Isaya 48:20 - Siswati 1996 Bible

²⁰ Sukani lapha eBhabhulona. Wabalekeleni emaBhabhulona. Kumemeteleni loku ngenjabulo lenkhulu, nikubabate, kutfumeleni emikhawulweni yemhlaba, nitsi: “Simakadze umhlengile Jakobe, inceku yakhe.”

Isaya 48:20 Referencias Cruzadas

2 Samuweli 7:23

Kona ngubani nje lonjengesive sakho, ema-Israyeli, sive lekukuphela kwaso emhlabeni Nkulunkulu lowaphuma wayakusikhulula kutsi sibe sive sakhe, atakhele libito lelikhulu, watakwenta timangaliso letinkhulu naletishacisako ngekudvungulula tive ngetive kanye nabonkulunkulu bato embikwesive sakho lowasikhulula eGibhithe?

Ezra 2:1

Laba bantfu besifundza lababuya besuka ekutfunjweni, lababetfunjwe nguNebukhadnezari, inkhosi yaseBhabhulona, wabatfumbela eBhabhulona. Babuyela eJerusalema nakaJuda, nguloyo naloyo edolobheni lakubo.

Tihlabelelo 126:1

Kwakungatsi siyabhudza tsine batfunjwa baseSiyoni, ngesikhatsi Nkulunkulu asibuyisela eJerusalema.

Isaya 12:1

Ngalelo langa uyakutsi: “Ngiyakudvumisa, wena Simakadze, lite nome bewungitfukutselele, kodvwa kutfukutsela kwakho akusekho, esikhundleni saloko sewungidvudvutile.

Isaya 12:4

Ngalelo langa niyawutsi: “Bongani Simakadze, nibite Libito lakhe; yatisani tive ngaloko lakwentile, nimemetele kutsi Libito lakhe liphakeme.

Isaya 24:14

Bantfu baphakamisa emaphimbo abo, bamemeta ngenjabulo; kusukela ngasenshonalanga badvumisa bukhosi baSimakadze.

Isaya 26:1

Ngalelo langa kuyawuhlatjelelwa ingoma kaJuda, letsi: “Sinelidolobha lelicinile; Nkulunkulu usentela insindziso ngetibondza talo netinqaba talo.”

Isaya 42:10

Hlabelani ingoma lensha kuSimakadze, netibongo takhe kusukela emikhawulweni yemhlaba, nine lenintjweza ngemikhumbi elwandle, nako konkhe lokukulo, nine tichingi, nani nonkhe lenihlala kuto.

Isaya 43:1

Kodvwa nyalo, naku lokushiwo nguSimakadze, lowo lowakudala, wena Jakobe, lowo lowakubumba, wena Israyeli, utsi: “Ungesabi, ngobe ngikuhlengile, Ngikubite ngelibito lakho, wena uwami.

Isaya 44:22

Tikhubekiso takho ngitishanyele njengelifu. netono takho njengenkhungu yasekuseni. Buyela kimi, ngobe sengikuhlengile.”

Isaya 48:6

Nitivile tonkhe-ke letintfo, tibukeni tonkhe. Ningete nativuma yini? “Kusukela nyalo sengitabonitjela tintfo letinsha, tintfo letifihlakele kini, leningatati,

Isaya 49:13

Memetani ngenjabulo, mazulu! Tsakasa, nawe mhlaba! Klabalazani nihlabele, nani tintsaba! Ngobe Simakadze uyabadvudvuta bantfu bakhe, futsi uyawuba nesihawu kulabo labadzabukisiwe bakhe.

Isaya 49:6

utsi: “Kuyintfo lelula kakhulu kuwe kuba yinceku yami kubuyisela tive takaJakobe, nekubuyisa labo labasasele bema-Israyeli lengitigcinele bona. Ngitakwenta futsi ube kukhanya kubetive, kuze utewumikisa insindziso yami emikhawulweni yonkhe yemhlaba.”

Isaya 51:14

Labo labatiboshwa batawukhululwa masinyane; bangeke bafele kulomgodzi welijele labo, futsi bangeke bakweswele kudla.

Isaya 52:10

Simakadze uyakwembula umkhono wakhe longcwele embikwato tonkhe tive, nayo yonkhe imikhawulo yemhlaba iyawuyibona insindziso yaNkulunkulu wetfu.

Isaya 52:11

Sukani, sukani, niphume eBhabhulona! Ningatsintsi lutfo lolungcolile ngekwemtsetfo! Phumani kulelo dolobha, nitihlambulule nibe msulwa, nine leniphatsa titja taSimakadze.

