Jeremiya 11:20 - Siswati 1996 Bible

²⁰ Kodvwa, awu, Simakadze Somandla, wena lowehlulela ngekulunga, uvivinye inhlitiyo nengcondvo, ngicela kubona wena utikhiphela sibhongo kubo, ngobe mine ngitinikele kuwe ngatilahla ematsambo.

Jeremiya 11:20 Referencias Cruzadas

Genesisi 18:25

Akube khashane nawe kwenta intfo lenje! Ungababhubhisi labalungile kanye nalababi, bese labalungile baba njengalabangakalungi! Akube khashane nawe loko. Angeke yini umehluleli wemhlaba wonkhe ente kulunga?”

2 Emakhosi 19:14

Hezekiya watsatsa lencwadzi kuletigijimi wayifundza, wase ukhuphukela nayo ethempelini laSimakadze, wafike wayendlala embikwaSimakadze.

1 Tikhronike 28:9

“Wena-ke, Solomoni, ndvodzana yami, yenta Nkulunkulu weyihlo abe ligugu kuwe, umkhonte ngayo yonkhe inhlitiyo yakho nangengcondvo levumako, ngobe Simakadze uhlolisisa tonkhe tinhlitiyo acondzisise tonkhe tinjongo temicabango. Nawumfuna, utamtfola; kodvwa nawumlahla, naye utakuyekela phakadze naphakadze.

1 Tikhronike 29:17

Ngiyati, Nkulunkulu wami, kutsi wena uvivinya inhlitiyo ujatjuliswe bucotfo. Tonkhe letintfo ngitinikele ngenhlitiyo levumako nangekwetsembeka. Manje sengibonile ngekujabula kutsi sive sakho lesikhona lapha sinikele kanjani ngenhlitiyo levumako kuwe.

Jobe 5:8

“Kodvwa kube bekungimi, ngabe ngiyatincengela kuNkulunkulu, ngabe ngibeka yonkhe indzaba yami embikwakhe.

Tihlabelelo 139:23

Ngihlolisise, Nkulunkulu, wati inhlitiyo yami! Ngilinge, wati imicabango yami,

Tihlabelelo 35:2

Tsatsa lihawu lelincane nalelikhulu, uphutfume utengisita!

Tihlabelelo 43:1

Hhawu Nkulunkulu, ngikhulumele ungimele ecaleni lami. Ungephule esiveni lesingamesabi Nkulunkulu, ungikhulule nakumuntfu lonemacebo nalongakalungi!

Tihlabelelo 57:1

Ngihawukele, Nkulunkulu, ngihawukele, ngobe wena usiphephelo semphefumulo wami, ngiyawukhosela emtfuntini wemaphiko akho, kuze kwendlule tivunguvungu temashwa.

Tihlabelelo 58:10

Labalungile bayawujabula nababona kuphindziselwa kwalababi, bayawuklabhuta ngetinyawo tabo engatini yalababi.

Tihlabelelo 7:10

Nkulunkulu usihlangu sami, yena usindzisa labacotfo ngenhlitiyo.

Tihlabelelo 7:8

Simakadze akehlulele tive. Simakadze, ngehlulele ngekulunga kwami, uhlole nebucotfo bami.

Tihlabelelo 7:9

Ncandza bubi balababi, wakha lolungile, ngobe nguwe Nkulunkulu wekulunga lohlola tingcondvo netinhlitiyo.

Tihlabelelo 98:9

embikwaSimakadze, ngobe uyeta kutakwehlulela umhlaba ngekulunga, yebo, ehlulele tive ngebucotfo.

Jeremiya 12:1

Yebo Simakadze, wena uhlala ungcwele, nangiletsa indzaba embikwakho. Noko ngifuna kukhuluma nawe macondzana nekwehlulela kwakho. Kwentiwa yini kutsi indlela yalomubi iphumelele? Kwentiwa yini kutsi labangaketsembeki bahlale kahle bakhululekile?

