug sa duol dihay usa ka sudlanan nga puno sa suka ug ilang gibutang sa hisopo ang usa ka espongha nga natuhop sa suka ug kini ilang giisa ngadto sa iyang baba.

³⁰ Sa nakainom na si Jesus sa suka, siya miingon, “Natapos na.” Ug giduko niya ang iyang ulo ug gitugyan ang iyang espiritu.

Ang Pagduslak sa Kilid ni Jesus

³¹ Kay kadto adlaw man sa Pangandam, ug aron ang mga lawas dili magpabilin sa krus sa adlaw nga igpapahulay, kay kadtong adlawa nga igpapahulay dako man nga adlaw, mihangyo ang mga Judio kang Pilato nga balion ang mga bitiis sa mga tawong himatyon ug ipakuha ang ilang mga lawas.

³² Busa nangadto ang mga sundalo ug ilang gipangbali ang mga bitiis sa nauna ug sa usa nga gilansang sa krus uban kaniya.

³³ Apan sa diha na sila kang Jesus, ug ilang nakita nga siya patay na, wala na lang nila balia ang iyang mga bitiis.

³⁴ Apan usa sa mga sundalo miduslak ug bangkaw sa iyang kilid ug dihadiha mibuhagay ang dugo ug tubig.

³⁵ Siya nga nakakita niini nagpamatuod ug tinuod ang iyang pamatuod ug siya nahibalo nga siya nagsulti sa tinuod, aron kamo usab motuo.

³⁶ Kay kining mga butanga nahitabo aron matuman ang kasulatan nga nag-ingon, “Walay bukog niya nga mabali.”

³⁷ Ug usab ang laing bahin sa kasulatan nag-ingon, “Sila magtan-aw kaniya nga ilang giduslak.”

Ang Paglubong kang Jesus

³⁸ Human niini, si Jose nga taga-Arimatea nga usa ka tinun-an ni Jesus, apan sa tago lamang tungod sa kahadlok niya sa mga Judio, mihangyo kang Pilato nga iyang kuhaon ang lawas ni Jesus, ug siya gitugotan ni Pilato. Busa miadto siya ug gikuha niya ang lawas ni Jesus.

³⁹ Ug si Nicodemo, nga sa una miadto kang Jesus usa niana ka gabii, miadto usab nga nagdala ug mga usa ka gatos ka libra nga sinagol nga mirra ug aloe.

⁴⁰ Unya gikuha nila ang lawas ni Jesus ug gibugkosan kini ug mga panapton nga lino, lakip ang mga pahumot, sumala sa naandan sa mga Judio sa paglubong.

⁴¹ Ug sa dapit diin didto siyag ilansang sa krus, dihay usa ka tanaman ug sa tanaman dihay usa ka bag-ong lubnganan nga wala pa gayod kalubngi.

⁴² Tungod kay adlaw man kadto sa Pangandam sa mga Judio, ug ang lubnganan duol ra man, ilang gipahiluna si Jesus didto.