Tihlabelelo 79:1 - Siswati 1996 Bible

¹ Awu, Nkulunkulu! Bahedeni sebangene efeni lakho, bangcolisa lithempeli lakho lelingcwele, bagucula iJerusalema bayenta tindzala.

Tihlabelelo 79:1 Referencias Cruzadas

2 Emakhosi 24:13

Njengobe Simakadze abeshito, Nebukhadnezari watsatsa yonkhe ingcebo, wayisusa ethempelini laSimakadze nasesigodlweni senkhosi, watitsatsa tonkhe leto timphahla tegolide letatentiwe nguSolomoni, inkhosi yaka-Israyeli, latentela lithempeli laSimakadze.

2 Tikhronike 36:17

Simakadze wabavusela inkhosi yaseBhabhulona leyafike yabulala onkhe emajaha abo ngenkemba, iwabulalela endzaweni lengcwele, ingashiyi lutfo loluselusha labadvuna nalabasikati nome talukati nemakhehla. Nkulunkulu wabaniketela bonkhe kuNebukhadnezari.

2 Tikhronike 36:19

Bokhela lithempeli laNkulunkulu ngemlilo, babhidlita nalolubondza lwaseJerusalema base bashisa tigodlo tonkhe kanye netimphahla letatinelinani lelikhulu lapho.

Tihlabelelo 50:1

Nkulunkulu wabonkulunkulu unguSimakadze lokhulumako. Umemetela emhlabeni wonkhe, kusukela emphumalanga kuye enshonalanga.

Tihlabelelo 78:71

nasekunakekeleni timvukati nemazinyane ato, kutsi atekwelusa bakaJakobe, sive sakhe, yebo, baka-Israyeli labalifa lakhe.

Eksodusi 15:17

Uyawubangenisa ubahlanyele entsabeni yakho, indzawo leyakhetfwa nguwe, Simakadze, kutsi ibe likhaya lakho, indzawo lengcwele, Simakadze, lowayakha ngetandla takho.

Isaya 47:6

Ngangisitfukutselele sive sami, ngalilahla lifa lami, ngabanikela esandleni sakho, nawe awuzange ubahawukele ngemusa; ngisho nalasebagugile, wabagaca ngelijoko lelimatima.

Isaya 63:18

Kwaba sikhashana nje sive sakho saba tindlalifa tendzawo yakho lengcwele, kodvwa nyalo titsa tetfu setiyinyatsele phansi indlu yakho lengcwele.

Jeremiya 26:18

“Mikha waseMoreshethi waphrofetha ngetikhatsi taboHezekiya, inkhosi yakaJuda. Watjela bonkhe bantfu bakaJuda watsi: ‘Naku lokushiwo nguSimakadze longuSomandla, utsi: “ ‘ISiyoni iyawulinywa njengensimi. IJerusalema iyawuba yincumbi yencintsakalo, intsaba yelithempeli ibe yindvundvuma lehlume lihlatsi letinchachabutane.’

Jeremiya 39:8

BaseBhabhulona basilumeka ngemlilo sigodlo senkhosi kanye netindlu tebantfu; babhidlita netibondza taseJerusalema.

Jeremiya 51:51

“Sihlazekile, ngobe setfukiwe, lihlazo lisimbonye buso betfu, ngobe bantfu bekuhamba bangenile etindzaweni letingcwele tendlu yaSimakadze.”

Jeremiya 52:13

Walumeka umlilo ethempelini laSimakadze nasesigodlweni senkhosi, nakuto tonkhe tindlu taseJerusalema; tonkhe letatibalulekile watishisa.

Sililo 1:10

Sitsa sabeka tandla taso kuyo yonkhe imicebo yayo; iJerusalema yabona betive bangena ethempelini layo, labo lowabalela kutsi bangene ebandleni lakho.

Hezekeli 9:7

Wase utsi kubo: “Ngcolisani lelithempeli, nigcwalise tibuya talo ngetidvumbu talababulewe. Hambani!” Ngako baphuma-ke, bacala kubulala kulo lonkhe lidolobha.

Mikha 3:12

Ngako-ke ngenca yenu, iSiyoni iyawulinywa njengensimi, iJerusalema iyakuba yincumbi yencitsakalo, intsaba yelithempeli ibe lihlatsi.

Lukha 21:24

bayawubulawa ngenkemba, batsatfwe bentiwe babe titfunjwa etiveni tonkhe; nebetive bayakuyigcobagcoba iJerusalema, kuze kugcwaliseke sikhatsi sabo.”

Sembulo 11:2

Kodvwa ungasilinganisi sibuya lesingephandle kwalelithempeli, ngobe siniketwe betive labayakuwugcobagcoba lomuti longcwele tinyanga letingema-42.