Jeremiya 9:11 - Siswati 1996 Bible

¹¹ “IJerusalema ngitayenta indvundvuma yematje, ngiyente umgedze wetimphungutja. Emadolobha akaJuda ngiyakuwenta abe tindzala, kuze kubete muntfu lohlala kuwo.”

Jeremiya 9:11 Referencias Cruzadas

Nehemiya 4:2

akhuluma embikwebangani bakhe nasembikwemabutfo aseSamariya, watsi: “Tentani letiyatsayatsa temaJuda? Tingaluvusa yini lolubondza lwato? Tiyawunikela yini ngemihlatjelo? Tingalucedza yini ngalanga linye? Lamatje lashile aba ngumlotsa tingawavusa yini aze abe yintfo lephilako?”

Tihlabelelo 107:43

Lohlakaniphile akacaphele letintfo, bantfu abayicondzisise imisebenti yemusa waSimakadze.

Tihlabelelo 44:19

noko usipitjitele ehlane letimpungutja, wasembesa ngelitfunti lekufa.

Tihlabelelo 79:1

Awu, Nkulunkulu! Bahedeni sebangene efeni lakho, bangcolisa lithempeli lakho lelingcwele, bagucula iJerusalema bayenta tindzala.

Isaya 13:22

Timphisi tiyawushaya umkhulungwane kuleto tinqaba tayo, kanjalo netimphungutja etigodlweni tayo. Sikhatsi sayo sesisondzele, nemalanga ayo angeke andziswe.”

Isaya 25:2

Lidolobha ulente laba yindvundvuma yemfuhlululu, yebo, lidolobha lelibiyelwe laba tindzala; siphephelo sebetive sangabe sisaba ngilo lidolobha, lingeke liphindze lakhiwe kabusha.

Isaya 34:13

Emanyeva ayakwehlula tigodlo talo, emanyeva netinchachabutane kunyatsele tinqaba talo. Kuyawuba yindzawo yekujangaza timphungutja, nelikhaya letahhukulu.

Isaya 44:26

Ngimi lofeza emavi etinceku takhe, aphumelelise tiphrofetho tetitfunywa takhe, lotsi ngeJerusalema: ‘Itawuhlalwa bantfu,’ nangemadolobha akaJuda atsi: ‘Atakwakhiwa,’ nangetindzala tawo atsi: ‘Ngitativusetela.’

Jeremiya 1:15

Sekusedvutane kutsi ngibite tonkhe tive temibuso yangasenyakatfo,” kusho Simakadze. “Emakhosi ato ayakuta, atewumisa tihlalo tawo tebukhosi ekungeneni kwemasango aseJerusalema. Ayakuta ahlasele lonkhe lubondza loluyitungeletile kanye nawo onkhe emadolobha akaJuda.

Jeremiya 10:22

Lalelani! Livi lembiko liyasondzela, siphitsiphitsi lesikhulu, lesivela eveni langasenyakatfo! Utakwenta emadolobha akaJuda asale akhala libhungane, angumgedze wetimphungutja.

Jeremiya 16:10

“Nawubatjela tonkhe letintfo labantfu bese bayakubuta batsi: ‘Simakadze uwukhipheleni lomtsetfo lomelana natsi kangaka wesehlakalo lesikhulu kangaka? Soneni? Sono sini lesisentile kuSimakadze Nkulunkulu wetfu?’

Jeremiya 25:11

Lonkhe live liyawusala lilihlane lelikhala libhungane, naletive tiyawukhonta inkhosi yaseBhabhulona iminyaka lengema-70.

Jeremiya 25:18

IJerusalema nemadolobha akaJuda, emakhosi netindvuna tawo, kubenta kutsi babe yincitsakalo, nentfo yekwesabisa neyekuhlekisa, nesicalekiso, njengobe banjalo nalamuhla;

Jeremiya 26:18

“Mikha waseMoreshethi waphrofetha ngetikhatsi taboHezekiya, inkhosi yakaJuda. Watjela bonkhe bantfu bakaJuda watsi: ‘Naku lokushiwo nguSimakadze longuSomandla, utsi: “ ‘ISiyoni iyawulinywa njengensimi. IJerusalema iyawuba yincumbi yencintsakalo, intsaba yelithempeli ibe yindvundvuma lehlume lihlatsi letinchachabutane.’

Jeremiya 26:9

Uphrofethelani egameni laSimakadze kutsi lelithempeli litawufanana neShilo, nalelidolobha litawusala selikhala libhungane, kungasahlali muntfu kulo?” Bonkhe bantfu babunganyela Jeremiya bamkaka ekhatsi endlini yaSimakadze.