Jeremiya 12:3

Noko uyangati mine, Simakadze; uyangibona, uvivinye imicabango yami ngawe. Bahudvule phansi njengetimvu tiyawuhlatjwa! Babeke eceleni, ubabekele lilanga lekuhlatjwa!

Jeremiya 15:15

Awu Simakadze, uyacondza, ngikhumbule unginakekele. Ngiphindziselele kubahluphi bami. Uyakwati kubeketela, ungangilahleli khashane, yati kutsi ngisolwa kangakanani ngenca yakho.

Jeremiya 17:10

“Mine Simakadze ngiphenya inhlitiyo, ngihlolisise nengcondvo, kuze ngimvuze umuntfu njengekwekutiphatsa kwakhe nanjengekwemisebenti yakhe.”

Jeremiya 17:18

Bahluphi bami abatseleke ngelihlazo, kodvwa mine ungikhweshise ehlazweni, abesatjiswe bona, kodvwa mine ngingesatjiswa. Yehlisela etikwabo lilanga lenhlekelele, babhubhise ngembhubhiso lephindvwe kabili.

Jeremiya 20:12

Awu Simakadze, longuSomandla, wena lohlola lolungile, uphenye inhlitiyo nengcondvo, angikubone kuphindzisela kwakho kubo, ngobe indzaba yami sengiyiniketele kuwe.

Sililo 3:58

Awu Simakadze, wayimela indzaba yami, wayihlenga imphilo yami.

Sililo 3:59

Awu Simakadze, nawe ukubonile lokubi lokwentiwe kimi. Phumelelisa indzaba yami!

Sililo 3:64

Awu Simakadze, buyisela kuto loko lokufanele tandla tato.

Hezekeli 11:5

Ngako Moya waSimakadze wehlela etikwami, wangitjela kutsi angitsi: “Naku lokushiwo nguSimakadze, utsi: Loku nguloku lenikushoko ninendlu yaka-Israyeli, kodvwa ngiyakwati loko lokusetingcondvweni tenu.

Imisebenti yebaPhostoli 17:31

ngobe umisile lilanga lapho ayakwehlulela khona umhlaba wonkhe ngeliciniso lelimsulwa ngemuntfu munye lamkhetsile; ngaye sewuvete siciniseko kubantfu bonkhe ngekutsi amvuse kulabafile.”

KubaseFiliphi 4:6

Ningakhatsateki ngalutfo. Kepha kuko konkhe ticelo tenu atatiwe nguNkulunkulu, ngekukhuleka nekuncusa kanye nekubonga.

2 kuThimothi 4:14

Alekzanda, umkhandzi welitfusi, wenta tintfo letinyenti letimbi kimi, iNkhosi iyawungenanela kuye.

1 yaPhetro 2:23

Kwatsi etfukwa, wangete waphindzisela ngenhlamba; kwatsi ahlushwa, wangete wasongela. Kodvwa watinikela kuNkulunkulu lowehlulela ngekulunga.

Sembulo 18:20

Jabulani, nitfokote, nine mazulu. Jabulani nani labangcwele, nani baphostoli, nani baphrofethi; ngobe Nkulunkulu sewuyehlulele iBhabhulona, waniphindziselela kuyo!

Sembulo 2:23

Bantfwabakhe ngiyawubashaya bafe. Onkhe emabandla ayawukwati kutsi nginguye lophenyisisa ingcondvo nenhlitiyo. Ngulowo nalowo emkhatsini wenu ngiyawumnika njengekwemisebenti yakhe.

1 Samuweli 16:7

Kodvwa Simakadze wakhuluma kuSamuweli, watsi: “Ungabheki kubukeka nebudze bakhe, ngobe yena ngimalile. Simakadze akabuki tona tintfo letinakwa ngumuntfu. Umuntfu ubuka lingaphandle lemuntfu, kodvwa Simakadze ubuka inhlitiyo.”

1 Samuweli 24:15

Shangatsi Simakadze angaba ngumehluleli ehlulele emkhatsini wetfu sobabili, angimelele ngekungitfola ngite licala, angikhulule esandleni sakho.”