Isaya 26:3 - Siswati 1996 Bible

³ Wena Simakadze, lowo lotimiselako ngawe uyamlondvolota, umuphe kuthula nenhlalakahle, ngobe abeke litsemba lakhe kuwe.

Isaya 26:3 Referencias Cruzadas

1 Tikhronike 5:20

Babeka litsemba labo kuNkulunkulu, bathandaza kuye, bacela lusito. Nkulunkulu wayiphendvula imithandazo yabo, wabenta basincoba sive sakaHagari kanye netive letatisitana naso.

2 Tikhronike 13:18

Ema-Israyeli ehlulwa kanjalo, kwatsi bakaJuda bancoba, ngobe babencike kuSimakadze Nkulunkulu waboyise.

2 Tikhronike 16:8

EmaKushe nemaLibhiya abengesiyo yini imphi lenemandla nalenetincola letinyenti nebagibeli bemahhashi labanyenti? Noko watsi kube wetsembele kuSimakadze, Simakadze wase ubanikela esandleni sakho.

Tihlabelelo 119:165

Bantfu labatsandza umtsetfo wakho banekuthula lokuphelele, kute lokuyawubakhuba endleleni.

Tihlabelelo 125:1

Labo labetsembele kuSimakadze bafanana neNtsaba iSiyoni, lengeke itanyatanyiswe, kodvwa leyawuma kuze kube phakadze.

Tihlabelelo 9:10

Labati libito lakho bayawukwetsembela kuwe, ngobe wena, Simakadze, awubafulatseli labakufunako.

Isaya 12:2

Impela, Nkulunkulu uyinsindziso yami; ngiyakumetsemba ngingesabi, Simakadze, Simakadze ungemandla ami nengoma yami; nguye loyinsindziso yami.”

Isaya 26:12

Simakadze, wena usentela kuthula, konkhe loku lesiphumelele kukwenta, sikwentelwe nguwe.

Isaya 27:5

Nome-ke wona abaleke atewubhaca kimi, akabuyisane nami, yebo, akabuyisane nami.”

Isaya 31:1

Maye kulabo labaya eGibhithe bayewucela khona lusito, labetsembela emahhashini, betsembele nasebunyentini betincola tabo temphi, nasemandleni lamakhulu ebagibeli babo bemahhashi, kodvwa bangabuki kuLongcwele waka-Israyeli, nome-ke bafune lusito kuSimakadze.

Isaya 32:17

Sitselo sekulunga siyawuba kuthula nenhlalakahle, umphumela wekulunga uyawuba kuphumula nekulondvoloteka phakadze naphakadze.

Isaya 32:18

Sive sami siyawuhlala etindzaweni tekuthula, emakhaya laphephile, etindzaweni tekuphumula letite lokuphatamisako.

Isaya 42:19

Ngubani loyimphumphutse ngaphandle kwenceku yami? Ngubani losihhulu njengesitfunywa lengisitfumako? Ngubani loyimphumphutse njengalotinikele kimi, loyimphumphutse njengenceku yaSimakadze?

Isaya 42:6

“Mine, Simakadze, ngikubite ngekulunga, ngiyawubamba sandla sakho. Ngitawugcina ngikwente kutsi ube sivumelwane sami nesive sami, ube kukhanya kubetive,

Isaya 48:2

nine lenitibita ngekutsi nitakhamiti tasedolobheni lelingcwele, netsembele kuNkulunkulu wema-Israyeli, Simakadze longuSomandla libito lakhe, lalelani naku:

Isaya 49:8

Naku lokushiwo nguSimakadze, utsi: “Ngiyawukuphendvula ngesikhatsi sami lengisitsandzako, nangelilanga lensindziso ngiyawukusita. Ngiyawukugcina, ngikwente ube sivumelwane sami nebantfu, kuze kubuyiselwe live, banikwe kabusha emafa labese acitsekile.

Isaya 50:1

Naku lokushiwo nguSimakadze, utsi: “Iphi incwadzi yenyoko yesehlukaniso, lengamcosha ngayo kutsi ahambe? Nome-ke nganitsengisa kumuphi kulengibakweledako? Natsengiswa ngenca yetono tenu, ngenca yemacala enu unyoko wacoshwa.

Isaya 50:10

Ngubani emkhatsini wenu lowesaba Simakadze nalolalela livi lenceku yakhe? Lowo lohamba ebumnyameni, longenako kukhanya, aketsembele kulo Libito laSimakadze, asime kuNkulunkulu wakhe.

Isaya 66:12

Ngobe naku lokushiwo nguSimakadze, utsi: “IJerusalema ngiyakuyiletsela kuthula lokuyawugobhota njengemfula, bunjinga betive bute kuyo njengemfula longenelako. Niyawumunya kuyo, netfwalwe ngumkhono wayo, nidlaliselwe emadvolweni ayo.

Jeremiya 39:18

Ngiyawukusindzisa, ngeke ufe ngenkemba, kodvwa wena uyawuphunyula nemphilo yakho, ngobe wena wetsembele kimi, kusho Simakadze.’ ”

Danyela 3:17

Nasijikijelwa ekhatsi kulamalangabi emlilo lowesabekako nalohhumako, loNkulunkulu wetfu lesimkhontako unemandla ekusisindzisa kuwo, futsi uyakusephula esandleni sakho, nkhosi.

Danyela 3:28

Nebukhadnezari-ke wakhuluma watsi: “Akadvunyiswe Nkulunkulu waboShadraki, naMeshaki, na-Abednego lotfume ingilosi yakhe kutsi itewulamlela tinceku takhe! Babemetsembile bangete bawutsatsa umyalo wenkhosi, batimisela kulahlekelwa nakuphila kwabo kunekutsi bakhonte nome bakhotsamele lomunye nkulunkulu ngaphandle kwaNkulunkulu wabo.

Danyela 6:23

Inkhosi yajabula kakhulu, yatfumela kutsi kuyewukhishwa Danyela emgodzini wemabhubesi. Danyela watsi nasakhishwe emgodzini wemabhubesi, kwangete kwatfolakala ngisho nemyocu emtimbeni wakhe, ngobe abemetsembile Nkulunkulu wakhe.

Mikha 5:5

Uyawuba kuthula kwaso. Ngesikhatsi ema-Asiriya avimbetela live letfu afohla tinqaba tetfu, tsine, ma-Israyeli, siyawutfumela baholi betfu labanemandla kakhulu bayekulwa nawo.

Johane 14:27

“Nginishiya nekuthula. Lokuthula lenginipha kona akufanani nesipho selive. Tinhlitiyo tenu tingabokhatsateka futsi tingesabi.

Johane 16:33

Senginitjele loku, kuze nitewuba nekuthula kimi. Eveni niyawuhlupheka nibe nelusizi. Kodvwa manini sibindzi, ngobe mine ngilincobile live.”

KubaseRoma 5:1

Njengobe sesentiwe semukeleka kuNkulunkulu kutsi silungile ngekukholwa, sesinekuthula naNkulunkulu ngeNkhosi yetfu Jesu Khristu.

KubaseFiliphi 4:7

Kuthula kwaNkulunkulu lokwendlula konkhe kwati kutawulondvolota tinhlitiyo tenu nemicabango yenu kuKhristu Jesu.