Umshumayeli 9:9 - Siswati 1996 Bible

⁹ Tijabulise ngekuphila nemfati wakho lomtsandzako, kuto tonkhe tinsuku letendlula ngekushesha, Nkulunkulu lakuphe tona lapha ngaphansi kwemtfunti welilanga. Ngobe phela loko sabelo sakho ekuphileni kwakho nasekukhandlekeni kwakho lapha ngaphansi kwemtfunti welilanga.

Umshumayeli 9:9 Referencias Cruzadas

Genesisi 26:8

Isaka wahlala sikhatsi lesidze kuleyo ndzawo. Ngalelinye lilanga Abimeleki, inkhosi yemaFilisti, yatsi ihlola ngelifasitelo, yabona Isaka anga Rebheka, umkakhe.

Tihlabelelo 144:4

Umuntfu ufanana nemoya nje; emalanga ekuphila kwakhe afanana nesitfunti lesendlulako.

Tihlabelelo 39:5

Imihla yami ingangemphama yesandla. Kuphila kwami kubukeka kulite kuwe. Impela, kuphila kwemuntfu kunjengenkhungu. Cabanga.

Taga 18:22

Lowo lotfola umfati utfole intfo lenhle, uzuze umusa kuSimakadze.

Taga 19:14

Indlu nemcebo lifa lelitfolakala kubatali, kodvwa umfati lohlakaniphile utfolakala kuSimakadze.

Umshumayeli 2:10

Konkhe emehlo ami labefisa kukubuka, ngangiwanika kona. Angizange ngitibambe ngisho nakukunye kutijabulisa. Ngatijabulisa ngawo wonkhe umsebenti wami; loku kwaba ngumvuzo wami ngawo wonkhe umsebenti wami.

Umshumayeli 2:24

Kute lokuncono umuntfu langakwenta ngaphandle kwekutsi adle anatse eneliseke ngemsebenti wakhe. Nako loku futsi ngikubona kuphuma esandleni saNkulunkulu,

Umshumayeli 3:13

Ngetulu kwaloko kutsi umuntfu adle anatse atijabulise ngayo yonkhe imishikashika yakhe kusipho saNkulunkulu.

Umshumayeli 3:22

Ngako ngase ngiyabona kutsi kute lokuncono kumuntfu ngaphandle kwekutsi atijabulise ngemsebenti wakhe lawentako, ngobe phela leso ngusona sabelo sakhe. Empeleni ngubani nje longamvusa kuze atewubona kutsi kutakwentekani nase afile?

Umshumayeli 5:18

Ngase ngiyabona kutsi kuhle kutsi umuntfu adle, anatse, atijabulise ngayo yonkhe imisebenti yakhe layentako lapha ngaphansi kwemtfunti welilanga, atijabulise ngawo onkhe lawo malangana Nkulunkulu lamuphe wona kutsi awaphile ngaphansi kwemtfunti welilanga, ngobe loko kusabelo sakhe,

Umshumayeli 6:12

Empeleni ngubani longahle ati kutsi yini lenhle lefanele umuntfu kulokuphila, nakulamalangana lambalwa nalalite lendlula kuwo njengesitfunti? Ngubani nje longatjela lomunye umuntfu kutsi kutakwentekani lapha ngaphansi kwemtfunti welilanga nangasekho?

Umshumayeli 7:15

Kulokuphila kwami lokulite ngikubone kokubili loku: Umuntfu lolungile ufela ekulungeni kwakhe, nemuntfu lomubi uphila sikhatsi lesidze ebubini bakhe.

Malakhi 2:15

Simakadze akabenti baba munye yini? Enyameni nasemoyeni bakhe. Bamunye leni? Ngobe abefuna bantfwana labesaba Nkulunkulu. Ngako tilindze wena emoyeni wakho, wetsembeke kumfati webusha bakho.