Zakhariya 2:9 - Siswati 1996 Bible

⁹ Utsi: “Impela ngiyawuphakamisa sandla sami ngimelane nato, khona titewuba yimphango yetigcili tato. Ngulapho-ke niyawukwati khona kutsi nguSimakadze longuSomandla longitfumile.

Zakhariya 2:9 Referencias Cruzadas

Isaya 10:32

Lamuhla nje ema-Asiriya ayawumisa eNobi; ayawujikitisa tibhakela tawo entsabeni yeNdvodzakati yaseSiyoni, egcumeni laseJerusalema.

Isaya 11:15

Simakadze uyakomisa sihlenge selwandle lwaseGibhithe; uyakwelula sandla sakhe lesinemandla etikweYufrathe, ayihamule ngemoya loshisako. Lomfula uyakuwehlukanisa ekhatsi, ube ngimifula lesikhombisa, khona bantfu batekwewela bafake tincabule.

Isaya 12:6

Memetani kakhulu, nihlabele ngenjabulo, nine bantfu baseSiyoni, ngobe mkhulu lowo Longcwele waka-Israyeli losemkhatsini wenu.”

Isaya 13:2

“Phakamisani siboniso semphi, nisiphakamisele esicongweni sentsaba. Memetani kakhulu, nibakhwebe, khona batewuncandzeka babuye, bangene emasangweni alabaphakeme.

Isaya 14:2

Tive tiyakuwatsatsa tiwamikise endzaweni yawo. Lababendlu yaka-Israyeli bayawutsatsa betive, babasebentise njengetigcili tabo letidvuna naletisikati eveni laSimakadze. Batfumbi babo bayawubenta batfunjwa babo, babuse etikwebacindzeteli babo.

Isaya 19:16

Ngalelo langa baseGibhithe bayawuba njengebafati. Bayawutfutfumela ngenca yekwesaba ingalo yaSimakadze longuSomandla leyawube iphakanyiselwe kumelana nabo.

Isaya 26:1

Ngalelo langa kuyawuhlatjelelwa ingoma kaJuda, letsi: “Sinelidolobha lelicinile; Nkulunkulu usentela insindziso ngetibondza talo netinqaba talo.”

Isaya 33:1

Maye kuwe, wena mbhubhisi, wena losengakabhujiswa! Maye kuwe, wena lolimbuka, wena losengakatsengiswa! Nawuyekela kubhubhisa, uyakubhujiswa nawe. Nawuyekela kutsengisa bantfu, uyakutsengiswa nawe.

Isaya 33:21

Lapho-ke Simakadze uyawuba nguLonemandla wetfu. Kuyawufanana nendzawo lenemifula lebanti nemifudlana. Kute sikebhe lesinetigwedlo lesiyawuhamba kuyo, kute ngisho nemkhumbi lonemandla lotawuntjweza kuyo.

Isaya 33:23

Tindophi takho tekubopha liseyili setiyaceka: Insika yemkhumbi ayikaboshwa yacina, liseyili alikendlaleki. Imphango lenyenti itakwehlukaniswa, ngisho nalochutako uyakuyitfola imphango.

Isaya 4:5

Ngako Simakadze uyawudala lifu emini, intfutfu nelilangabi lemlilo ebusuku, lisibekele iNtsaba yonkhe iSiyoni nabo bonkhe labahlanganela kuyo; etikwayo yonkhe lenkhatimulo kuyawuba nempheme.

Isaya 48:16

“Sondzelani edvutane nami, nilalele naku: “Kusukela esimemetelweni sekucala angizange ngikhulume emasitseleni, ngalesikhatsi nakwenteka, mine ngisuke sengikhona.” Manje-ke, iNkhosi Simakadze ingitfumile kanye naMoya wayo.

Isaya 60:18

Akuseyiwuba nekulwa eveni lakho, kuyawubate incitsakalo nembhubhiso emikhawulweni yelive lakho. Kodvwa uyawubita tibondza takho ngekutsi yiNsindziso, nemasango akho ngekutsi Ludvumo.

Isaya 60:19

Lilanga aliseyikuba kukhanya kwakho emini, ngisho nekukhanya kwenyeti kungeke kusakukhanyisela wena, ngobe Simakadze uyawuba kukhanya kwakho kwaphakadze, Nkulunkulu wakho abe ludvumo lwakho.

Jeremiya 27:7

Tive tonkhe tiyawumkhonta, nendvodzana yakhe kanye nemtukulu wakhe, kuze kube sikhatsi lapho live lakhe liwa khona, tive letinyenti nemakhosi lamakhulu amehlule.

