Jeremiya 7:30 - Siswati 1996 Bible

³⁰ “ ‘Sive sakaJuda sente bubi emehlweni ami, kusho Simakadze. Bagcumeke tithico tabo letitinengiso endlini lebitwa ngeLibito lami, bayingcolisa.

Jeremiya 7:30 Referencias Cruzadas

2 Emakhosi 21:3

Wavusa kabusha tindzawo letiphakeme tekukhontela tithico, letatibhidlitwe nguyise Hezekiya. Waphindze wakha emalati aBhali, wakha nensika ya-Ashera, njengobe na-Ahabi, inkhosi yaka-Israyeli, abentile. Wakhotsama wakhonta tonkhe tinkhanyeti tesibhakabhaka.

2 Emakhosi 21:4

Wakha emalati ekhatsi ethempelini laSimakadze, Simakadze labekhulume ngalo watsi: “Libito lami ngiyakulibeka eJerusalema.”

2 Emakhosi 21:7

Watsatsa insika ya-Ashera labeyentile wayibeka ethempelini, lelo Simakadze labekhulume ngalo kuDavide nakuSolomoni, umsa wakhe, watsi: “Kulelithempeli naseJerusalema lengiyikhetse emkhatsini wato tonkhe tive tema-Israyeli, ngitawubeka Libito lami kuyo phakadze naphakadze.

2 Emakhosi 23:12

Wawabhidlita onkhe lamalati labekakhiwe ngemakhosi akaJuda etulu eluphahleni eceleni kwelikamelo la-Ahazi lelisesitezi; wabhidlita nalamalati Manase labewakhe kuletibuya letimbili ethempelini laSimakadze. Wawesusa lapho, wawabhidlita, aba timvitsi letakhukhulelwa emfudlaneni iKhidroni.

2 Tikhronike 33:15

Watisusa tonkhe tithico tebetive, wesusa nalesitfombe labesibeke ethempelini laSimakadze, kanye nawo onkhe lamalati labesawakhe entsabeni yelithempeli naseJerusalema; konkhe wakulahlela ngaphandle kwelidolobha.

2 Tikhronike 33:3

Wavusa kabusha tindzawo letiphakeme tekukhontela tithico, letatibhidlitwe nguyise Hezekiya, waphindze wakha emalati aBhali, wamisa netinsika ta-Ashera. Wakhotsama wakhonta tonkhe tinkhanyeti tesibhakabhaka.

2 Tikhronike 33:7

Watsatsa lesithico labesasibatile wasingenisa ethempelini laNkulunkulu, lelo Nkulunkulu labekhulume ngalo kuDavide nakuSolomoni, umsa wakhe, watsi: “Kulelithempeli naseJerusalema lengiyikhetse emkhatsini wato tonkhe tive tema-Israyeli ngitawubeka Libito lami kuyo phakadze naphakadze.

Isaya 66:4

Ngako-ke nami ngiyawukhetsa kubaphatsa ngesandla lesicinile, ngehlisele etikwabo loko labakwesabako. Ngobe ngatsi nangimemeta, kwabate losabelako; ngatsi nangikhuluma, kwabate lolalelako. Benta lokubi emehlweni ami, bakhetsa loko lokungangijabulisi.”

Jeremiya 16:18

Ngitabaphindzisela ngalokuphindziwe ngenca yetono tabo nangebubi babo, ngobe balingcolisile live lami ngetinhlobonhlobo tetitfombe tabo letingenamphefumulo, bagcwalisa lifa lami ngetithico tabo letinengekako.”

Jeremiya 23:11

“Umphrofethi kanye nemphristi, bobabili, abakholwa kuNkulunkulu, ngisho nasethempelini ngitfola bubi babo,” kusho Simakadze.

Jeremiya 32:34

Bemisa tithico tabo letinengekako endlini leneLibito lami bayingcolisa.

Jeremiya 32:35

Bakhela Bhali tindzawo letiphakeme eSigodzini sakaBheni Hinomu bentela kutsi bente umhlatjelo ngemadvodzana nemadvodzakati abo kuMoloki, noko angizange sengibayale kutsi bakwente, futsi bengingazange sengikucabange nasengcondvweni yami kutsi bangayenta intfo lesinengiso kangaka ngaloko bonise sive sakaJuda.”

Hezekeli 7:20

Babetigabatisa ngetimvunulo tabo nangekwekugaba kwabo lokuhle lababekusebentisa ekubumbeni kwabo letithico tabo letisinengiso, netitfombe letingenamsebenti. Ngako-ke ngiyawutigucula ngitente tingcole tingabi namsebenti.

Hezekeli 8:3

Welula loko lokwakungatsi kusandla, wangibamba ngesihlutfu. Moya wangiphakamisela emkhatsini wemhlaba nelizulu: Wangitsatsa embonweni waNkulunkulu, wangitsatsa saya eJerusalema, ekungeneni kwelisango langasenyakatfo lesibuya lesisekhatsi nekhatsi, lapho kwakume khona lesithico lesibanga intfukutselo lenkhulu.

Danyela 11:31

“Emabutfo ayo lahlomile ayawuvuka angcolise inqaba yelithempeli, acedze imihlatjelo yemalanga onkhe. Bese-ke emisa sinengiso lesingusona sibanga incitsakalo.

Danyela 9:27

Lombusi uyawuvumela sivumelwane nalabanyenti ngesikhatsi sinye, kodvwa ekhatsi naleso sikhatsi uyawucedza umhlatjelo nemnikelo. Uyawubeka sinengisoncitsakalo esicongweni selithempeli, kuze sitfululelwe kuye siphetfo lesimisiwe.”