Hezekeli 44:7 - Siswati 1996 Bible

⁷ Ngetulu kwato tonkhe letinye tintfo tenu lenitentako letinengekako niletse betive labangakasokwa enhlitiyweni nasenyameni, nabangenisa endzaweni yami lengcwele, nangcolisa lithempeli lami ngesikhatsi ninikela kimi ngekudla, nangemanoni, nangengati, nephula sivumelwane sami.

Hezekeli 44:7 Referencias Cruzadas

Genesisi 17:14

Wonkhe lomdvuna longakasoki uyawuncunywa esiveni sakubo, ngobe wephule sivumelwane sami.”

Eksodusi 12:43

Simakadze wakhuluma kuMosi naku-Aroni, watsi: “Lena-ke ngimitsetfo lecondzene neliPhasika: Kufanele kubete wetive lolidlako;

Eksodusi 12:48

Nangabe kunewetive lowakhe emkhatsini wenu lofisa kuwugcina naye lomkhosi, kufanele bonkhe labadvuna labasendlini yakhe basokwe. Naye-ke angalidla, ngobe sewuyawutsatfwa njengewekutalwa. Longakasoki akufanele alidle leliPhasika.

Isaya 24:5

Umhlaba ungcoliswe bantfu bawo. Umtsetfo waNkulunkulu abawulalelanga, bephule imiyalo, bephula sivumelwane saphakadze.

Jeremiya 11:10

Babuyela etonweni tabokhokho babo, labala kulalela emavi ami. Balandzele labanye bonkulunkulu, bakhonta bona. Indlu yaka-Israyeli nendlu yakaJuda, totimbili tisephulile sivumelwane lengasenta nabokhokho bato.

Jeremiya 31:32

Lesivumelwane singeke sifanane naleso lengasenta naboyisemkhulu ngesikhatsi ngibabamba ngesandla ngibahola ngibakhipha eGibhithe, ngobe basephula sivumelwane sami, nome ngangiyindvodza kubo,” kusho Simakadze.

Jeremiya 4:4

Tisokeni nine kuSimakadze, sokani tinhlitiyo tenu, nitinikele kuye ngalokuphelele, nine madvodza akaJuda nesive saseJerusalema. Ngaphandle kwaloko lulaka lwami lutawucitseka luvutse njengemlilo ngenca yebubi lenibentile, luvutse, kubete nalongalucisha.”

Jeremiya 9:25

Simakadze umemetela utsi: “Lalela ngikutjele! Ayeta emalanga, lapho ngiyawujezisa bonkhe labasoke enyameni kuphela,

Jeremiya 9:26

baseGibhithe, nebakaJuda, nebaka-Edomu, nebaka-Amoni, nebakaMowabi, nabo bonkhe labahlala ehlane etindzaweni letikhashane. Ngobe tonkhe leto tive empeleni atikasoki, ngisho nayo yonkhe indlu yaka-Israyeli ayikasoki enhlitiyweni.”

Hezekeli 22:26

Baphristi balo bephula umtsetfo wami bahlambalate tintfo tami letingcwele; abehlukanisi emkhatsini walokungcwele nalokutintfo nje; bafundzisa kutsi kute umehluko emkhatsini walokuhlantekile nalokungcolile ngekwemtsetfo; bavala emehlo abo bangakunaki kugcina emaSabatha ami, khona ngitewuhlanjalatwa emkhatsini wabo.

Hezekeli 44:15

“ ‘Kodvwa baphristi, labangemaLevi lababatukulu baSadoki, labebayenta ngekwetsembeka imisebenti yendzawo yami lengcwele ngesikhatsi ema-Israyeli aphambuka kimi, kufanele bona basondzele batewukhonta embikwami. Kufanele beme embikwami batewunikela ngemhlatjelo wemanoni newengati, kusho iNkhosi Simakadze.

Hezekeli 44:9

“ ‘Naku lokushiwo yiNkhosi Simakadze, itsi: Kufanele kubete namunye wetive longakasokwa enhlitiyweni nasenyameni longena endzaweni yami lengcwele, kubete ngisho nebetive labahlala emkhatsini wema-Israyeli.’ ”

Hezekeli 7:20

Babetigabatisa ngetimvunulo tabo nangekwekugaba kwabo lokuhle lababekusebentisa ekubumbeni kwabo letithico tabo letisinengiso, netitfombe letingenamsebenti. Ngako-ke ngiyawutigucula ngitente tingcole tingabi namsebenti.

Levithikusi 17:11

Phela kuphila kwemtimba kusengatini; mine ngininike ingati kutsi ifeze inkonzo yekuhlenga timphilo tenu etikwelilati. Ngobe yingati lefeza inkonzo yekubuyisana nekuhlenga imphilo.