Jeremiya 28:9

Kodvwa umphrofethi lophrofetha kuthula nguye loyawulalelwa, anakwe njengemuntfu longuyena atfunywe nguSimakadze ngempela, kuphela nje nangabe lesiphrofetho sakhe sigcwaliseka.”

Jeremiya 8:19

Lalelani kukhala kwesive sami, sikhala eveni lelikhashane kakhulu, sitsi: “Simakadze akekho yini eSiyoni? Kungabe iNkhosi yayo ayikho yini lapho?” “Bangitfukutseliseleni ngaletitfombe tabo, ngaletithico tabo tebetive letingenamsebenti?”

Hezekeli 39:10

Abasayiwudzinga kutsi bayewutfota tinkhuni etigangeni, nome batikabhe emahlatsini, ngobe bayawusebentisa letikhali ekubaseni umlilo. Bayawuphanga labo labebaphangile, babemuke timphahla labo lababebemuke timphahla tabo, kusho iNkhosi Simakadze.’ ”

Joweli 2:27

Niyawube seniyati kutsi ngika-Israyeli, nekutsi nginguSimakadze Nkulunkulu wenu, nekutsi futsi kute lomunye ngaphandle kwami. Sive sami singeke siphindze sihlazeke.”

Habakhuki 2:17

Lobudlova lobente kuyo iLebanoni buyawukwehlula, nekubhubhisa kwakho tilwane kuyawukwesabisa. Ngobe ucitse ingati yebantfu, wabhubhisa emave nemadolobha kanye nabo bonkhe labebahlala kuwo.

Habakhuki 2:8

Njengobe uphange tive letinyenti, letive letisele tiyawukuphanga nawe. Ngobe ucitse ingati yebantfu, wabhubhisa emave nemadolobha kanye nabo bonkhe labebahlala kuwo.

Zefaniya 2:9

Ngako-ke, kuphila kwami,” kusho Simakadze Somandla, longuNkulunkulu wema-Israyeli, “impela Mowabi uyawuba njengeSodoma, nema-Amoni abe njengeGomora, indzawo yelukhula nemigodzi yeluswayi, live lelilihlane phakadze naphakadze. Insali yesive sami iyawubaphanga; besive sami labayawusala bayawulidla live labo.”

Zefaniya 3:15

Simakadze usisusile sijeziso sakho, watincandzekisa netitsa takho. Simakadze, iNkhosi yaka-Israyeli, inawe; ungeke uphindze wesabe nome nguyiphi ingoti.

Zakhariya 2:11

“Tive letinyenti tiyawutihlanganisa naSimakadze ngalelo langa, tibe sive sami. Ngiyawuhlala emkhatsini wenu, nani niyawukwati-ke kutsi Simakadze longuSomandla ungitfume kini.

Zakhariya 2:8

Ngobe naku lokushiwo nguSimakadze longuSomandla, longitfumile wangipha emandla kutsi ngimelane netive letiniphangile, ngobe umuntfu lotsintsa nine utsintsa inhlavu yeliso laSimakadze.

Zakhariya 4:9

“Tandla taZerubhabheli tibeke sisekelo salelithempeli; netandla takhe futsi titalicedza. Nine-ke niyawube seniyati kutsi Simakadze longuSomandla ungitfume kini.

Zakhariya 6:15

“Labo labakhashane kakhulu bayakuta batewusita ngekwelekelela ekwakheni lithempeli laSimakadze; ngulapho-ke niyawukwati khona kutsi Simakadze longuSomandla ungitfumele kini. Loku kuyawukwenteka, nanimhlonipha nimlalela Simakadze longuNkulunkulu wenu.”

Zakhariya 9:15

Simakadze longuSomandla uyakubavikela bantfu bakhe. Bayawubhubhisa bancobe ngematje etilingi. Bayawunatsa ingati babhodle kube shangatsi ngungeliwayini; bayawucitsa ingati yetitsa tabo iphuphume njengesitja lesisetjentiswa ekunyenyeteni emakona aselatini.

Johane 13:19

Nginitjela loku nyalo kusengakenteki, kuze kutsi nase kwenteka nikholwe kutsi ‘Nginguye leNginguye.’

Johane 16:4

Kodvwa nginitjela loku kuze kutsi, nase kufika sikhatsi sekutsi bakwente, nikhumbule kutsi nganitjela ngako.” “Bengisengakanitjeli letintfo ekucaleni, ngobe bengisenani.