Zefaniya 2:7 - Siswati 1996 Bible

⁷ Liyawuba lemisalela yendlu yakaJuda, ngulapho-ke lapho bayawutfola khona emadlelo. Kusihlwa bayawulala phansi etindlini tase-Ashkeloni. Simakadze Nkulunkulu wabo uyawubanakekela; uyawubuyisela kubo tinhlanhla tabo.

Zefaniya 2:7 Referencias Cruzadas

Genesisi 50:24

Josefa wakhuluma kubomnakabo, watsi: “Sengitakufa; kodvwa ngiyati kutsi Nkulunkulu utawuba nani anikhiphe kulelive, anibuyisele eveni labetsembisa lona bo-Abrahama, na-Isaka, naJakobe.”

Tihlabelelo 80:14

Awu, Nkulunkulu wemabandla! Phendvuka futsi! Buka phansi usetulu ezulwini, ubone lomvini wakho, uwunakelele,

Tihlabelelo 85:1

Awu, Simakadze! Ulitsandzile live lakho, wabuyisela tibusiso taJakobe.

Eksodusi 4:31

Ngako bakholwa. Batsi kube beve kutsi Simakadze ubanakile nekutsi abesakubonile kuhlupheka kwabo, bakhotsamisa tinhloko tabo bakhonta Simakadze.

Isaya 11:11

Ngalelo langa Simakadze uyakwelula sandla sakhe kwesibili atibutsele imisalela yesive sakhe leyawube isasele e-Asiriya, naseGibhithe Lengentansi, neGibhithe Lengenhla, naseKushe, nase-Elamu, naseBhabhulona, naseHamathi, nasemaveni langaselwandle.

Isaya 11:14

Bayawukwehla emaceleni aseFilistiya bawahlasele enshonalanga, bobabili bayawuphanga bantfu labahlala emphumalanga. Bayawulidla live laka-Edomu nelakaMowabi, babuse etikwema-Amoni.

Isaya 11:16

Kuyawuba nemgwaco lomkhulu wemisalela yesive sakhe leyawube isele e-Asiriya, njengobe wawukhona nakubaka-Israyeli ngesikhatsi baphuma eGibhithe.

Isaya 14:1

Simakadze utawubonakalisa sihawu sakhe kuJakobe, utawuphindza futsi akhetse ema-Israyeli, awabuyisele eveni lawo. Betive batawutihlanganisa nawo, batihlanganise nendlu yaJakobe.

Isaya 32:14

Inqaba iyawusala yodvwa, lidolobha lemsindvo lisale likhala libhungane, indlu leyinqaba kanye nembhoshongo kuyawuba lihlane lelingenalutfo phakadze naphakadze, kube kujabula kwetimbongolo nelidlelo lemihlambi,

Jeremiya 23:3

“Mine matfupha ngiyawutibutsela lensali yemhlambi wami emaveni onkhe, lapho ngiwusakatele khona, ngiwubuyisele edlelweni lawo, lapho uyawukwandza khona, ukhule wandze ngesibalo.

Jeremiya 29:10

“Naku lokushiwo nguSimakadze, utsi: ‘Naseyiphelile iminyaka lengema-70 yeBhabhulona, ngitawufika kini ngitewugcwalisa setsembiso sami semusa kutsi nginibuyise kulendzawo.

Jeremiya 29:14

Ngiyawutfolwa ngini nginibuyise ekutfunjweni kwenu,’ kusho Simakadze. ‘Ngiyawunibutsa kuto tonkhe tive netindzawo, lapho benginicoshele khona,’ kusho Simakadze. ‘Ngiyawunilandza nginibuyisele kuyo lendzawo lapho nganitsatsa khona naya ekudzingisweni.’

Jeremiya 3:18

Kulawo malanga indlu yakaJuda iyawutihlanganisa nendlu yaka-Israyeli, bete kanyekanye baphuma eveni lelingasenyakatfo, batewungena eveni lengalipha boyisemkhulu kutsi libe lifa labo.”

Jeremiya 30:3

Simakadze utsi: ‘Ayeta emalanga, lapho ngiyawulandza khona sive sami saka-Israyeli nesakaJuda ekutfunjweni ngibabuyisele eveni lengalipha boyisemkhulu kutsi libe ngelabo,’ kusho Simakadze.”

Jeremiya 31:7

Naku lokushiwo nguSimakadze, utsi: “Hlabelani ngenjabulo kuJakobe; memetelani kulesive lesikhulu kunato tonkhe. Vakalisani kumdvumisa kwenu, nitsi: ‘Awu Simakadze, sindzisa sive sakho, imisalela yaka-Israyeli!’

Jeremiya 32:44

Emasimi ayawutsengwa ngesiliva, netincwadzisivumelwane tekutsenga tiyawusayinwa, tivalwe ngeluphawu, tibuye tifakazelwe eveni lakaBhenjamini, nasemakhaya lakhelene neJerusalema, nasemadolobheni akaJuda, nasemadolobheni laseveni letintsaba nasemaceleni etintsaba ngasenshonalanga, nasemadolobheni aseNegevu, ngobe ngiyawutibuyisela kubo tibusiso tabo, kusho Simakadze.”

Jeremiya 33:12

“Naku lokushiwo nguSimakadze longuSomandla, utsi: ‘Kulendzawo lelihlane lelingenabantfu netilwane, nakuwo onkhe emadolobha ayo kuyawuphindze kube nemadlelo, lapho iyawuphumulela khona imihlambi yetimvu neyetimbuti tebelusi.

