Kubase-Efesu 6:18 - Siswati 1996 Bible

¹⁸ Khulekani ngaso sonkhe sikhatsi nikuMoya ngekukhuleka konkhe nekuncenga. Nilindzele ngesineke sonkhe, nangekuncusela labangcwele bonkhe.

Kubase-Efesu 6:18 Referencias Cruzadas

1 Emakhosi 8:52

“Shangatsi emehlo akho angavulekela ekuncuseni kwenceku yakho, nasekuncuseni kwesive sakho, ema-Israyeli, mane ubalalele, nabakhala kuwe nome ngusiphi sikhatsi.

1 Emakhosi 8:54

Kwatsi kube Solomoni acedze kwenta yonkhe lemithandazo nekuncusa kuSimakadze, wabe sewuyasukuma embikwelilati laSimakadze, lapho abekadze aguce khona, tandla takhe atiphakamisele ezulwini.

1 Emakhosi 8:59

Shangatsi lamavi ami, lengiwathandaze lapha embikwaSimakadze, angaba sedvutane naSimakadze Nkulunkulu wetfu, emini nasebusuku, kuze asimise indlela yenceku yakhe, nendlela yesive sakhe, ema-Israyeli, njengekwemalanga onkhe,

1 Emakhosi 9:3

Simakadze wakhuluma kuye, watsi: “Ngiwuvile umthandazo wakho nekuncenga kwakho lokwente kimi; lelithempeli lolakhile sengilingcwelisile, ngekutsi ngibeke Libito lami lapho kulo phakadze naphakadze. Emehlo ami nenhlitiyo yami kuyawuhlala kulapho kulo ngaso sonkhe sikhatsi.

Esta 4:8

Wanika Hathaki ikhophi yalesimemetelo sasebukhosini lesasikhiswe lapha eSusa; sasichaza kutsi onkhe emaJuda kufanele abulawe. Modekhayi wamtjela kutsi ayinike Esta, achaze konkhe kuye, abese Esta uya enkhosini kuyekuyincenga kutsi ifane ibe nebubele kulesive sakubo.

Jobe 27:10

Uyawutijabulisa yini ngaSomandla? Uyawulibita ngaso sonkhe sikhatsi yini libito laNkulunkulu?

Tihlabelelo 4:1

Ngiphendvule nangikhala kuwe, wena Nkulunkulu ukulunga kwami. Ekucindzetelweni kwami uyangikhulula; ngihawukele, ukwemukele kuncenga kwami.

Tihlabelelo 6:9

Simakadze sewukuvile kuncusa kwami. Simakadze sewukwemukele kukhuleka kwami.

Isaya 26:16

Simakadze, beta kuwe ekudzabukeni kwabo, ngesikhatsi ubajezisa babehluleka ngisho nekuhebeta umkhuleko.

Danyela 6:10

Watsi kube Danyela eve kutsi sekubhalwe lomtsetfosimemetelo, wahamba waya ekhaya lakhe ekamelweni lelisetulu, lapho emafasitelo akhona abevulekela ngaseJerusalema. Abeguca ngemadvolo katsatfu ngelilanga, athandaze, abonga Nkulunkulu wakhe, njengobe abevame kwenta ngaphambili.

Danyela 9:20

Ngatsi ngisakhuluma ngithandaza, ngivuma tono tami netono tesive sema-Israyeli akitsi, ngiletsa kuncusa kwami kuSimakadze Nkulunkulu wami ngentsaba yakhe lengcwele,

Hoseya 12:4

Walwa nengilosi, wayehlula. Wakhala ancenga sibusiso sakhe, wakhandzana naye eBetheli, wakhuluma naye khona lapho,

Zakhariya 12:10

“Ngiyawutfululela etikwendlu yakaDavide nasetikwabo bonkhe labahlala eJerusalema Moya wemusa newekuncusa. Bayakumbuka lowo lebamgwaza, bese bayamlilela njenganakulilelwa umntfwana lotelwe waba yedvwa kabo, bamdzabukele kakhulu, njengemuntfu nakadzabukela indvodzana yematubulo.

Matewu 17:21

Kepha loluhlobo aluphumi ngaphandle kwekukhuleka nekuzila.]”

Matewu 26:41

Lindzani, nithandaze, kuze ningetikungena ekulingweni! Umoya uyavuma, kodvwa inyama ibutsakatsaka.”

Makho 13:33

Caphelani nilindze, ngobe anati kutsi leso sikhatsi siyawufika nini.

Makho 14:38

Lindzani nikhuleke kuze ningangeni ekulingweni. Umoya uyavuma, kodvwa inyama ibutsakatsaka.”

Lukha 21:36

Lindzani nithandaze onkhe emalanga, khona nitawuba nemandla ekuphunyula kuletintfo letitakwenteka nitekwati kuma embikweNdvodzana yeMuntfu.”

Lukha 22:46

Watsi kubo: “Nilaleleni? Vukani nithandaze kuze ningangeni ekulingweni.”

