Hezekeli 14:6 - Siswati 1996 Bible

⁶ “Ngako-ke khuluma kuyo indlu yaka-Israyeli, utsi: ‘Naku lokushiwo yiNkhosi Simakadze, itsi: Phendvukani! Gucukani nishiye letithico tenu, nikulahle konkhe lokunengekako ningasakwenti.

Hezekeli 14:6 Referencias Cruzadas

2 Tikhronike 29:6

Bobabe bebangaketsembeki; benta lokubi emehlweni aSimakadze Nkulunkulu wetfu, bamfulatsela. Besusa buso babo endzaweni lapho kuhlala khona Simakadze, bamfulatsela.

Isaya 2:20

Ngalelo langa bantfu bayawulahla tithico tabo emagundvwaneni nasemalulwaneni; yebo, tithico tabo tesiliva kanye netithico tabo tegolide, lababetentele kutikhonta.

Isaya 30:22

Niyawube seniyatedzelela letithico tenu letembeswe ngesiliva, naletitfombe tenu letimbonywe ngegolide, niyakutilahla khashane, kube shangatsi tidvwedvwe letingcolile, nitsi kuto: “Sukani la.”

Jeremiya 13:27

konkhe kuphinga kwakho, nako konkhe kushangashangiswa kwakho yinkhanuko, nebugwadla bakho lobulihlazo! Ngitibonile tento takho letisinengiso emagcumeni nasetikhotseni. Awu, nako kuwe, Jerusalema! Uyawuhlala ungcolile kuze kube ngunini?”

Hezekeli 14:4

“Ngako-ke khuluma kuwo uwatjele, utsi: ‘Naku lokushiwo yiNkhosi Simakadze, itsi: Nome ngabe ngumuphi kuma-Israyeli lofaka tithico enhlitiyweni yakhe, emise nelitje lelibi lekukhubekisa embikwebuso bakhe, bese uya kumphrofethi, mine Simakadze ngiyakumphendvula mine cobo lwami ngangekwebukhulu bekukhonta kwakhe tithico.

Hezekeli 16:63

Ngiyawutsi-ke nase ngikwentele inhlawulo yakho, yako konkhe loku lose ukwentile, bese uyakhumbula udliwe ngemahloni, ungaphindzi uwuvule umlomo wakho ngenca yalokuhlazeka kwakho lokungaka, kusho iNkhosi Simakadze.’ ”

Hezekeli 18:30

“Ngako-ke, awu, wenandlu yaka-Israyeli, ngiyawukwehlulela, ngulowo nalowo ngekwetindlela takhe, kusho iNkhosi Simakadze. Phendvukani! Gucukani kuto tonkhe tiphambuko tenu; khona-ke sono senu ngeke sibe kufa kwenu.

Hezekeli 8:16

Wase ungiyisa esibuyeni lesisekhatsi nekhatsi endlini yaSimakadze, lapho ekungeneni kwelithempeli, emkhatsini wemhubhe nelilati, kwakunemadvodza langema-25. Imihlane yawo ibheke ngasethempelini laSimakadze, buso bawo bubheke ngasemphumalanga, babekhotsamela lilanga ngasemphumalanga.

Hezekeli 8:6

Wase utsi kimi: “Ndvodzana yemuntfu, uyabona yini kutsi bentani, letintfo letinengeka kangaka letentiwa yindlu yaka-Israyeli lapha, tintfo letitangicoshela khashane kakhulu nendzawo yami lengcwele? Kodvwa usetawubona letinye tintfo letinengeka kakhulu kunaleti.”

Hoseya 14:8

Awu, Efrayimu, ngisenandzabani netithico? Ngiyawukuphendvula, ngikunakekele. Ngifanana nesihlahla lesiluhlata sesipheshula; kutsela kahle kwakho kuphuma kimi.”

Zefaniya 3:11

Ngalelo langa ungeke udliwe ngemahloni ngako konkhe lokubi lokwentile kimi, ngobe kulelidolobha ngiyawubesusa labo labajabula ngeligcabho labo. Ungeke uphindze utigcabhe etikwaleligcuma lami lelingcwele.

Zakhariya 1:4

Ningafanani nabokhokho benu, lekwatsi baphrofethi bakucala nabakhuluma kubo, batsi: Naku lokushiwo nguSimakadze longuSomandla, utsi: ‘Phendvukani etindleleni tenu letimbi nakulokubi lenikwentako.’ Kodvwa abazange bangilalele, futsi abanginakanga nekunginaka, kusho Simakadze.

Imisebenti yebaPhostoli 17:30

“Nkulunkulu watitsalalisela tikhatsi tekungati kwebantfu, kepha-ke manje sewuyala bantfu bonkhe etindzaweni tonkhe kutsi baphendvuke,

Imisebenti yebaPhostoli 26:20

kodvwa ngashumayela kusukela khona eDamaseko, naseJerusalema, nakulo lonkhe laseJudiya nakubetive ngimemetela kutsi abaphendvuke babuyele kuNkulunkulu bente imisebenti lekhombisa kuphendvuka.

Imisebenti yebaPhostoli 3:19

Ngako, phendvukani, nibuyele kuNkulunkulu, kuze esule licala letono tenu,

KubaseRoma 6:21

Natfolani-ke ngekwenta leto tintfo leseninemahloni ngato nyalo? Phela siphetfo saleto tintfo kufa!

1 Samuweli 7:3

Samuweli wakhuluma esiveni sonkhe saka-Israyeli, watsi: “Naniphendvukela kuSimakadze ngayo yonkhe inhlitiyo yenu, kufanele nitisuse tonkhe letithico tebetive kanye nabo-Ashtarothe benu, bese nitinikela kuSimakadze nikhonte yena yedvwa, yena-ke utawube sewuyanikhulula esandleni semaFilisti.”