Isaya 51:18 - Siswati 1996 Bible

¹⁸ Kuwo onkhe emadvodzana lowawatala kwabate nayinye yekukucondzisa endleleni; kuwo onkhe emadvodzana lowawakhulisa, kwabate nayinye leyakubamba ngesandla sakho.

Isaya 51:18 Referencias Cruzadas

Jobe 8:20

“Ecinisweni Nkulunkulu akamlahli umuntfu lomsulwa, futsi akaticinisi tandla tebantfu labenta bubi.

Tihlabelelo 142:4

Nangicalata eceleni kwami, ngikhandza kutsi kute namunye longangisita, kute longivikelako, kute nalonginakile.

Tihlabelelo 88:18

Sihlobo sami nemngani wami ubacoshile, bakhashane nami; bumnyama sebungumngani wami.

Isaya 41:13

Ngobe mine nginguSimakadze, Nkulunkulu wakho, lobamba sandla sakho sangesekudla, atsi kuwe: ‘Ungesabi, ngitakusita.’

Isaya 45:1

“Naku lokushiwo nguSimakadze kulogcotjiwe wakhe, kuKhuresi, lengibambe sandla sakhe sangasekudla, ngentela kwehlula tive embikwakhe, ngemuke emakhosi tikhali tawo, ngivule neminyango embikwakhe, kuze emasango angetiwuvalwa, ngitsi kuye:

Isaya 49:21

Uyawucabanga enhlitiyweni yakho utsi: ‘Ngubani lowangitalela laba, njengobe ngangihluphekile ngiyinyumba, ngangitfunjiwe futsi ngilahliwe? Bakhuliswa ngubani kepha laba? Ngasala ngingedvwa vo, kodvwa laba nyalo, sebaphumaphi?’ ”

Isaya 54:11

“Awu, wena, dolobha lelihlushiwe lashaywa tivunguvungu langete ladvudvutwa, ngiyawukwakha ngematje lamahle, tisekelo takho ngitakhe ngemasafire.

Jeremiya 10:20

Lithende lami libhidlitiwe; tonkhe tindophi talo tidzabukile. Emadvodzana ami esukile kimi, akasekho; kute namunye losasele nyalo, kute longangimisela lelithende lami, nome-ke angimisele lelidlangala lami.

Jeremiya 31:32

Lesivumelwane singeke sifanane naleso lengasenta naboyisemkhulu ngesikhatsi ngibabamba ngesandla ngibahola ngibakhipha eGibhithe, ngobe basephula sivumelwane sami, nome ngangiyindvodza kubo,” kusho Simakadze.

Hezekeli 34:6

Timvu tami tazulazula kuto tonkhe tintsaba nakuwo onkhe emagcuma laphakeme. Tasakateka kuwo wonkhe umhlaba, kwabate lotifunako nalotelusako.

Amose 5:2

“Iwile iNtfombi yaka-Israyeli, ingeke iphindze ivuke futsi, ayinakwa ngumuntfu eveni layo, kantsi futsi kute longayivusa ime.”

Matewu 15:14

Bayekeleni, ngobe ngibo baholi labatimphumphutse; kepha nangabe imphumphutse ihola lenye imphumphutse, totimbili tiyawuwela emgodzini.”

Matewu 9:36

Nabona ticumbi tebantfu, inhlitiyo yakhe yagcwala sihawu, ngobe bebakhatsatekile bahlakatekile, banjengetimvu letite umelusi.

Makho 8:23

Wayibamba ngesandla lemphumphutse wayikhiphela ngephandle kwemuti. Watsi kube ayikhafulele emehlweni wayibeka tandla wayibuta watsi: “Kukhona yini lokubonako?”

Imisebenti yebaPhostoli 13:11

Sandla seNkhosi sitakwehlela etikwakho nyalo; utawuba yimphumphutse, awunakubona kukhanya kwelilanga sikhatsi lesitsite.” Khona lapho Elimasi wehlelwa yinkhungu yebumnyama yavala emehlo akhe, wahambahamba ajikeleta afuna longamhola amdvonse ngesandla.

Imisebenti yebaPhostoli 9:8

Sawula wasukuma phansi, wavula emehlo, kodvwa emehlo ehluleka kubona. Ngako base bambamba ngesandla bamhola baze bayawungena naye eDamaseko.

KumaHebheru 8:9

Lesivumelwane asiyiwufanana naleso lengasenta naboyise, ngesikhatsi ngibabamba ngesandla ngibakhipha eveni laseGibhithe. Abasigcinanga leso sivumelwane sami, ngako-ke nami angibange ngisabanaka,” isho iNkhosi.