Hezekeli 39:23 - Siswati 1996 Bible

²³ Netive titakwati kutsi sive saka-Israyeli saya ekutfunjweni ngenca yetono taso, ngobe babengaketsembeki kimi. Ngako ngase ngiyabufihla buso bami kubo, ngabaniketa etandleni tetitsa tabo. Bonkhe bafa ngenkemba.

Hezekeli 39:23 Referencias Cruzadas

Ezra 9:7

Kusukela etikhatsini tabokhokho kuze kube ngumanje, bubi betfu bebuvele bubukhulu. Ngenca yetono tetfu, tsine nemakhosi etfu nebaphristi betfu besibantfu bekubulawa ngenkemba nekutfunjwa, nekuphangwa kanye nekwentelwa phansi etandleni temakhosi etive, njengobe kusenjalo lamuhla.

Tihlabelelo 10:1

Simakadze, umeleni khashane? Utifihleleni ngesikhatsi sisekuhluphekeni?

Tihlabelelo 106:41

Wabanikela emandleni ebetive, labo lababatondzako bababusa.

Tihlabelelo 30:7

Yebo, Simakadze, wangimisa ngaba njengentsaba lecinile; kodvwa watsi kube ungifulatsele, ngahlaselwa kwesaba.

Isaya 1:15

Naniphakamisa tandla tenu niteneka, nithandaza, ngiyakuwafihla emehlo ami kini; nome senenta imithandazo leminyenti kangakanani, ngingeke ngiyilalele. Tandla tenu tigcwele ingati;

Isaya 42:24

Ngubani lowanikela Jakobe kutsi abe yimphango, wanikela Israyeli kubaphangi? Kwakungesiye yini Simakadze lesone kuye? Ngobe abazange bahambe ngetindlela takhe, abazange bawulalele umtsetfo wakhe.

Isaya 59:2

Kodvwa tiphambuko tenu tinehlukanisile naNkulunkulu wenu; tono tenu tibusitsile buso bakhe kini, kuze angetikuniva.

Isaya 64:7

Kute namunye lobita Libito lakho, nome lotimisela kubambelela kuwe, ngobe ubufihlile buso bakho kitsi, wasicedza ngenca yetono tetfu.

Isaya 8:17

Ngitawulindzela Simakadze lofihla buso bakhe kuyo indlu yakaJakobe. Ngiyawubeka litsemba lami kuye.

Jeremiya 33:5

nabalwa nemaBhabhulona, utsi: ‘Tiyawugcwala tidvumbu temadvodza lengitawabulala ngentfukutselo nangelulaka lwami. Ngiyawulifihlela buso bami elidolobha ngenca yabo bonkhe bubi balo.

Jeremiya 44:22

Watsi Simakadze nasehlulekile kubeketelela tento tenu tebubi naletintfo letisinengiso lenanitentile, live lenu laba yintfo yekucalekisa nendzawo lelihlane lelite bantfu, njengobe linjalo lamuhla.

Sililo 1:8

IJerusalema yone kakhulu, ngaloko seyisinengiso. Bonkhe lababeyihlonipha sebayayedzelela, ngobe sebabubonile bungcunu bayo; yona cobo lwayo iyabubula ifulatsele.

Hezekeli 20:27

“Ngako-ke, ndvodzana yemuntfu, khuluma kulabantfu baka-Israyeli utsi kubo: ‘Naku lokushiwo yiNkhosi Simakadze, itsi: Kuloku naboyihlo bangihlambalata ngekungikhohlwa:

Hezekeli 36:36

Lapho-ke tive leniyawube nakhelene nato letiyawube tisasele tiyawukwati kutsi mine Simakadze, ngikwakhe kabusha loko lokwase kubhujisiwe, ngabuye ngahlumisa loko lokwase kulihlane. Mine Simakadze sengikhulumile, futsi ngitawukwenta.’

Hezekeli 39:29

Angisayikubufihla buso bami kubo, ngobe ngiyawutfululela Moya wami kuyo indlu yaka-Israyeli, kusho iNkhosi Simakadze.”

Hezekeli 7:22

Ngiyawubafulatsela, nabo bayawuyonakalisa lendzawo yami leligugu kangaka; bosidlani bayawungena ngekhatsi kuyo bayingcolise.

Levithikusi 26:25

Ngiyawuniletsela imphi itenijezisa ngekwephula kwenu sivumelwane. Niyawutsi nanihlangana emadolobheni enu etindzaweni tekuphepha, bese nginihlasela ngetifo letingelapheki, nivele niphoceleke kutinikela etitseni tenu.

Dutheronomi 32:20

Watsi: ‘Ngiyawubufihla buso bami kubo, ngibone kutsi siphetfo sabo kutawuba yini. Ngobe basitukulwane lesigwegwile, bantfwana labangaketsembeki.

Dutheronomi 32:30

Kodvwa indvodza yinye ingawacosha kanjani emadvodza layinkhulungwane, nome-ke lamabili acoshe emadvodza latinkhulungwane letilishumi, ngaphandle kwekutsi Lidvwala labo libatsengisile, ngaphandle kwekutsi Simakadze ubanikele kubo?

Tikhulu 2:14

Intfukutselo yaSimakadze yabavutsela baka-Israyeli, wabanikela etandleni tebaphangi, tabaphanga. Wabanikela etandleni tetitsa tabo letatibatungeletile, bangabe basakwati ngisho nekutivikela kuto.

Tikhulu 3:8

Intfukutselo yaSimakadze yavutsela bema-Israyeli kangangekutsi wawatsengisa etandleni taKhushani Rishathayimu, inkhosi yaseMesophothamiya, lowagcilata ema-Israyeli iminyaka lesiphohlongo.