Jeremiya 32:39 - Siswati 1996 Bible

³⁹ Ngiyawubanika inhlitiyo yebunye nekwenta intfo yinye, khona batewuhlala bangesaba mine, loko kube lusito kubo nakubantfwababo emvakwabo.

Jeremiya 32:39 Referencias Cruzadas

Genesisi 17:7

“Ngiyawumisa sivumelwane sami nawe nentalo yakho, emvakwakho, etitukulwaneni ngetitukulwane, kube sivumelwane saphakadze. Ngiyawuba nguNkulunkulu wakho naNkulunkulu wetitukulwane takho emvakwakho.

Genesisi 18:19

Cha, ngeke, ngobe Abrahama ngimkhetsile kutsi ayale emadvodzana akhe netitukulwane takhe emvakwakhe, kutsi bagcine intsandvo yaSimakadze ngekwenta lokuhle nalokulungile. Khona-ke Simakadze uyawunika Abrahama loko lametsembisa kona.”

Genesisi 22:12

Yatsi: “Ungacali ubeke sandla kulomfana, futsi ungenti lutfo kuye; ngobe manje sengiyati kutsi uyamesaba Nkulunkulu, ngekutsi awukangigodleli indvodzana yakho lekukuphela kwayo.”

2 Tikhronike 30:12

NakaJuda sandla saNkulunkulu sasisetikwebantfu kutsi sibanike bunye bengcondvo ekwenteni loko inkhosi netiphatsimandla tayo babetsite akwentiwe, ngekulandzela livi laSimakadze.

Tihlabelelo 112:1

Haleluya, dvumisani Simakadze! Ubusisiwe umuntfu lowesaba Simakadze, lotijabulisa ngekugcina imiyalo yakhe.

Tihlabelelo 128:6

Shangatsi ungaphila uze ukhokhobe, uze ubone nebatukulu bakho. Kuthula akube na-Israyeli.

Tihlabelelo 86:11

Ngifundzise indlela yakho, Simakadze, ngiyawuhamba ecinisweni lakho; yenta inhlitiyo yami ihlose intfo yinye: kutsi ilesabe libito lakho.

Taga 23:17

Ungahawukeli lutfo etonini, kodvwa yesaba Simakadze ngetikhatsi tonkhe;

Isaya 35:8

Kuyawuba khona umgwaco lomkhulu lapho, uyawubitwa ngekutsi Yindlela Yebungcwele. Labangcolile ngeke bahambe ngawo, uyakuba walabo labahamba ngawo lomgwaco, tilima letikhohlakele ngeke tihambahambe ngawo.

Isaya 52:8

Lalela! Balindzi bakho bayamemeta; bonkhe bamemeta ngekujabula. Bayawutibonela ngewabo emehlo Simakadze nakabuyela eSiyoni.

Isaya 65:23

Bangeke bashikanekele lite nome batale bantfwana labayawudliwa sehlakalo; ngobe bayawuba sive lesibusiswe nguSimakadze, bona kanye netitukulwane tabo.

Jeremiya 24:7

Ngiyawubapha inhlitiyo yekwati mine kutsi mine nginguSimakadze. Bayawuba bantfu bami, mine ngibe nguNkulunkulu wabo, ngobe bayawuphendvukela kimi ngayo yonkhe inhlitiyo yabo.

Jeremiya 31:33

Simakadze utsi: “Ngulesi sivumelwane lengiyakusenta nendlu yaka-Israyeli emvakwaleso sikhatsi: Ngiyawufaka umtsetfo wami etingcondvweni tabo, ngiwubhale etinhlitiyweni tabo. Ngiyawuba nguNkulunkulu wabo, bona babe bantfu bami.

Jeremiya 32:40

Ngiyakwenta nabo sivumelwane saphakadze: Ngingeke ngiyekele kwenta lokuhle kubo, nabo ngibafake umoya wekungesaba, khona bangeyiwuphindze bahlubuke kimi.

Jeremiya 6:16

Naku lokushiwo nguSimakadze, utsi: “Manini emahlanganweni etindlela, nibuke, butani tindlela takadzeni, butani kutsi nguyiphi indlela lelungile, bese nihamba ngayo, niyawutfola kuphumula kwemiphefumulo yenu. Kodvwa nine natsi: ‘Singeke sihambe ngayo.’

Hezekeli 36:26

Ngiyawuninika inhlitiyo lensha, ngifake umoya lomusha ekhatsi kini; ngiyawuyikhipha inhlitiyo lelitje kini, ngininike inhlitiyo yenyama.

