Eksodusi 29:40 - Siswati 1996 Bible

⁴⁰ Lelizinyane lelitabonikelwa ekuseni libohambisana nemphuphu yakolo locolisakele leyikhilogremu yinye, lebhicwe nelitha yinye yemafutsa emncumo. Utsele ilitha yinye yeliwayini ibe ngumnikelo wesinatfo.

Eksodusi 29:40 Referencias Cruzadas

Genesisi 35:14

Kwase kutsi lapho akhuluma khona naNkulunkulu Jakobe wemisa litje lesikhumbuto, walitsela ngeliwayini nangemafutsa.

2 Emakhosi 3:20

Ngakusasa ekuseni, ngesikhatsi sekunikela ngemhlatjelo, emanti ageleta aphuma ngaka-Edomu! Live lagcwala emanti.

Eksodusi 16:36

Lesilinganiso lesasisemtsetfweni sasingemalitha labengaba ngema-20.

Eksodusi 29:39

Lizinyane lelinye utabolinikela ekuseni, lelinye ulinikele entsambama nakushona lilanga.

Eksodusi 29:41

Niyawunikela leli lelinye lizinyane entsambana kanye nalowo mnikelo walokutinhlavu nemnikelo wawo wesinatfo njengasekuseni. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze.

Eksodusi 30:24

nemakhilogremu langaba sitfupha ekhasiya; konkhe kukalwe ngesikalo lesisemtsetfweni. Ubengeta emalitha langaba mane emafutsa emncumo,

Isaya 57:6

Emkhatsini wematje labusheleleti asemifudlaneni ukhetsa tithico takho, tona titabelo takho. Yebo, utfululele kuto iminikelo yetinatfo, wanikela nangeminikelo yalokutinhlavu. Ngifanele ngeneliseke yini ngato tonkhe letintfo?

Hezekeli 20:28

Nangibafikisa eveni lengafunga kutsi ngitalinika bona, benelela kufika kulo, babona tonkhe tintsaba letiphakeme netihlahla letimacembe ato avoshokile, base besuka banikelela khona imihlatjelo yabo, benta iminikelo leyangicunula mine ngase ngiyatfukutsela, betfula imphepho yabo letsaphukako, batfulula iminikelo yabo yetinatfo.

Hezekeli 4:11

Ubophindze futsi ukale tinkomishi letimbili letinkhulu temanti lekufanele uwanatse ngetikhatsi letimisiwe.

Hezekeli 45:17

Kuyawuba ngumsebenti wakhe kutsi aletse tilwane letitawushiswa samuku, neminikelo yalokutinhlavu, neminikelo yesinatfo saso sonkhe sive saka-Israyeli ngemikhosi yekwetfwasa kwenyanga, nangemaSabatha, nangaleminye imikhosi. Kufanele aletse iminikelo yesoni, neminikelo yalokutinhlavu, neminikelo yekushiswa, neminikelo yebudlelwane, kuze atewuhlawulela tono tesive saka-Israyeli.’ ”

Hezekeli 45:24

Inkunzi iyinye nesihhanca sinye lesentiwe umhlatjelo, kufanele selekelwe ngemnikelo walokutinhlavu longemalitha langaba li-17 nencenye, nangemafutsa emncumo langemalitha langaba mane.

Hezekeli 46:11

Ngemalanga emadzili nangemikhosi lemisiwe, umnikelo walokutinhlavu uyawuba ngemalitha langaba li-17 nencenye, uhambisane nenkunzi yinye, nemalitha langaba li-17 nencenye lahambisana nesihhanca, nemazinyane etimvu nanome ngabe yini-ke leyo loyo lokhontako lafuna kuyinikela. Umnikelo lonjalo walokutinhlavu kufanele uhambisane nemalitha langaba mane emafutsa emncumo.

Hezekeli 46:14

Kufanele kwentiwe nemnikelo walokutinhlavu njalo nje ekuseni, kube ngufulaha longemakhilogremu langaba mabili, nemafutsa emncumo langaba lilitha linye nencenye yesitsatfu yelilitha kutewubhucwa ngawo lofulaha. Lemitsetfo yaleminikelo lena kuSimakadze iyawuhlala imile phakadze naphakadze.

Hezekeli 46:5

Sisinye sihhanca kufanele aselekele ngemnikelo walokutinhlavu longemalitha langaba li-17 nencenye, nelizinyane lilinye lemvu kufanele alelekele nganome yini lafuna kuyinikela. Umunye umnikelo walokutinhlavu kufanele awuletse nemalitha langaba mane emafutsa emncumo.

