Jeremiya 50:2 - Siswati 1996 Bible

² “Memetelani nikhulume emkhatsini webetive, phakamisani siboniso semphi, nimemetele, ningafihli lutfo, kodvwa tsanini: ‘IBhabhulona itawutfunjwa, Bheli utawuhlazeka, Maduki yena agcwale kwesaba. Titfombe tayo tiyawuhlazeka netithico tayo tigcwale kwesaba.’

Jeremiya 50:2 Referencias Cruzadas

Tihlabelelo 64:9

Bonkhe bantfu bayawushaywa luvalo bashumayele ngalokwentiwe nguNkulunkulu, bakucondze kahle lasakwentile.

Tihlabelelo 96:3

Vakalisani bukhosi bakhe etiveni, nitjele tonkhe tive ngetimanga takhe.

Tihlabelelo 97:7

Bayahlazeka badliwe ngemahloni bonkhe labakhonta tithico, bachoshe ngetithico letingenamsebenti. Bonkhe bonkulunkulu bakhotsama kuSimakadze.

Isaya 12:4

Ngalelo langa niyawutsi: “Bongani Simakadze, nibite Libito lakhe; yatisani tive ngaloko lakwentile, nimemetele kutsi Libito lakhe liphakeme.

Isaya 13:2

“Phakamisani siboniso semphi, nisiphakamisele esicongweni sentsaba. Memetani kakhulu, nibakhwebe, khona batewuncandzeka babuye, bangene emasangweni alabaphakeme.

Isaya 21:9

Asubuke nje, naku kuta umuntfu ugibele incola yakhe yemphi, lenemahhashi laboshelwe ngamabili. Lomuntfu waphendvula watsi: ‘IBhabhulona seyiwile, iwile! Tonkhe titfombe tetithico tayo setibhidlikele phansi emhlabatsini!’ ”

Isaya 37:19

Bajikijele bonkulunkulu bato emlilweni, bababhubhisa, ngobe bebangesibo bonkulunkulu sibili, bekutingodvo nje nematje labatwe tandla tebantfu.

Isaya 39:1

Ngaleso sikhatsi Merodaki Baladani, umsa waBaladani, inkhosi yaseBhabhulona, watfumela Hezekiya tincwadzi nesipho, njengobe abebikelwe ngekugula nangekuphiliswa kwakhe.

Isaya 46:1

Beli uyaguca, Nebo uyakhotsama. Titfombe tabo tetfwelwe tilwane tekwetfwala. Letitfombe tabo lababetetfwala setiyasindza, tingumtfwalo kuletilwane letidziniwe.

Isaya 48:20

Sukani lapha eBhabhulona. Wabalekeleni emaBhabhulona. Kumemeteleni loku ngenjabulo lenkhulu, nikubabate, kutfumeleni emikhawulweni yemhlaba, nitsi: “Simakadze umhlengile Jakobe, inceku yakhe.”

Isaya 48:6

Nitivile tonkhe-ke letintfo, tibukeni tonkhe. Ningete nativuma yini? “Kusukela nyalo sengitabonitjela tintfo letinsha, tintfo letifihlakele kini, leningatati,

Jeremiya 10:11

“Batjele naku: ‘Labonkulunkulu labangazange sebalibumbe lizulu nemhlaba, batawubhubha baphele emhlabeni, ngisho nangaphansi kwemazulu.’ ”

Jeremiya 10:15

Atinamsebenti walutfo, tintfo nje tekuhlekisa, kuyawutsi nakufika kwehlulelwa kwato, tibhubhe.

Jeremiya 31:10

“Vanini livi laSimakadze, nine tive; limemeteleni etichingini letikhashane, nitsi: ‘Lowo lowasakata Israyeli uyawumbutsa futsi, uyakwelusa umhlambi wakhe njengemelusi.’

Jeremiya 4:16

“Khulumani loku etiveni, nikumemetele eJerusalema, nitsi: ‘Imphi letewuvimbetela iphuma eveni lelikhashane, isuse umsindvo wekuhlaba inyandzaleyo, kutsi kuhlaselwe emadolobha akaJuda.

Jeremiya 4:6

Hlabani inyandzaleyo kuyiwe eSiyoni! Balekani nitewusindza, ningephutisi. Ngobe ngiletsa inhlekelele lechamuka ngasenyakatfo, yebo, imbhubhiso leyesabekako.”