Jeremiya 34:22

Simakadze utsi: Ngiyawukhipha umlayeto ngibabuyise kulelidolobha. Bayakulwa nalo, balitfumbe bese bayalishisa. Emadolobha akaJuda ngiyakuwenta abe tindzala, kuze kusale kukhala libhungane kuwo.”

Jeremiya 4:27

Naku lokushiwo nguSimakadze, utsi: “Live lonkhe litawuphundleka, noko ngingeke ngilibhubhise liphele nya.

Jeremiya 44:2

“Naku lokushiwo nguSimakadze longuSomandla, Nkulunkulu wema-Israyeli, utsi: Nayibona lenhlekelele lenkhulu lengayehlisela etikweJerusalema nasetikwawo onkhe emadolobha akaJuda. Lamuhla asahleti atindzala, kute muntfu lohlala kuwo,

Jeremiya 49:33

“IHasori kuyawuba yindzawo lehlushwa timphungutja, indzawo leyawusala ikhala libhungane kuze kube nguphakadze. Kute muntfu loseyawubuye ahlale kuyo, yebo, kute loyawukwakha kuyo.”

Jeremiya 50:3

Sive lesichamuka enyakatfo siyawuyihlasela, live layo silishiye lingenalutfo. Kute muntfu loyawuhlala kulo, bantfu netilwane kuyawulibalekela.”

Jeremiya 51:37

IBhabhulona iyawuba yindvundvuma yematje, kube ngumgedze wetimphungutja, sesabiso nentfo yekuphukutwa, yebo, indzawo lengahlalwa ngumuntfu.

Jeremiya 8:22

Sekute yini ibhalisamu kulakaGileyadi? Sekute yini inyanga lapho? Kepha sekute leni kuphiliswa kwemanceba ebantfu bami?

Sililo 1:4

Imigwaco leya eSiyoni iyalila, ngobe sekwabate namunye lota emikhosini yayo lemisiwe. Onkhe emasango ayo asasala anesitunge, baphristi bayo bayabubula, emantfombatana ayo ayadzabuka, isebuhlungwini lobumatima kakhulu.

Sililo 2:2

Simakadze ushwabudzele onkhe emakhaya akaJakobe, ngaphandle kwekuwahawukela. Ngelulaka lwakhe udladlabule tinqaba teNdvodzakati yakaJuda. Uwehlisele phansi emhlabatsini ngelihlazo umbuso wayo kanye netikhulu tayo.

Sililo 3:47

Sehlelwe kwesaba neluvalo, nemigodzi, kubhujiswa, nekucitfwa.”

Levithikusi 26:32

Live lenu ngiyawuliphundla, kuze kutsi netitsa tenu letingena kulo timangale ngalo.

Mikha 1:6

Ngako Simakadze utsi: “ISamariya ngitayenta ibe tindzala tesikhotsa, kube yindzawo yekuhlanyela umvini. Tindlu letitindzala ngiyakutitfulula tigeletele etigodzini, kutsi tisekelo telidolobha ngitihlubule tibesebaleni.

Mikha 3:12

Ngako-ke ngenca yenu, iSiyoni iyawulinywa njengensimi, iJerusalema iyakuba yincumbi yencitsakalo, intsaba yelithempeli ibe lihlatsi.

Mikha 6:16

Loko kuyakwenteka, ngobe nilandzele imikhuba lemibi yenkhosi Omri nendvodzana yakhe Ahabi. Nichubeke nalandzela imitsetfo yabo, ngaloko-ke ngiyawunibhubhisa; bonkhe bantfu bayawunibukela phansi. Bantfu yonkhe indzawo bayawunedzelela ngendzelelo.”

Dutheronomi 29:23

Live lonkhe liyawuba luswayi lolungenamsebenti lolubhadlako nesibabule. Kute lokuyawuhlanyelwa, kute lokuyawumila, kute nakunye lokuluhlata lokuyawuhluma kulelo live. Kuyawufanana nekubhujiswa kweGomora neSodoma, i-Adma neSeboyimu, Simakadze lakubhubhisa ngalolulaka lolwesabekako.

Sembulo 18:2

Yamemeta ngelivi lelikhulu yatsi: “Iwile, yebo, iwile iBhabhulona lenkhulu! Seyigucuke yaba likhaya lemadimoni, nesihhehle sekubhaca bonkhe bomoya lababi, nesato tonkhe tinyoni letingcolile naletenyanyekako.