Imisebenti yebaPhostoli 23:12 - Siswati 1996 Bible

¹² Ngakusasa ekuseni lamanye emaJuda ahlangana enta lisu, ase atibopha ngesifungo kutsi ngeke akudle kudla, nekunatsa angeke anatse angakambulali Pawula.

Imisebenti yebaPhostoli 23:12 Referencias Cruzadas

Genesisi 37:18

Kodvwa bona bambona asesekhashane eta kubo, watsi asengakefiki, bavumelana ngekutsi bambulale.

1 Emakhosi 19:2

Jezebeli watfumela sitfunywa ku-Elija, watsi: “Shangatsi bonkulunkulu bangangibulala ngife, nangabe mine kusasa ngalesikhatsi angikakwenti kuwe loko lokwente kulabaphrofethi.”

2 Emakhosi 6:31

Yamemeta yatsi: “Nkulunkulu wami, ngibulale ngife, nangabe lamuhla lingashona inhloko ya-Elisha, umsa waShafati, isengetulu kwemahlombe akhe!”

Nehemiya 10:29

bonkhe-ke labo bahlanganyela nabomnakabo nebahlonishwa babo, batibopha ngesicalekiso nangesifungo kutsi batawulandzela kahle umtsetfo waNkulunkulu labanika wona ngaMosi, inceku yaNkulunkulu, kuyilalela yonkhe imiyalo nemihambo kanye netimiso taSimakadze longuNkulunkulu wabo.

Esta 2:22

Modekhayi watsi kube ayive lendzaba, wayibika enkhosikatini Esta. Inkhosikati lenkhulu yabikela inkhosi ngalendzaba, yasho nekutsi ive ngaModekhayi.

Tihlabelelo 31:13

Yebo, ngiva labanyenti bayangihleba, ngihlala ngetfuka tanya. Bangakhela emacebo, bahlose kungibulala.

Jeremiya 11:19

Bengifanana nelizinyane lemvu lelitfobile liyewuhlatjwa; ngangingati kutsi kantsi bese bente lisu lekungenta silo sengubo, batsi: “Asisibhubhise lesihlahla kanye netitselo taso, asimkhweshise eveni lalabaphilako, kuze libito lakhe lingaphindzi likhunjulwe.”

Jeremiya 44:25

Naku lokushiwo nguSimakadze longuSomandla, Nkulunkulu wema-Israyeli, utsi: Nine nabomkenu nikhombise ngetento tenu loko lenakwetsembisa nanitsi: ‘Nakanjani, sitatifeza tifungo lesatenta sitayitfuncisa imphepho sitsele neminikelo yesinatfo eNkhosikatini yeLizulu.’ “Chubekani-ke, nikwente loko lenakwetsembisa! Gcinani tifungo tenu!

Levithikusi 27:29

Umuntfu lonikelwe ekufeni kuSimakadze akayiwuhlengwa; kufanele abulawe.

Matewu 26:4

bakha lisu lekubamba Jesu ngebucili, bambulale.

Matewu 26:74

Phetro wacala kuticalekisa nekufunga watsi: “Angimati lomuntfu!” Asasho njalo lakhala lichudze.

Matewu 27:25

Sonkhe sive saphendvula satsi: “Ingati yakhe ayibesetikwetfu nasetikwebantfwana betfu!”

Imisebenti yebaPhostoli 23:13

Labo labatibopha ngalesifungo babengetulu kwema-40.

Imisebenti yebaPhostoli 23:14

Base baya kubaphristi labakhulu netibondza tenkholo yemaJuda, bafike batsi: “Sesente sibopho lesimatima lapha, satsi ngeke sikufake kudla emlonyeni singakambulali Pawula.

Imisebenti yebaPhostoli 23:21

Kodvwa ungavumi, ngobe kukhona emadvodza langetulu kwema-40 latawube amlalele endleleni atembulala. Asente nesifungo kutsi angeke akudle kudla, nekunatsa angeke anatse angakabulali Pawula. Njengamanje nje, asalungele kukwenta loko, aseme ngawe nje kutsi eve kutsi wena utsini.”

Imisebenti yebaPhostoli 23:30

Ngitsite kube ngive kutsi lamanye emaJuda atamlalela endleleni afuna kumbulala, ngase ngincoma kutsi ngimtfumele lapho kuwe masinyane, ngaphindze ngatjela nalabo labambeka licala kutsi bete batewuchaza kahle kuwe, kutsi bambeka licala lani lomuntfu.”

Imisebenti yebaPhostoli 25:3

kutsi amane ababonelele ngekuletsa Pawula eJerusalema, ngobe phela base bente lisu lekumenta silo sengubo endleleni.

Imisebenti yebaPhostoli 9:23

Emvakwemalanga lamanyenti, emaJuda ahlangana enta lisu lekumbulala.

Imisebenti yebaPhostoli 9:24

Kodvwa Sawula weva ngalelisu labo kutsi bamlindza imini nebusuku emagedeni elidolobha kuze bambulale.

1 kubaseKorinthe 16:22

Nangabe umuntfu angayitsandzi iNkhosi, akabe ngulocalekisiwe Wota Nkhosi!

2 kubaseKorinthe 11:26

Eluhambeni lwami ngabasetingotini temifula, nasetingotini tetigelekece, nasetingotini kubantfu bakitsi, nasetingotini kubetive, nasetingotini tasemadolobheni, nasetingotini temaphandleni, nasetingotini telwandle, nasetingotini kubazalwanembumbulu.

KubaseGalathiya 3:13

Khristu wasihlenga esicalekisweni lesasiletfwe ngumtsetfo, ngekutsi abe sicalekiso endzaweni yetfu; ngobe kubhaliwe kutsi: “Ucalekisiwe wonkhe umuntfu lolenga emtsini.”

1 kubaseThesalonika 2:16

Adzimate asivimbela nekutsi sishumayele insindziso kubetive. Ngaloko-ke imihla nemalanga atengetela tono. Kodvwa ekugcineni lulaka lwaNkulunkulu seluze lwabehlela.

Joshuwa 6:26

Ngaso leso sikhatsi Joshuwa wakhipha sifungo lesimatima, watsi: “Wonkhe lowetama kuvusa lelidolobha, iJerikho, uyawucalekiswa embikwaSimakadze: “ ‘Uyawufelwa yindvodzana lelitubulo lakhe, nakabeka leto tisekelo talo; afelwe ngumntfwanakhe losemncane, nakafaka emasango alo.’ ”

Joshuwa 7:1

Kodvwa ema-Israyeli ona, atsatsa tintfo lokwakufanele tibhujiswe. Akhani, umsa waKhami, umsa waZabdi labenguZimri, umsa waZera, wesive sakaJuda, watsatsa letinye tato. Ngako lulaka lwaSimakadze lwasivutsela sive sema-Israyeli.

Joshuwa 7:15

Loyo loyawutfolakala analetintfo lekufanele tibhujiswe uyawubulawa ngemlilo kanye nako konkhe lokungekwakhe. Ngobe wephule sivumelwane saSimakadze, wenta intfo lelihlazo esiveni saka-Israyeli.’ ”

1 Samuweli 14:24

Emadvodza aka-Israyeli abaselusizini ngalelo langa, ngobe Sawula abesabophe sonkhe sive ngesifungo watsi: “Akacalekiswe umuntfu lotakudla lilanga lisengakashoni, nami ngingakatiphindziseli etitseni tami!” Ngako kute nome munye lowake wanambitsa kudla kulamabutfo.