Levithikusi 21:17

“Tjela Aroni utsi: ‘Etitukulwaneni takho kute namunye lonesici loyawusondzela atewunikela ngekudla kwaNkulunkulu wakhe.

Levithikusi 21:21

Kuyawubate esitukulwaneni sa-Aroni lonesici nome ngesaluphi luhlobo loyawusondzela atewunikela ngesinkhwa saNkulunkulu wakhe.

Levithikusi 21:6

Kufanele babe ngcwele embikwaNkulunkulu wabo, bangalihlambalati libito laNkulunkulu wabo, ngobe ngabo labaletsa umnikelo lowentiwa ngemlilo kuSimakadze, sinkhwa saNkulunkulu wabo; ngako-ke kufanele babe ngcwele.

Levithikusi 21:8

Ma-Israyeli, batiseni kutsi bangcwele, ngobe banikela ngekudla kwaNkulunkulu wenu. Bangcwele ngobe mine, Simakadze, lenginingcwelisako ngingcwele.

Levithikusi 22:25

“ ‘Ningacali ninikele ngetilwane letinjalo, ningatemukeli natiletfwa betive, nangabe batinikelela kutsi tibe kudla kwaNkulunkulu wenu. Tingeke temukeleke esikhundleni senu, ngobe tichwalile futsi tinetici.’ ”

Levithikusi 26:15

ningatilandzeli netimiso tami, ningayenti nemitsetfo yami, nehluleke nekuyifeza lemiyalo yami ngekuphambana nesivumelwane sami,

Levithikusi 26:41

lokungukona kwangenta ngaze ngabayisa eveni letitsa tabo, nangabe netinhlitiyo tabo letingakasoki titfobeka bayikhipha nenkhokhelo yesono sekuhlubuka kwabo,

Malakhi 1:7

“Nibeke kudla lokungcolile ngekwemtsetfo etikwelilati lami. “Kodvwa niyabuta nitsi: ‘Sikungcolise kanjani?’ “Ngekutsi nitsi litafula laSimakadze liyenyanyeka.

Malakhi 2:4

Nitawukwati-ke kutsi nginitfumelele lesecwayiso, khona kutawutsi sivumelwane sami naLevi sichubeke,” kusho Simakadze longuSomandla.

Malakhi 2:8

Kodvwa nine senisukile kuleyo ndlela, kwatsi ngalemfundziso yenu nakhubatelisa bantfu labanyenti, bawa; nisephulile sivumelwane sami naLevi,” kusho Simakadze longuSomandla.

Imisebenti yebaPhostoli 21:28

amemeta atsi: “Madvodza aka-Israyeli, sitani! Nangu lomuntfu lohamba tonkhe tindzawo afundzisa bantfu lokuphambene nesive sakitsi, nemtsetfo waMosi kanye nalendzawo. Manje-ke sewudzimate wafaka bantfu betive ethempelini kutsi batewungcolisa lendzawo lengcwele.”

Imisebenti yebaPhostoli 7:51

“Maye, ninenkhani! Maye, anikholwa etinhlitiyweni tenu! Maye, nitihhulu ekuveni livi laNkulunkulu! Nifute bokhokho benu, nani niphikisana naMoya Longcwele.

Dutheronomi 10:16

Ngako-ke, sokani tinhlitiyo tenu, ningaphindzi nibe netinhloko letilukhuni.

Dutheronomi 30:6

Simakadze Nkulunkulu wenu uyawusoka tinhlitiyo tenu netinhlitiyo tetitukulwane tenu, kuze nitsandze yena ngayo yonkhe inhlitiyo yenu, nangawo wonkhe umphefumulo wenu, niphile.

Dutheronomi 31:16

Simakadze wakhuluma kuMosi, watsi: “Wena sewutawuhamba uyewuphumula nabokhokho bakho, emvakwekufa kwakho lesive siyawugwadla nabonkulunkulu betive takulelo live lesiyawungena kulo. Siyawungishiya, sephule nesivumelwane lengasenta naso.

Dutheronomi 31:20

Ngitawutsi ngingabangenisa kulelive leligcwele lubisi neluju lwetinyosi, live lengaletsembisa ngesifungo kubokhokho babo, futsi batsi bangadla besutse, banotse, bayawube sebaphambukela kulabanye bonkulunkulu babakhonte, bangilahle mine, bephule nesivumelwane sami.

KumaHebheru 8:9

Lesivumelwane asiyiwufanana naleso lengasenta naboyise, ngesikhatsi ngibabamba ngesandla ngibakhipha eveni laseGibhithe. Abasigcinanga leso sivumelwane sami, ngako-ke nami angibange ngisabanaka,” isho iNkhosi.