Lukha 3:26

umsa waMahathi, umsa waMathathiyase, umsa waSemeyini, umsa waJoseki, umsa waJoda,

Lukha 3:37

umsa waMethusala, umsa wa-Enoki, umsa waJarede, umsa waMahalaleli, umsa waKhenani,

Imisebenti yebaPhostoli 1:14

Bonkhe laba bacinisela njalo nganhlitiyo yinye ekukhulekeni nasekuncuseni kunye, kanye nebafati naMariya, unina waJesu, nabomnakaboJesu.

Imisebenti yebaPhostoli 10:2

Abekholwa, amesaba Nkulunkulu yena nendlu yakhe abesita labanyenti labamphofu bemaJuda, ahlala emkhulekweni ngaso sonkhe sikhatsi.

Imisebenti yebaPhostoli 12:5

Ngako-ke Phetro walondvolotwa ejele, kodvwa libandla belithandaza limncusela kuNkulunkulu.

Imisebenti yebaPhostoli 6:4

Tsine-ke, sitakutinika sikhatsi lesenele emthandazweni nasemsebentini wekushumayela livi.”

KubaseRoma 12:12

Tfokotani etsembeni, nibeketele elusizini, nicinisele njalo emthandazweni.

KubaseRoma 8:15

Ngobe anemukelanga umoya webugcili wekutsi nibuye nesabe, kodvwa nemukela Moya losenta emadvodzana, sikhulume ngaye kuNkulunkulu sitsi: “Babe! Babe wami!”

KubaseGalathiya 4:6

Njengobe ningemadvodzana akhe nje, Nkulunkulu usitfumelele Moya weNdvodzana yakhe etinhlitiyweni tetfu lobubula atsi: “Babe, Babe wami.”

Kubase-Efesu 1:16

ngibonga ngingakhawuli ngani, nginikhumbula njalo nje emikhulekweni yami.

Kubase-Efesu 2:22

Nani futsi nakhiwa kulo, kuze nibe yindlu yekuhlala Nkulunkulu ngaMoya.

Kubase-Efesu 3:18

nibe nemandla ekucondzisisa kanye nalabangcwele bonkhe lokububanti, nebudze, nekuphakama, nekujula kwelutsandvo lwaKhristu,

Kubase-Efesu 3:8

Mine, nome ngingulomncane kunabo bonkhe labangcwele, ngaphiwa lowo musa wekushumayela kubetive liVangeli lemcebo waKhristu longenawuphenyeka.

Kubase-Efesu 6:19

Ningithandazele nami, khona ngitewuphiwa livi, ngitsi nangivula umlomo wami ngiyishumayele ngaso sonkhe sibindzi imfihlakalo yeliVangeli.

KubaseFiliphi 1:4

Ngetikhatsi tonkhe, ekuncuseni kwami, nginithandazela nonkhe ngekutfokota.

KubaseFiliphi 4:6

Ningakhatsateki ngalutfo. Kepha kuko konkhe ticelo tenu atatiwe nguNkulunkulu, ngekukhuleka nekuncusa kanye nekubonga.

KubaseKholose 1:3

Sihlale simbonga njalo nje Nkulunkulu uYise weNkhosi yetfu Jesu Khristu ngesikhatsi sinikhulekela,

KubaseKholose 1:4

ngobe sivile ngekukholwa kwenu nguKhristu Jesu kanye nangelutsandvo leninalo kubo bonkhe labangcwele.

KubaseKholose 4:2

Ciniselani ekuthandazeni, nilindze kuko ngekubonga.

1 kubaseThesalonika 5:17

Thandazani ningayekeli.

1 kuThimothi 2:1

Ngako-ke kwekucala ngiyala kutsi kukhuleka, nemithandazo, nekuncusa, nekubonga, akwentelwe bonkhe bantfu.

2 kuThimothi 1:3

Ngibonga Nkulunkulu lengimkhonta nganembeza lomhlophe, njengobe nabokhokho bami babenta. Emikhulekweni yami nangimbonga Nkulunkulu, ngikukhumbula imini nebusuku ngingakhawuli.

kuFilemoni 1:5

ngobe sengivile ngelutsandvo lwakho kubantfu baNkulunkulu, ngeva nangekukholwa kwakho lonako eNkhosini Jesu.

KumaHebheru 5:7

Asesemhlabeni, Jesu wanikela ngekuthandaza, nangekuncusa, nangekukhala lokukhulu, nangetinyembeti, akhala kulowo lonemandla ekumsindzisa ekufeni, wevakala ngenca yekumesaba Nkulunkulu.

1 yaPhetro 4:7

Siphetfo sato tonkhe tintfo sesisondzele. Ngako-ke tibambeni, nititsibe khona nitekwati kukhuleka.

YaJuda 1:20

Kodvwa nine, bazalwane bami, yakhanani ekukholweni lokungcwele, nikhuleke ngaMoya Longcwele.

1 Samuweli 1:12

Asachubeka, athandaza kuSimakadze, Eli wawunaka umlomo wakhe.