Hezekeli 46:7

Iyinye inkunzana, nesihhanca sisinye lomnikelo kufanele ube nemalitha langaba li-17 nencenye yalokutinhlavu, nemazinyane etimvu kufanele lombusi awelekele nganome yini lafuna kuyinikela. Wonkhe umnikelo walokutinhlavu longangemalitha langaba li-17 nencenye kufanele awengetele ngemalitha langaba mane emafutsa emncumo.

Hoseya 9:4

Bangeke bayitfululele kuSimakadze iminikelo yeliwayini, kantsi nemihlatjelo yabo ingeke imjabulise. Imihlatjelo lenjalo kubo iyawufanana nesinkhwa salabalilako; bonkhe labayidlako bayawungcola ngekwemtsetfo. Lokudla kuyawuba kwabo; kungeke kungeniswe ethempelini laSimakadze.

Joweli 1:13

Yembatsani emasaka, nine baphristi, nilile. Khalani, nine lenikhonta elatini. Wotani nitekwembatsa emasaka busuku bonkhe, nine lenikhonta embikwaNkulunkulu wami, ngobe umnikelo walokutinhlavu kanye nemnikelo wetinatfo sebakugodlile, akuseti endlini yaNkulunkulu wenu.

Joweli 1:9

Iminikelo yalokutinhlavu neyetinatfo seyiyekelwe endlini yaSimakadze. Baphristi sebayakhala, labo labakhonta embikwaSimakadze.

Joweli 2:14

Ngubani lowatiko? Mhlawumbe angaba nesihawu, ashiye sibusiso, bese kuba ngiminikelo yalokutinhlavu neyetinatfo yaSimakadze Nkulunkulu wenu.

Levithikusi 23:13

kanye nemnikelo walokutinhlavu longemakhilogremu langaba mabili afulaha lobhicwe nemafutsa. Lowo ngumnikelo lowentiwa ngemlilo kuSimakadze, liphunga lelinuka lusi lolumnandzi kuSimakadze. Niyakuwunikela kanye nemnikelo weliwayini longagcwala lilitha linye.

Levithikusi 6:13

Lomlilo kufanele uhlale uvutsa lapha etikwelilati, ungacali ucime.”

Numeri 15:24

nakwenteka-ke nona ngesiphosiso, nangabe sive sonkhe besingati, kufanele sive sinikele ngenkunzana yinye ibe ngumnikelo wekushiswa, liphunga lelinuka lusi lolumnandzi kuSimakadze, kanye nemnikelo walokutinhlavu, nemnikelo walokunatfwako, kanye nesiphongo sinye kube ngumnikelo wesono.

Numeri 15:7

kunikelwe kanye neliwayini lelingaba yilitha nencenye, kube ngumnikelo wesinatfo. Kunikele kube liphunga lelinuka lusi lolumnandzi kuSimakadze.

Numeri 28:10

Lowo-ke kuyawuba ngumnikelo wekushiswa wemaSabatha onkhe ngetulu kwalona loshiswa onkhe emalanga kanye nemnikelo wawo wesinatfo.’ ”

Numeri 28:24

Ngaleyo ndlela niyakwenta umnikelo wekudla lowentiwa ngemlilo onkhe emalanga, kuze kuphelele lamalanga lasikhombisa, kube liphunga lelinuka lusi lolumnandzi kuSimakadze. Uyakwengetelwa ngetulu kwalomnikelo wekushiswa lowentiwa onkhe emalanga kanye nemnikelo wawo wesinatfo.

Numeri 28:5

libe nemnikelo walokutinhlavu lokuyikhilogremu yinye yafulaha wakolo lobhicwe nemafutsa emncumo langaba yilitha yinye.

Numeri 29:16

Niyakwengeta ngembuti yinye lendvuna lengumnikelo wesono, ngetulu kwalomnikelo wekushiswa lowentiwa onkhe emalanga kanye nemnikelo wawo walokutinhlavu newesinatfo.

Numeri 4:16

“Eleyazare, indvodzana ya-Aroni, umphristi, nguye lotawuphatsa emafutsa etibane, nemphepho lenuka kamnandzi, neminikelo yafutsi yalokutinhlavu, nemafutsa emgcobo, abe liso etikwalo lonkhe lithende lekukhontela nako konkhe lokukulo, ngisho etikwayo yonkhe indzawo lengcwele nako konkhe lokukuyo.”

Dutheronomi 32:38

Sebaphi bonkulunkulu labadla emanoni emihlatjelo yabo, banatsa liwayini leminikelo yabo yekunatsa? Abavuke batenisita! Ababe sivikelo senu, banivikele!

KubaseFiliphi 2:17

Kukholwa kwenu kungumhlatjelo wenu lonikelwa kuNkulunkulu. Nome ingati yami beyingengetwa kuwo lomhlatjelo, mine bengingajabula, sijabule kanye nani nonkhe.