Jeremiya 33:7

Ngiyawubuyisa bakaJuda nema-Israyeli ekutfunjweni, ngibuye ngibakhe kabusha babe njengaloku babenjalo kucala.

Jeremiya 47:5

IGaza iyawuhhula inhloko yayo ilile, i-Ashkeloni yona iyawuvalwa umlomo, ibhubhe. Awu, nsali yasetsafeni, niyawutikhipha umkhuphulwane kuze kube ngunini?

Hezekeli 39:25

“Ngako-ke naku lokushiwo yiNkhosi Simakadze, itsi: Manje sengitambuyisa Jakobe ekutfunjweni, ngibe nesihawu kubo bonkhe bantfu baka-Israyeli, ngiyawulishisekela Libito lami lelingcwele.

Hoseya 6:11

“Nawe-ke, Juda, ulungiselwe kuvunwa. “Nase ngifuna kubuyisela inhlalakahle kubantfu bami,

Obadiya 1:19

Sive lesichamuka eNegevu siyawuhlala eveni letintsaba lekungela-Edomu. Sive lesisuka emaceleni etintsaba siyawulitfumba live lemaFilisti. Yebo, ema-Israyeli ayawulitsatsa live laka-Efrayimu nelaseSamariya. BakaBhenjamini bona bayawutsatsa lakaGileyadi.

Mikha 2:12

“Kodvwa ngiyakunibutsela ndzawonye, nonkhe nine sive saka-Israyeli lenisasele. Ngiyawunibutsela nonkhe ndzawonye njengetimvu tibuyela esibayeni sato; nanjengelidlelo leligcwele timvu, live lenu lisetawubuye ligcwale bantfu labanyenti.”

Mikha 4:10

Shumpani nibubule, bantfu baseJerusalema, nilingise umfati aphetfwe ngumhelo nasatawubeleka, ngobe nyalo senitawuphuma ekhaya niyewuhlala etigangeni. Nitakuya eBhabhulona; noko lapho niyawusindziswa, Simakadze uyakunephula etitseni tenu.

Mikha 4:7

Bantfu balesive batishosha kantsi bakhashane nemakhaya abo, kodvwa ngiyawukwenta sicalo lesisha ngensali yabo, babe sive lesinemandla. Ngiyawuba yiNkhosi yabo eSiyoni kuze kube phakadze naphakadze.”

Zefaniya 2:9

Ngako-ke, kuphila kwami,” kusho Simakadze Somandla, longuNkulunkulu wema-Israyeli, “impela Mowabi uyawuba njengeSodoma, nema-Amoni abe njengeGomora, indzawo yelukhula nemigodzi yeluswayi, live lelilihlane phakadze naphakadze. Insali yesive sami iyawubaphanga; besive sami labayawusala bayawulidla live labo.”

Zefaniya 3:13

“Imisalela yaka-Israyeli ingeke ikwente lokubi; ingeke iwakhulume emanga, nenkhohlakalo ingeke itfolakale emilonyeni yayo. Lemisalela iyakudla, icambalale phansi, kute futsi umuntfu loyakuyesabisa.”

Zefaniya 3:20

Ngaleso sikhatsi ngiyawunibutsa; ngaleso sikhatsi ngiyawunibuyisela ekhaya. Ngiyawuninika kuhlonipheka neludvumo emkhatsini wato tonkhe tive temhlaba, nase nginibuyisela tinhlanhla tenu embikwemehlo enu nibuka,” kusho Simakadze.

Hagayi 1:12

Ngako-ke boZerubhabheli, umsa waSheyaltiyeli, naJeshuwa, umsa waJehosadaki, umPhristi Lomkhulu, nayo yonkhe insali yesive yalilalela livi laSimakadze Nkulunkulu wabo nemavi emphrofethi Hagayi, ngobe Simakadze longuNkulunkulu wabo abemtfumile. Bantfu base badvumisa Simakadze.

Hagayi 2:2

“Khuluma kuZerubhabheli, umsa waSheyaltiyeli, umbusi wakaJuda, nakuJeshuwa, umsa waJehosadaki, umPhristi Lomkhulu, nakuyo insali yesive, utsi:

Lukha 1:68

“Ayidvunyiswe iNkhosi, Nkulunkulu wema-Israyeli, ngobe ibahambele bantfu bayo, yabakhulula.

Lukha 7:16

Bonkhe bantfu bafikelwa kwesaba, badvumisa Nkulunkulu batsi: “Sifikelwe ngumphrofethi lomkhulu!” Baphindze batsi: “Nkulunkulu sewubahambele bantfu bakhe!”

Imisebenti yebaPhostoli 8:26

Ingilosi yeNkhosi yakhuluma kuFiliphu yatsi: “Tilungiselele kuya endleleni leseNingizimu lesuka eJerusalema yehlele eGaza.” (Lendlela ilihlane).

Imisebenti yebaPhostoli 8:40

Kodvwa Filiphu wabonakala asase-Azothosi ahamba ashumayela liVangeli kuwo onkhe emadolobha, waze wefika naseKhesariya.

KubaseRoma 11:5

Nanyalo kulesikhatsi kunjalo, bakhona labasele ngekukhetfwa ngemusa.

Ruthe 1:6

Emvakwaloko Nawomi weva kutsi Simakadze ubabusisile bantfu bakubo ngekubapha inala. Ngako-ke wavele watilungiselela kuhamba nalaba bomalukatane bakhe.