Habakhuki 1:12 - Siswati 1996 Bible

¹² Awu, Simakadze, awusiye yini wena wasendvulo? Nkulunkulu wami, wena Longcwele wami, singeke sife. Awu, Simakadze, ubeke bona baseBhabhulona kutsi behlisele kitsi sijeziso. Awu, dvwala letfu, umise bona kutsi batewusishaya.

Habakhuki 1:12 Referencias Cruzadas

Genesisi 21:33

Abrahama wahlanyela sihlahla selitamariske eBherisheba. Wadvumisa Simakadze, Nkulunkulu waphakadze.

2 Emakhosi 19:25

“ ‘Awuzange uve yini? Ngakumisa kadzeni. Ngakuhlela ngemalanga asendvulo, manje sesikhatsi sekutsi kwenteke, kutsi ugucule emadolobha latinqaba, uwente tindvundvuma tematje.

Tihlabelelo 102:24

Ngitsi: “Hhawu, Nkulunkulu wami, ungaphangisi ungitsatse ngisakhula. Iminyaka yakho yetitukulwane netitukulwane.

Tihlabelelo 118:17

Ngingeke ngife, kodvwa ngitawuphila, ngibalise ngemisebenti yaSimakadze.

Tihlabelelo 149:2

Israyeli akajabule ngenca yeMdali wakhe, bantfu beSiyoni batfokote ngeNkhosi yabo.

Tihlabelelo 17:13

Vuka Simakadze! Hlangabeta lomubi umlahle phansi. Sindzisa umphefumulo wami kuye ngenkemba yakho.

Tihlabelelo 18:1

Ngiyakutsandza, Simakadze, wena, longemandla ami.

Tihlabelelo 74:12

Noko wena, Nkulunkulu, uyiNkhosi yami kwasemandvulweni; nguwe lowenta insindziso emhlabeni.

Tihlabelelo 90:1

Yebo, Simakadze! Wena ube siphephelo setfu etitukulwaneni nasetitukulwaneni.

Tihlabelelo 90:2

Ngaphambi kwekudalwa kwetintsaba, yebo, ungakawudali nemhlaba, kusukela phakadze kuze kube phakadze, wena Nkulunkulu ukhona.

Tihlabelelo 93:2

Sihlalo sakho sebukhosi seloku sema sicinile kwasemandvulweni, wena wawuvele ukhona kwasemaphakadzeni.

Isaya 31:1

Maye kulabo labaya eGibhithe bayewucela khona lusito, labetsembela emahhashini, betsembele nasebunyentini betincola tabo temphi, nasemandleni lamakhulu ebagibeli babo bemahhashi, kodvwa bangabuki kuLongcwele waka-Israyeli, nome-ke bafune lusito kuSimakadze.

Isaya 37:23

Ngubani lona lometfukile wamhlambalata? Ngubani lona bewumbhodlela umetfwalela emehlo? NguLongcwele waka-Israyeli!

Isaya 37:26

“Awuzange uve yini? Ngakumisa kadzeni. Ngakuhlela ngemalanga asendvulo, manje sesikhatsi sekutsi kwenteke, kutsi ugucule emadolobha latinqaba, wawaphihlita aba tindvundvuma tematje.

Isaya 40:28

Awati yini? Awukeva yini? Simakadze unguNkulunkulu waphakadze, uMdali wemikhawulo yemhlaba. Angeke adzinwe, futsi ngeke akhatsale, nekucondza kwakhe kute longakuphenyisisa.

Isaya 43:15

NginguSimakadze, Longcwele wenu, uMdali wema-Israyeli, iNkhosi yenu.”

Isaya 49:7

Naku lokushiwo nguSimakadze, uMhlengi, naLongcwele waka-Israyeli, kuye lowake wedzelelwa wenyanywa sive, kuyo inceku yebabusi, utsi: “Emakhosi ayawukubona asukume, tikhulu tiyawukubona tikhotsame, ngenca yaSimakadze lowetsembekile, Longcwele waka-Israyeli, lokukhetsile.”

Isaya 57:15

Ngobe nguloko lokushiwo nguLophakeme Losetulu, lolibito lakhe linguLongcwele, utsi: “Ngihlala etulu endzaweni lengcwele, kodvwa nakuye lodzabukile nalotfobekile emoyeni, kutewuvuselela umoya walabatfobekile nekuvuselela tinhlitiyo talabephukile emoyeni.

Jeremiya 30:11

Nginawe, futsi ngiyawukusindzisa. Noko ngiyatibhubhisa ngiticedze tonkhe letinye tive, lebengikusakatele kuto, kodvwa wena ngingeke ngikubhubhise ngikucedze. Ngiyawukujezisa ngikucondzise noko ngekwehlulela ngebucotfo bemtsetfo, ngingeke ngikuyekele uhambe nje ungasashaywa nawonile,’ kusho Simakadze.