Hezekeli 37:22

Ngiyawubenta babe sive sinye kulelo live, etintsabeni taka-Israyeli. Kuyawuba nenkhosi yinye leyawubabusa bonkhe, futsi abasayiwuphindze babe tive letimbili letehlukene nome behlukane babe ngimibuso lemibili.

Hezekeli 37:24

“ ‘Inceku yami, Davide, iyawuba yinkhosi yabo, futsi bonkhe bayawuba nemelusi munye. Bayawulandzela imitsetfo yami, bacaphele kugcina timiso tami.

Hezekeli 37:25

Bayawuhlala eveni lengalipha inceku yami Jakobe, live lapho kwakuhlala khona boyihlomkhulu. Bona kanye nebantfwababo, kanye nebantfwana bebantfwababo, bayawuhlala lapho phakadze naphakadze; naDavide, inceku yami, uyawuba yinkhosi yabo phakadze naphakadze.

Johane 14:6

Jesu watsi kuye: “Mine ngiyindlela, neliciniso, nekuphila. Kute longeta kuBabe nakangeti ngami.

Johane 17:21

Ngithandazela kutsi babe munye bonkhe, njengaloku wena, Babe, ukimi, nami ngikuwe, kuze kutsi nabo babe kitsi, khona live litawukholwa kutsi ngitfunywe nguwe.

Imisebenti yebaPhostoli 13:33

sewukugcwalisile kitsi tsine lesisitukulwane sabo ngekuvusa Jesu aphile; njengobe kubhaliwe eSihlabelelweni sesibili kutsi: “ ‘Wena uyiNdvodzana yami, lamuhla senginguYihlo.’

Imisebenti yebaPhostoli 2:39

Ngobe setsembiso saNkulunkulu senu nesebantfwabenu kanye nabo bonkhe labakhashane, lowo nalowo loyawubitwa nguNkulunkulu, iNkhosi yetfu, kutsi ete kuye.”

Imisebenti yebaPhostoli 3:26

Ngako Nkulunkulu wasikhetsa wasitfuma Sisebenti sakhe kini kucala kutenibusisa ngekunenta nonkhe niphendvuke nitishiye tindlela tenu tekonakala.”

Imisebenti yebaPhostoli 4:32

Lesicumbi semakholwa sasimcondvo munye nanhlitiyo yinye. Akekho labetsi kwakhe ngekwakhe yedvwa, kodvwa bonkhe benetisana ngako konkhe labebanako.

Imisebenti yebaPhostoli 9:31

Ngako-ke libandla kulo lonkhe laseJudiya naseGalile naseSamariya laba nesikhatsi sekuthula. Lakhiwa, lakhula ngebunyenti ngekusitwa nguMoya Longcwele liphila imphilo yekwesaba iNkhosi.

KubaseRoma 11:16

Nangabe litsantana lenhlama lehlukaniselwe Nkulunkulu, nenhlama yonkhe yehlukaniselwe Nkulunkulu; futsi nangabe imphandze ingcwele, nemagala angcwele.

1 kubaseKorinthe 7:14

Ngobe indvodza lengakholwa ingcwelisiwe ngemfati wayo, nemfati longakholwa ungcwelisiwe ngendvodza yakhe lengumKhristu. Kube bekungenjalo ngabe bantfwabenu bangcolile, kepha njengamanje bangcwele.

2 kubaseKorinthe 13:11

Kwekugcina-ke bazalwane, ngitsi: Salani kahle. Lungisani imihambo yenu, netsabele kwemukela imiyalo, nivumelane, nihlalisane ngekuthula, khona Nkulunkulu wekuthula newelutsandvo atewuba nani.

Dutheronomi 5:29

Yebo, shangatsi tinhlitiyo tabo tingatsambela ekungesabeni, bagcine imiyalo yami ngaso sonkhe sikhatsi, khona kutawubahambela kahle bona nebantfwababo kuze kube phakadze!

Dutheronomi 6:2

khona kutewutsi nine, nebantfwabenu, nebantfwababo emvakwabo batekwesaba Simakadze Nkulunkulu wenu, yingci nanisagcina tonkhe timiso nemiyalo lengininika yona, khona nitewuva bumnandzi bekuphila imphilo lendze.

Dutheronomi 6:24

Simakadze wasiyala kutsi sihloniphe tonkhe letimiso nekutsi sesabe Simakadze Nkulunkulu wetfu, kuze sihlale sichuma njalo, njengobe kunjalo nalamuhla.

KumaHebheru 10:20

Lendlela lese sivulelwe yona yinsha, futsi iyaphila, idzabula sihenco iphumele ngale kwaso, sona-ke singumtimba waJesu.