Numeri 1:3 - Siswati 1996 Bible

³ kusukela kulasebaneminyaka lengema-20 kuya etulu, onkhe emadvodza aka-Israyeli lase angalungela kuya emphini, wena na-Aroni niyakuwabala ngeticheme tawo.

Numeri 1:3 Referencias Cruzadas

2 Samuweli 24:9

Jowabe wabikela inkhosi linani lemadvodza emphi labalwa: Ka-Israyeli abeti-800 000, imiswahla yodvwa yemadvodza leyayingabamba inkemba; kaJuda khona abeti-500 000.

1 Tikhronike 5:18

Sive sakaRubeni nesakaGadi kanye nencenye yesive sakaManase tatinemadvodza labeti-44 760, labengangenela umbutfo wemphi, imiswahla leyayihloma ngelihawu nangenkemba, ikwati nekusebentisa butjoki, ngobe yayivele iceceshelwe kulwa imphi.

2 Tikhronike 25:5

Amasiya wabita sonkhe sive sakaJuda, wasimisa njengekwetindlu taso, phansi kwetindvuna tetinkhulungwane netemakhulu kulo lonkhe lakaJuda nelakaBhenjamini. Wase ubala bonkhe lababeneminyaka lengema-20 nalengetulu, wakhandza kutsi babengemadvodza lati-300 000, emajaha labengalungela kulwa imphi, labengakhona kuhloma ngesikhali nangelihawu.

Eksodusi 12:17

LoMkhosi Wesinkhwa Lesingenambiliso niyawuhlala njalo niwenta, ngobe kungalo lelo langa lengakhipha ngalo tive tenu eGibhithe. Lelilanga niyawuligcina titukulwane ngetitukulwane. Kuyawuba nguwona msimeto wenu longeke uphele nome uguculwe.

Eksodusi 30:14

Wonkhe longenile kulolubalo losukela eminyakeni lengema-20 budzala kuye etulu kufanele awukhiphe lomnikelo waSimakadze.

Eksodusi 38:26

Ngulowo nalowo labengene elubalweni abekhipha sikalo lesisemtsetfweni, kusukela eminyakeni lengema-20 budzala kuye etulu: kwakungemadvodza lati-603 550 lebengenele lolubalo.

Numeri 14:29

Nitakufa, tidvumbu tenu tigcwale lonkhe lelihlane, nonkhe nine lenineminyaka lengema-20 kuya etulu nangenela lubalo, nangisola nekungisola.

Numeri 26:2

“Yentani lubalo lwaso sonkhe sive sema-Israyeli ngemindeni yaso, kusukela kulabaneminyaka lengema-20 budzala kuya etulu, bonkhe lasebangalungela kungenela imphi esiveni saka-Israyeli.”

Numeri 3:15

“Bala emaLevi, lusendvo ngelusendvo nangemindeni yawo. Bala bonkhe labadvuna kusukela kulabanenyanga budzala kuya etulu.”

Numeri 32:11

‘Njengobe bangazange bangilandzele ngenhlitiyo yonkhe, kute namunye wemadvodza, kusukela kulaneminyaka lengema-20 kuya etulu, laphuma eGibhithe layawulibona lelive lengaletsembisa ngekufunga ku-Abrahama, na-Isaka, naJakobe;

Numeri 33:1

Leti-ke tigaba teluhambo lwesive sema-Israyeli, nasiphuma eGibhithe ngetive taso ngaphansi kwesandla saboMosi na-Aroni.

Numeri 4:3

Bala onkhe emadvodza kusukela kulasaneminyaka lengema-30 kuya kulengema-50 budzala, labo lase bangena enkonzweni yekukhonta ethendeni lekuhlangana.

Dutheronomi 24:5

“Nangabe indvodza isandza kushada, akufanele ihanjiswe kuya emphini nome-ke yetfweswe lomunye umsebenti, nome ngumuphi. Kufanele ikhululeke ihlale ekhaya layo, kuze kuphele umnyaka wonkhe solo ijabulisa umfati wayo lesandza kumshada.

Dutheronomi 3:18

“Ngaso leso sikhatsi ngabe sengiyaniyala, ngatsi: ‘Simakadze Nkulunkulu wenu uniphe lelive kutsi nilidle. Nonkhe nine mabutfo emphi lenihlomele kulwa, hambani embikwetive tema-Israyeli, newelele ngesheya kwemfula.