Jeremiya 12:16 - Siswati 1996 Bible

¹⁶ Nangabe bafundze kahle tindlela tebantfu bami base bafunga ngeLibito lami, batsi: ‘Ngifunga kuphila kwaSimakadze,’ njengaloku bake bafundzisa bantfu bami kutsi bafunge ngaBhali, bayawube sebayahlaliswa emkhatsini wesive sami.

Jeremiya 12:16 Referencias Cruzadas

Ingoma Yetingoma 1:8

Nangabe awati, wena mfati lomuhle kakhulu, landzela etinyatselweni temhlambi wetimvu, uyewudlisa khona emazinyane etimbuti ngasemathendeni ebelusi.

Isaya 2:3

Bantfu labanyenti bayawufika batsi: “Wotani, senyukele entsabeni yaSimakadze, endlini yaNkulunkulu waJakobe. Utasifundzisa tindlela takhe, khona sitewuhamba emikhondvweni yakhe.” Ngobe umtsetfo uyawuphuma eSiyoni, livi laSimakadze liphume eJerusalema.

Isaya 42:6

“Mine, Simakadze, ngikubite ngekulunga, ngiyawubamba sandla sakho. Ngitawugcina ngikwente kutsi ube sivumelwane sami nesive sami, ube kukhanya kubetive,

Isaya 45:23

Ngitifunge mine, umlomo wami ukhulume ngabo bonkhe bucotfo livi lelingeke liphindze liguculwe, litsi: Emadvolo onkhe ayawukhotsama embikwami; tonkhe tilimi tiyawufunga ngami.

Isaya 49:6

utsi: “Kuyintfo lelula kakhulu kuwe kuba yinceku yami kubuyisela tive takaJakobe, nekubuyisa labo labasasele bema-Israyeli lengitigcinele bona. Ngitakwenta futsi ube kukhanya kubetive, kuze utewumikisa insindziso yami emikhawulweni yonkhe yemhlaba.”

Isaya 65:16

Lowo loncenga sibusiso eveni uyawutibusisa ngaNkulunkulu lowetsembekile; lowo lowenta sifungo eveni uyawufunga ngaNkulunkulu lowetsembekile. Ngobe tinhlupheko letendlulile tiyawukhohlakala, tifihlakale emehlweni ami.”

Jeremiya 16:19

Awu Simakadze, mandla ami nesiphephelo sami, nqaba yami ngesikhatsi sekuhlupheka, tive tiyakuta kuwe tisuka emikhawulweni yonkhe yemhlaba, titsi: “Bobabe betfu babengenalutfo ngaphandle kwabonkulunkulu labalite, tithico letingenamsebenti letingazange setibentele lutfo loluhle.

Jeremiya 18:8

nangabe futsi leso sive lengisecwayisile siphendvuka ebubini baso, ngiyawube sengiyasiyekela, ngingabe ngisasehlisela leso sehlakalo lebesengisilungisele sona.

Jeremiya 3:17

Ngalawo malanga iJerusalema bayawuyibita ngekutsi Sihlalo Sebukhosi SaSimakadze, tonkhe tive tiyawubutsana eJerusalema, tiyewuhlonipha Libito laSimakadze. Bangeke basayilandzela inkhani yetinhlitiyo tabo letimbi.

Jeremiya 4:2

nawungafunga futsi kimi ngekweliciniso nangekulunga, utsi: ‘Ngifunga kuphila kwaSimakadze,’ tive-ke tiyawubusiswa ngaye tidvumise kuye futsi.”

Jeremiya 5:2

Nome bakhuluma batsi: ‘Ngifunga kuphila kwaSimakadze,’ noko basafunga emanga.”

Jeremiya 5:7

“Kufanele ngani kutsi nginitsetselele? Bantfwabenu bangishiyile mine, bafunga ngemabito abonkulunkulu labangesibo bonkulunkulu. Ngabanika konkhe lababekweswele, noko bachubeka nekuphinga, babutsana etindlini tetingwadla.

Jeremiya 6:16

Naku lokushiwo nguSimakadze, utsi: “Manini emahlanganweni etindlela, nibuke, butani tindlela takadzeni, butani kutsi nguyiphi indlela lelungile, bese nihamba ngayo, niyawutfola kuphumula kwemiphefumulo yenu. Kodvwa nine natsi: ‘Singeke sihambe ngayo.’

Zefaniya 1:5

nalabo labakhotsama etulu etingcongwaneni tetindlu bakhonte tinkhanyeti telizulu, nalabo labakhotsama bafunge batsi batakwetsembeka kuSimakadze baphindze bafunge nangaMoloki

Zakhariya 1:6

Kodvwa lamavi ami netimiso tami, lengabayala ngako ngemlomo webaphrofethi, tinceku tami, akuzange kufike yini etindlebeni taboyihlomkhulu? Base bayaphendvuka batsi: ‘Simakadze longuSomandla wente kitsi loko lobekusifanele ngekwetindlela tetfu nangalesikwentako, njengobe abesatimisele kukwenta.’ ”

Zakhariya 2:11

“Tive letinyenti tiyawutihlanganisa naSimakadze ngalelo langa, tibe sive sami. Ngiyawuhlala emkhatsini wenu, nani niyawukwati-ke kutsi Simakadze longuSomandla ungitfume kini.

KubaseRoma 11:17

Lamanye emagala ajutjwa, kwase kutsi endzaweni yawo kwahlunyeleliswa wena bewuligala lemncumo wesiganga, khona utewuba nenhlanganyelo emcebeni wemncumo wasekhaya.

KubaseRoma 14:11

Ngobe kubhaliwe kutsi: “Njengobe ngiphila, isho iNkhosi, onkhe emadvolo ayawukhotsama kimi, tonkhe tilimi tiyawudvumisa Nkulunkulu.”

1 kubaseKorinthe 3:9

Ngobe tsine sitisebenti nje taNkulunkulu letibambisene naye, nine niyinsimi yakhe. Nine futsi niyindlu yaNkulunkulu.

Joshuwa 23:7

Ningatihlanganisi nato letive letisasele tilapha emkhatsini wenu. Ningacali nikhuleke nome nifunge ngaleto tithico tato. Kufanele ningatikhonti nome nikhotsame kuto.

Ruthe 3:13

Sale ulala kwalamuhla. Kusasa ekuseni ngitawuvukela kuye ngalendzaba. Nangabe uyavuma kukungena, kutabe kulungile. Kodvwa nangabe akafuni, ngetsembisa phambi kwaSimakadze kutsi ngitakungena mine. Ngako lala kuze kuse.”