Jeremiya 4:27

Naku lokushiwo nguSimakadze, utsi: “Live lonkhe litawuphundleka, noko ngingeke ngilibhubhise liphele nya.

Jeremiya 46:28

Ungesabi, wena Jakobe, nceku yami, ngobe nginawe,” kusho Simakadze. “Noko, nome ngitibhubhisa ngiticedza tonkhe tive, lapho ngikucoshele khona, wena angiyiwukubhubhisa ngikucedze. Ngiyawukujezisa nje kuphela, nako loko ngikwente ngalokufanele umtsetfo, ngobe ngingeke ngikuyekele nje ngingakushayi.”

Jeremiya 5:18

Simakadze utsi: “Noko ngisho nakulawo malanga ngingeke nginibhubhise nginicedze.

Sililo 5:19

Awu, wena Simakadze, uyabusa kuze kube phakadze. Sihlalo sakho sebukhosi sihlala sicinile titukulwane ngetitukulwane.

Hezekeli 30:25

Ngiyakuyicinisa imikhono yenkhosi yaseBhabhulona, kodvwa imikhono yaFaro iyawulenga ijikite. Ngulapho-ke bayawukwati khona kutsi mine nginguSimakadze, mzukwana ngibambisa inkhosi yaseBhabhulona inkemba yami ngesandla sayo, iyijikitisele bona baseGibhithe.

Mikha 5:2

Simakadze utsi: “Betlehema Efratha, nome ungulomunye wemiti lemincane yakaJuda, kodvwa ngiyawuveta kuwe umbusi loyawubusa sive saka-Israyeli. Lusendvo lwakhe luyawusukela kulolo lwaluvele lukhona kwasekucaleni.”

Habakhuki 3:2

Awu Simakadze, ngivile ngeludvumo lwakho; ngimangaliswa tento takho, wena Simakadze. Phindza utivusetele nangalamalanga etfu, tente tatiwe nangaletikhatsi tetfu. Elulakeni lwakho khumbula umusa.

Habakhuki 3:6

Nakema, kunyikanyika umhlaba, nakabuka, kutfutfumela tive. Tintsaba takudzala tiyahhihlika, nemagcuma akadzenidzeni ayagocana. Tindlela takhe taphakadze naphakadze.

Malakhi 3:5

“Ngako, ngiyawusondzela kini kutakwehlulela. Ngiyawushesha kutsi ngifakaze ngimelane netangoma, netiphingi, nabofakazi bemanga, ngimelane nalabo labadlelela tisebenti emaholo ato, labo labacindzetela bafelokati netintsandzane, bemuke betive emalungelo abo, kodvwa bangangesabi mine,” kusho Simakadze longuSomandla.

Malakhi 3:6

“Mine, Simakadze, angigucuki. Ngako nani titukulwane taJakobe, anikabhujiswa.

Imisebenti yebaPhostoli 3:14

Abengcwele alungile, kodvwa namala, namlahla, esikhundleni sakhe nacela Philatu kutsi anikhululele sigelekece.

Dutheronomi 32:4

“Yena uLidvwala, imisebenti yakhe iphelele; yebo, netindlela takhe tonkhe tilungile. Nkulunkulu lowetsembekile longakwenti lokubi, ucotfo akakhetsi muntfu.

Dutheronomi 33:27

Nkulunkulu waphakadze siphephelo sakho, ngaphansi ngimikhono yaphakadze. Uyawucosha titsa takho embikwakho, akhulume atsi: ‘Tibhubhise!’

1 kuThimothi 1:17

Kuyo iNkhosi yetikhatsi, lengabhubhi, nalengabonwa ngemehlo enyama, nalekungiyo yodvwa lenguNkulunkulu, akube ludvumo nebukhosi phakadze naphakadze. Amen.

1 kuThimothi 6:16

Nguye yedvwa longabhubhi lohlala ekukhanyeni lekungasondzeleki kuko, longazange asabonwe ngumuntfu, nalongeke abonwe ngumuntfu. Kuye akube ludvumo nemandla aphakadze. Amen.

KumaHebheru 13:8

Jesu Khristu akagucuki; nguye itolo, nalamuhla, naphakadze.

Sembulo 1:11

litsi: “Bhala encwadzini loko lokubonako, bese uyitfumela emabandleni lasikhombisa: lase-Efesu, nelaseSmuna, nelasePhegamu, nelaseThiyathira, nelaseSadesi, nelaseFiladelfiya, nelaseLawodisiya.”

Sembulo 1:8

“Mine ngingu-Alfa na-Omega,” kusho iNkhosi, Nkulunkulu, Somandla lokhona, nalabekhona, nalotako.

1 Samuweli 2:2

“Kute longcwele njengaSimakadze, kute nalomunye ngaphandle kwakho, kute lidvwala lelinjengaNkulunkulu wetfu.