Filemon 1:14 - Ang Pulong sa Dios

Apan dili ko kini buhaton nga walay pagtugot gikan kanimo, aron dili pinugos ang pagtabang mo kanako. Gusto ko nga kon motabang ka man gayod, motabang ka nga kinasing-kasing.

Ang Biblia 2011

Apan dili ako buot nga magbuhat nga walay pag-uyon gikan kanimo aron ang imong kaayo dili mahimo pinaagi sa pagpugos kondili sa imong kaugalingong kabubut-on.

Maayong Balita Biblia

Apan dili ako magbuhat ug bisan unsa nga dili nimo uyonan. Busa dili ko ikaw pugson sa pagtabang kanako kon dili gikan sa imong gawasnong kabubut-on.

Ang Bag-ong Maayong Balita Biblia

Apan dili ako magbuhat ug bisan unsa nga dili nimo uyonan. Busa dili ko ikaw pugson sa pagtabang kanako kon dili gikan sa imong gawasnong kabubut-on.

Filemon 1:14 Cross References

1 Cronicas 29:17

Dios ko, nahibalo ako nga ginasusi mo ang among kasing-kasing ug malipay ka kon makita mo nga matarong kini. Nasayod ka nga matinud-anon ako ug maayo ang akong tuyo sa paghatag niining mga butanga. Ug nakita ko nga malipayon ug kinasing-kasing usab nga nanghatag ang imong katawhan diha kanimo.

Salmo 110:3

Sa adlaw nga makig-away ka sa imong mga kaaway, kinabubut-on nga motabang kanimo ang imong katawhan. Ang mga pamatan-on moadto kanimo sa balaang mga bungtod nga daw tun-og sa kabuntagon.

1 Mga Taga-Corinto 9:17

Kon nagwali ako tungod kay mao kini ang akong gipili nga trabaho, magpaabot unta ako ug suhol. Apan ang tinuod, gituman ko lang ang akong katungdanan nga magwali tungod kay mao kini ang gitugyan kanako sa Dios.

1 Mga Taga-Corinto 9:7

Aduna bay sundalo nga siya ra mismo ang nagsuhol sa iyang kaugalingong panerbisyo? Aduna bay nagtanom ug ubasan nga dili makapahimulos sa bunga sa iyang gitanom? Ug aduna bay nag-alima ug mga mananap nga walay bahin?

2 Mga Taga-Corinto 1:24

Wala kami magmando kaninyo mahitungod sa inyong pagtuo, kay lig-on na man kamo. Gusto lang unta namo kamong tabangan aron magmalipayon kamo.

2 Mga Taga-Corinto 8:12

Kay kon tinguha gayod ninyo nga mohatag, dawaton sa Dios ang inyong ikahatag. Wala siya nagpaabot nga mohatag kamo sa dili ninyo makaya.

2 Mga Taga-Corinto 9:5

Busa nakahuna-huna ako nga kinahanglan kong dasigon kini nga mga igsoon nga mouna diha aron nga sa dili pa ako moabot, matigom na nila ang inyong gisaad nga hinabang. Sa ingon niini nga pamaagi mapamatud-an nga naghatag kamo tungod kay gusto ninyo ug dili tungod kay napugos lang kamo.

2 Mga Taga-Corinto 9:7

Ang matag-usa kinahanglan mohatag sa kinasing-kasing gayod; dili nga mapugos lang o bug-at sa buot, kay gihigugma sa Dios ang mga naghatag nga malipayon.