Isaya 52:9

Hlokomani ngetingoma tekujabula kanyekanye, nine tindzala taseJerusalema, ngobe Simakadze ubadvudvutile bantfu bakhe, iJerusalema uyikhululile.

Isaya 62:11

Lalelani la: Simakadze sewente simemetelo lesiya emikhawulweni yonkhe yemhlaba, lesitsi: “Tjela iNdvodzakati yaseSiyoni, utsi: ‘Buka, nanguya uMsindzisi wakho uyeta! Bukela, umvuzo wakhe ukuye, nenkhokhelo yakhe ihamba embikwakhe.’ ”

Isaya 63:9

Kuko konkhe kukhatsateka kwabo naye abekhatsatekile, ingilosi yebukhona bakhe yabasindzisa, ngelutsandvo lwakhe nangemusa wakhe wabahlenga. Wabatsatsa wabetfwala kuwo onkhe emalanga akadzeni.

Jeremiya 31:10

“Vanini livi laSimakadze, nine tive; limemeteleni etichingini letikhashane, nitsi: ‘Lowo lowasakata Israyeli uyawumbutsa futsi, uyakwelusa umhlambi wakhe njengemelusi.’

Jeremiya 31:11

Ngobe Simakadze uyawubahlenga bakaJakobe, abakhulule esandleni salabo labanemandla kunabo.

Jeremiya 31:21

“Beka timphawu temgwaco; umise tinsika letitikhombandlela. Wunake umgwaco lomkhulu, yebo, umgwaco lohamba ngawo. Ncandzeka, Ntfombi lengu-Israyeli, buyela emadolobheni akho.

Jeremiya 50:2

“Memetelani nikhulume emkhatsini webetive, phakamisani siboniso semphi, nimemetele, ningafihli lutfo, kodvwa tsanini: ‘IBhabhulona itawutfunjwa, Bheli utawuhlazeka, Maduki yena agcwale kwesaba. Titfombe tayo tiyawuhlazeka netithico tayo tigcwale kwesaba.’

Jeremiya 50:28

Lalelani lababalekako nebakhoseli labesuka eBhabhulona, bamemetela baseSiyoni kutsi Simakadze Nkulunkulu wetfu utiphindziselele kanjani, atiphindziselela ngenca yelithempeli lakhe.

Jeremiya 50:8

“Balekani niphume eBhabhulona; lishiyeni lelive lemaBhabhulona, nibe njengetiphongo letihola umhlambi.

Jeremiya 51:45

“Phumani kuyo, sive sami! Balekisani timphilo tenu! Balekelani intfukutselo leyesabekako yaSimakadze.

Jeremiya 51:48

Ngulapho-ke lizulu nemhlaba nako konkhe lokukuko kuyawumemeta ngenjabulo ngeBhabhulona, ngobe kuyawuchamuka babhubhisi ngasenyakatfo bateyihlasela,” kusho Simakadze.

Jeremiya 51:6

“Phumani nibaleke eBhabhulona! Phephisani timphilo tenu! Ningabhujiswa ngenca yetono tayo. Sesikhatsi sekuphindzisela kwaSimakadze; utayikhokhela ngaloko lokuyifanele.

Zakhariya 10:8

“Ngiyawubakhweba ngibabutse bangene. Ngempela ngiyawubahlenga; bayawuba banyenti njengakucala.

Zakhariya 2:10

“Hlabela ujabule, wena Ndvodzakati yaseSiyoni. Ngobe ngiyeta, futsi ngiyawuhlala emkhatsini wenu,” kusho Simakadze.

Dutheronomi 30:4

Nome ngabe abenisakatele etiveni letikhashane ekugcineni kwemhlaba ngaphansi kwelizulu, khona lapho Simakadze Nkulunkulu wenu uyawuphindze anibutsele ndzawonye anibuyise.

Sembulo 18:20

Jabulani, nitfokote, nine mazulu. Jabulani nani labangcwele, nani baphostoli, nani baphrofethi; ngobe Nkulunkulu sewuyehlulele iBhabhulona, waniphindziselela kuyo!

Sembulo 18:4

Ngase ngiphindze ngiva lelinye livi liphuma ezulwini litsi: “Sive sami, phumani kuyo, ningahlanganyeli nayo etonweni tayo, funa nehlelwe kuhlushwa kanye nayo.