Levithikusi 4:18 - Siswati 1996 Bible

¹⁸ Lenye ingati uyayibhoca etimphondvweni telilati lelisembikwaSimakadze ethendeni lekuhlangana. Incenye yalengati lesele uyayitsela esisekelweni selilati lemnikelo wekushiswa ekungeneni kwelithende lekuhlangana.

Levithikusi 4:18 Referencias Cruzadas

2 Tikhronike 29:22

Ngako bahlaba letinkunzi, kwase kutsi baphristi batsatsa lengati banyenyeta ngayo etikwelilati; emvakwaloko bahlaba letihhanca, base banyenyeta ngalengati yato etikwelilati; baphindze bahlaba lamazinyane etimvu, base banyenyeta ngalengati yawo etikwelilati.

Eksodusi 29:12

Ubotsatsa litsantana lalengati ngemuno ulibhoce etimphondvweni telilati; lengati lesele uyitsele esisekelweni selilati.

Eksodusi 30:10

Kanye ngemnyaka Aroni abenta inkonzo yekubuyisana kuSimakadze, ayentele etimphondvweni totine telilati; leyo nkonzo yekuhlawulela tono ngemnikelo wengati, iyakwentiwa njalo nje kanye ngemnyaka. Loko niyawukwenta titukulwane ngetitukulwane. Lelilati kufanele libe ngcwele lehlukaniselwe mine, Simakadze.”

Levithikusi 4:25

Umphristi uyakwenya umuno wakhe kulengati yalesilwane, bese uyibhoca etimphondvweni telilati leminikelo yekushiswa, lena lenye ingati ayitsele esisekelweni selilati.

Levithikusi 4:30

Umphristi uyakwenya umuno wakhe kulengati yalesilwane, bese uyibhoca etimphondvweni telilati lemihlatjelo yekushiswa, lena lenye ingati lesele ayitsele esisekelweni selilati.

Levithikusi 4:34

Umphristi uyakwenya umuno wakhe kulengati yalesilwane, bese uyibhoca etimphondvweni telilati lemnikelo wekushiswa, lena lenye ingati ayitsele esisekelweni selilati.

Levithikusi 4:7

Lenye ingati umphristi uyayibhoca etimphondvweni telilati lemphepho lenuka kamnandzi embikwaSimakadze ngekhatsi kwelithende lekuhlangana. Incenye yalengati uyayitsela emasekweni elilati lemnikelo wekushiswa lelisekungeneni kwelithende lekuhlangana.

Levithikusi 5:9

bese ufafata lengati yalo emhlubulweni welilati. Incenye yalengati kufanele iphomphiselwe esisekelweni selilati. Lona-ke ngumnikelo wesono.

Levithikusi 6:30

Kodvwa nangabe kuletfwa umnikelo wesono ethendeni lekuhlangana, ingati yawo letawuhlawulela sono endzaweni lengcwele, lowo mnikelo akukafaneli udliwe; kufanele ushiswe.’ ”

Levithikusi 8:15

Mosi wayihlaba lenkunzi, wase utsatsa lenye ingati yayo wenya umuno wakhe kuyo, wabhoca timphondvo telilati kutsi alihlambulule. Lena lenye ingati lesele wayitsela esisekelweni selilati, walingcwelisa ngekulentela inhlawulo yekubuyisana kuSimakadze.

Levithikusi 9:9

Emadvodzana akhe amletsela ingati, wenya umuno wakhe, wayifafata etimphondvweni telilati; lena lenye wayitsela esisekelweni selilati.