KumaHebheru 8:10 - Siswati 1996 Bible

¹⁰ “Ngulesi-ke sivumelwane lengiyawusenta nendlu yaka-Israyeli ngetikhatsi letitako,” isho iNkhosi, itsi: “Ngiyawufaka imisetfo yami etingcondvweni tabo, ngiyibhale etinhlitiyweni tabo, ngibe nguNkulunkulu wabo, bona babe sive sami.

KumaHebheru 8:10 Referencias Cruzadas

Eksodusi 24:4

Mosi wawabhala phansi onkhe emavi aSimakadze. Wavuka ekuseni ngeluvivi wakha lilati phansi kwentsaba, ngematje lali-12, labemele tive tema-Israyeli.

Eksodusi 24:7

Wase utsatsa incwadzi yesivumelwane, wayifundza, bonkhe bantfu balalela, bakhuluma batsi: “Konkhe lokushiwo nguSimakadze siyawukwenta sikulalele.”

Eksodusi 34:1

Simakadze wakhuluma kuMosi, watsi: “Bata tibhelekeca letimbili tematje letifanana naleta takucala. Ngitawubhala kuto wona lawo mavi labesetibhelekeceni tekucala lowatiphihlita.

Eksodusi 34:27

Simakadze wakhuluma kuMosi, watsi: “Wabhale lamavi, ngobe lesivumelwane lesengisente nawe nema-Israyeli sisime kulamavi.”

Ingoma Yetingoma 2:16

Longitsandzako wami ngedvwa; nami ngiwakhe yedvwa, udlisa umhlambi wakhe emkhatsini weminduze.

Jeremiya 24:7

Ngiyawubapha inhlitiyo yekwati mine kutsi mine nginguSimakadze. Bayawuba bantfu bami, mine ngibe nguNkulunkulu wabo, ngobe bayawuphendvukela kimi ngayo yonkhe inhlitiyo yabo.

Jeremiya 31:1

Simakadze utsi: “Ngaleso sikhatsi ngiyawuba nguNkulunkulu wato tonkhe tinsendvo taka-Israyeli, tona tiyawuba sive sami.”

Jeremiya 31:33

Simakadze utsi: “Ngulesi sivumelwane lengiyakusenta nendlu yaka-Israyeli emvakwaleso sikhatsi: Ngiyawufaka umtsetfo wami etingcondvweni tabo, ngiwubhale etinhlitiyweni tabo. Ngiyawuba nguNkulunkulu wabo, bona babe bantfu bami.

Jeremiya 32:38

Bayawuba bantfu bami, mine ngibe nguNkulunkulu wabo.

Jeremiya 32:40

Ngiyakwenta nabo sivumelwane saphakadze: Ngingeke ngiyekele kwenta lokuhle kubo, nabo ngibafake umoya wekungesaba, khona bangeyiwuphindze bahlubuke kimi.

Hezekeli 37:27

Indzawo yami yekuhlala iyawuba kubo; mine ngiyawuba nguNkulunkulu wabo, bona babe bantfu bami.

Hezekeli 39:22

Kusukela ngalelo langa kuye embili indlu yaka-Israyeli iyawungati kutsi mine nginguSimakadze Nkulunkulu wayo.

Hoseya 1:10

“Noko ema-Israyeli ayawuba manyenti ngangesihlabatsi saselugwini lwelwandle, lesingeke sikalwe nome sibalwe. Endzaweni lapho kwakukhulunywa khona kubo kwatsiwa: ‘Nine anisiso sive sami,’ bayawubitwa ngekutsi: ‘Ngemadvodzana aNkulunkulu lophilako.’

Hoseya 2:23

Ngiyakutihlanyelela yena eveni; ngiyakulubonakalisa lutsandvo lwami kulowo lebengimbita ngekutsi: ‘Akusiye lotsandzekako wami.’ Ngiyawukhuluma kulabo lekwakutsiwa: ‘Abasiso sive sami,’ ngitsi: ‘Nine nisive sami,’ nabo bayawutsi: ‘Wena unguNkulunkulu wetfu.’ ”

Zakhariya 13:9

Lencenye yesitsatfu ngiyakuyimikisa emlilweni, ngibacenge njengesiliva, ngibahlolisise njengegolide. Bayakulibita Libito lami, bese mine ngiyabaphendvula; ngiyawutsi: ‘Bona babantfu bami;’ nabo batsi: ‘Simakadze nguNkulunkulu wetfu.’ ”

Zakhariya 8:8

Ngiyawubabuyisa batewuhlala eJerusalema; bayawuba bantfu bami, nami ngibe nguNkulunkulu wabo ngekwetsembeka nangekulunga.”

Matewu 22:32

‘Mine nginguNkulunkulu wa-Abrahama, naNkulunkulu wa-Isaka, naNkulunkulu waJakobe’? Akasiye Nkulunkulu walabafile, kodvwa walabaphilako.”

KubaseRoma 11:27

Lesi sivumelwane sami nabo, nangisusa tono tabo.”

1 kubaseKorinthe 6:16

Anati yini kutsi lotihlanganisa nengwadla uba mtimba munye nayo? Ngobe kubhaliwe kutsi: “Labo bobabili sebayawuba nyamanye.”

2 kubaseKorinthe 3:3

Kuyakhanya kutsi niyincwadzi yaKhristu leletfwe ngitsi, lengakabhalwa ngenki, kepha ngaMoya Longcwele, waNkulunkulu lophilako, hhayi etibhelekeceni tematje kepha etinhlitiyweni tebantfu.

Dutheronomi 30:6

Simakadze Nkulunkulu wenu uyawusoka tinhlitiyo tenu netinhlitiyo tetitukulwane tenu, kuze nitsandze yena ngayo yonkhe inhlitiyo yenu, nangawo wonkhe umphefumulo wenu, niphile.

kuThithusi 2:14

Yena watinikela ngenca yetfu, kuze atesihlenga ebubini bonkhe atingcwelisele sive lesisakhe, lesinenshisekelo kutsi sente imisebenti lemihle.

KumaHebheru 11:16

Esikhundleni saloko, babelangatelela live lelincono, lokusho kutsi: lizulu. Ngako-ke Nkulunkulu akanamahloni kutibita ngekutsi nguNkulunkulu wabo, ngobe ubalungiselele lelo khaya.

YaJakobe 1:18

Ngekwentsandvo yakhe wasitala ngelivi leliciniso, khona sitekuba ngematubulo ato tonkhe tidalwa takhe.

YaJakobe 1:21

Ngako-ke lahlani yonkhe insila nalokubi lose kukunyenti, nemukele ngekutitfoba livi lelihlanyelwe kini, ngobe linemandla ekusindzisa imiphefumulo yenu.

1 yaPhetro 1:23

Phela senitelwe kabusha ngelivi laNkulunkulu lelingabhubhi, kodvwa leliphila phakadze naphakadze.

1 yaPhetro 2:9

Kodvwa nine nibeluhlanga lolukhetsiwe, nibaphristi bebukhosi, sive lesingcwele; nibantfu baNkulunkulu labakhetselwe kumemetela imisebenti lemihle yaNkulunkulu. Nguye lowanibita kutsi niphume ebumnyameni nitewungena ekukhanyeni kwakhe lokumangalisako.