Jeremiya 46:14

“Memetelani loku eGibhithe, nikwatise futsi naseMigdoli; kumemeteleni futsi naseMemfisi kanye naseThaphanesi, nitsi: ‘Manini ngetigaba tenu nilungele, ngobe inkemba iyawudla labo labanitungeletile.’

Jeremiya 50:46

Umhlaba uyawutfutfumela ngemsindvo wekutfunjwa kweBhabhulona; kukhala kwayo kuyawuhokoma emkhatsini wetive.

Jeremiya 51:12

Phakamisani siboniso semphi, ngasetibondzeni taseBhabhulona! Cinisani bogadzi, nimise kahle balindzi, kulalela titsa endleleni! Simakadze utayiphumelelisa injongo yakhe, utakukwenta loko labekukhuluma kubantfu baseBhabhulona.

Jeremiya 51:27

“Phakamisani emhlabeni siboniso semphi! Shayani impalampala emkhatsini wetive! Lungisani tive, nitilungiselele kulwa neBhabhulona. Butsani lemibuso, niyisukele niyihlasele: nibite i-Ararathi, neMini kanye ne-Ashkenazi. Bekani indvuna yemphi, nimelane neBhabhulona. Tfumelani emahhashi lanjengemabulo esikhonyane.

Jeremiya 51:31

Sigijimi lesinye silandzela lesinye, nesitfunywa silandzela lesinye sitfunywa kuyawubikela inkhosi yaseBhabhulona kutsi lonkhe lidolobha layo selitfunjiwe.

Jeremiya 51:44

Ngiyakumjezisa Bheli eBhabhulona, ngimente akuhlantele phansi konkhe loko lakumitile. Tive atisayikubekelela tiye kuye, nelubondza lwaseBhabhulona luyakuwa.

Jeremiya 51:47

Ngobe ngempela sikhatsi siyawufika, lapho ngiyawujezisa khona tithico taseBhabhulona. Live layo lonkhe liyawuhlazeka, nabo bonkhe labagwaziwe bakhona bayawulala lucaca ekhatsi kuyo.

Jeremiya 51:52

“Kodvwa ayeta emalanga, lapho ngiyawujezisa khona tithico tayo, kulo lonkhe live layo labalimele bayawububula,” kusho Simakadze.

Jeremiya 51:8

Ngalokutumako iBhabhulona iyakuwa ibhidlitwe. Yilileleni bo! Yitfoleleni ibhalisamu yekwelapha leminjunju yayo; mhlawumbe ingelapheka.

Jeremiya 52:31

Ngemnyaka wema-37 wekudzingiswa kwaJehoyakhini, inkhosi yakaJuda, ngemnyaka lapho Evili Merodaki abekwa khona waba yinkhosi yaseBhabhulona, wakhulula Jehoyakhini, inkhosi yakaJuda, wamkhipha ejele mhla ingema-25 enyangeni yeli-12.

Jeremiya 6:18

Ngako lalelani, nine tive. Caphelisisani, nani bofakazi, kutsi kuyakwenteka njani kubo.

Danyela 1:2

Simakadze wanikela Jehoyakimu, inkhosi yakaJuda, kanye naletinye timphahla tasethempelini laNkulunkulu esandleni saNebukhadnezari. Letimphahla watetfwala watiyisa ethempelini lankulunkulu wakhe kulaseBhabhulona, wafike watibeka endlini yengcebo yankulunkulu wakhe.

Danyela 3:14

Nebukhadnezari wakhuluma kuwo, watsi: “Kuliciniso yini, wena Shadraki, nawe Meshaki, nawe Abednego, kutsi anibakhonti labonkulunkulu bami nekutsi lesithico segolide lengisakhile anisikhotsameli?

Zefaniya 2:11

Simakadze uyakwesabeka kubo, nase abhubhisa bonkhe bonkulunkulu balelo live. Tive letikulo lonkhe lusentse lwelwandle tiyakumkhonta, nguleso naleso sive eveni laso.

Sembulo 18:2

Yamemeta ngelivi lelikhulu yatsi: “Iwile, yebo, iwile iBhabhulona lenkhulu! Seyigucuke yaba likhaya lemadimoni, nesihhehle sekubhaca bonkhe bomoya lababi, nesato tonkhe tinyoni letingcolile naletenyanyekako.