Jeremiya 28:11 - Siswati 1996 Bible

¹¹ wakhuluma embikwabo bonkhe bantfu watsi: “Naku lokushiwo nguSimakadze, utsi: ‘Ngiyakulephula kanjalo-ke lijoko laNebukhadnezari, inkhosi yaseBhabhulona, ngilisuse etintsanyeni tetive tonkhe temhlaba ingakapheli iminyaka lemibili.’ ” Emvakwaloko-ke umphrofethi Jeremiya wachubeka wahamba indlela yakhe.

Jeremiya 28:11 Referencias Cruzadas

1 Emakhosi 13:18

Nalomphrofethi lomdzala waphendvula, watsi: “Nami futsi ngingumphrofethi njengawe. Ingilosi ikhulume kimi ngelivi laSimakadze, yatsi: ‘Mlandze, ute naye lapha kakho, khona atekudla kudla, anatse nemanti.’ ” Kodvwa abecala emanga.

1 Emakhosi 22:6

Ngako inkhosi yaka-Israyeli yase ibutsela ndzawonye baphrofethi lababengaba ngema-400, emadvodza odvwa, yababuta yatsi: “Ngingaya yini kuyawuhlasela iRamothi Gileyadi, nome ngiyekele?” Baphendvula batsi: “Hamba, ngobe Simakadze utayinikela etandleni tenkhosi.”

2 Tikhronike 18:10

Sedekiya, umsa waKhenana, yena abesente timphondvo tensimbi, wamemeta atsi: “Naku lokushiwo nguSimakadze: ‘Ngaleti utawuhlaba emaSiriya aze afe aphele.’ ”

Taga 14:7

Sikhweshele silima, ngobe kute lwati lotalutfola kuso.

Jeremiya 14:14

Simakadze wakhuluma kimi, watsi: “Baphrofethi baphrofetha emanga ngelibito lami. Angikabatfumi, futsi angikabatjeli, kantsi futsi angikakhulumi kubo. Baphrofetha kini imibono lengemanga, babhule, bakhonte tithico, bashumayele nenkhohliso yetingcondvo tabo.

Jeremiya 23:17

Bachubeka bakhulume kulabangedzelelako batsi: ‘Simakadze utsi: Nitawuba nekuthula.’ Kubo bonkhe labalandzela inkhani yetinhlitiyo tabo, batsi: ‘Kute lokubi lokutanehlela.’

Jeremiya 28:15

Ngako umphrofethi Jeremiya wase ukhuluma kuHananiya, umphrofethi, watsi: “Lalela lapha, Hananiya! Wena awukatfunywa nguSimakadze, kodvwa lesive ulibele kusenta setsembe emanga akho.

Jeremiya 29:9

Baphrofetha emanga kini egameni lami. Angikabatfumi mine,’ kusho Simakadze.

Hezekeli 13:7

Ngitsi kubo: Anizange niyibone yini imibono leyinkhohliso nekubhula lokungemanga ngesikhatsi nitsi: “Kusho Simakadze”, nome ngingakaze ngikhulume?