Danyela 4:3 - Siswati 1996 Bible

³ “Maye, tikhulu tibonakaliso takhe, maye, tinemandla timangaliso takhe! Umbuso wakhe ngumbuso waphakadze; bukhosi bakhe buyawuhlala bukhona titukulwane ngetitukulwane.

Danyela 4:3 Referencias Cruzadas

Jobe 25:2

“Ligunya nekwesabeka kwaNkulunkulu losungula kuthula etulu emazulwini.

Tihlabelelo 104:24

Awu, Simakadze! Maye, minyenti imisebenti yakho! Yonkhe uyente ngekuhlakanipha; umhlaba ugcwele tidalwa takho.

Tihlabelelo 105:27

Benta tibonakaliso taSimakadze emkhatsini wabo, netimangaliso eveni lakaHhamu.

Tihlabelelo 145:13

Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane. Simakadze wetsembekile kuto tonkhe tetsembiso takhe. Unemusa kuyo yonkhe imisebenti yakhe.

Tihlabelelo 66:7

Nguye lobusa ngemandla kuze kube phakadze. Emehlo akhe ahlala alindze tive, labo labanenkhani abangatikhukhumeti. Cabanga.

Tihlabelelo 72:18

Akabongwe Simakadze, Nkulunkulu, nguye longuNkulunkulu wema-Israyeli, nguye yedvwa lowenta timangaliso.

Tihlabelelo 77:19

Indlela yakho yadzabula lwandle, umvila wakho uselwandle lolujulile, noko tinyatselo takho tatingabonakali.

Tihlabelelo 86:10

Ngobe wena umkhulu, ungumenti wetimangaliso, nguwe wedvwa longuNkulunkulu.

Tihlabelelo 92:5

Maye, mikhulu imisebenti yakho, Simakadze! Imicabango yakho ijule kakhulu.

Isaya 25:1

Awu, Simakadze, wena unguNkulunkulu wami, ngiyakukuphakamisa, ngilidvumise Libito lakho, ngobe ngekwetsembeka kwakho lokuphelele wente tintfo letimangalisako, tintfo letahlelwa endvulo.

Isaya 28:29

Konkhe loku kuphuma kuSimakadze longuSomandla, lomangalisako ekwelulekeni kwakhe, nalobabatekako ngenhlakanipho yakhe.

Isaya 9:7

Umbuso wakhe uyawukhula, kuthula nenhlalakahle kungeke kuphele. Uyawubusa esihlalweni sebukhosi saDavide, nasembusweni wakhe. Uyakuwumisa awusekele ngekwemtsetfocotfo nangekulunga, kusukela kuleso sikhatsi kuze kube nguphakadze naphakadze. Inshisekelo yaSimakadze longuSomandla iyawukwenta loko.

Jeremiya 10:10

Kodvwa Simakadze nguyena Nkulunkulu sibili, unguNkulunkulu lophilako, iNkhosi yaphakadze. Nakatfukutsele yena, kutfutfumela umhlaba, tive atikhoni kumelana nelulaka lwakhe.

Danyela 2:2

Ngako inkhosi yabita tangoma, nebatsebuli, nebaphenguli, kanye nabosonkhanyeti kutsi batemtjela kutsi ubhudzeni. Batsi kube befike beme embikwenkhosi,

Danyela 2:44

“Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.

Danyela 4:17

“ ‘Sincumo simenyetelwa titfunywa; labangcwele bamemetela sigwebo, kuze kutsi labaphilako bati kutsi Longetulu Kwako Konkhe wengamele yonkhe imibuso yebantfu, futsi uyinika nome ngubani latsandza kumupha yona, bese ubeka etikwayo labo labatfobeke kakhulu kunabo bonkhe bantfu.’

Danyela 7:14

Wanikwa emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.”

Danyela 7:27

Lapho-ke kubusa, nemandla, nebukhulu bemibuso yonkhe lengaphansi kwelizulu, kuyawunikelwa etandleni talabangcwele, sive saLongetulu Kwako Konkhe. Umbuso wakhe kuyawuba ngumbuso waphakadze naphakadze, bonkhe babusi bayawukhotsama kuye bamkhonte, bamlalele.’

KubaseRoma 11:33

Maye, kujula kwemcebo, nekwenhlakanipho, nekwelwati lwaNkulunkulu! Ngubani nje longaphenya kwehlulela kwakhe ahlolisise imfihlakalo yetindlela takhe?

Dutheronomi 4:34

Sikhona yini sithico lesake setama kutikhetsela sive emkhatsini waletinye tive ngetivivinyo, nangetibonakaliso letimangalisako, nangetimangaliso, nangemphi, nangesandla lesinemandla, nangengalo leyelulekile nome ngetento letinkhulu naletimangalisako, njengato tonkhe letintfo Simakadze Nkulunkulu wenu latenta kini eGibhithe emehlweni enu nibuka?

1 kuThimothi 1:17

Kuyo iNkhosi yetikhatsi, lengabhubhi, nalengabonwa ngemehlo enyama, nalekungiyo yodvwa lenguNkulunkulu, akube ludvumo nebukhosi phakadze naphakadze. Amen.

KumaHebheru 1:8

Kodvwa ngeNdvodzana utsi: “Sihlalo sakho sebukhosi, Nkulunkulu, sisaphakadze naphakadze. Kulunga yindvuku yebukhosi bakho lobusa ngayo bantfu bakho.

KumaHebheru 2:4

Nkulunkulu wafakaza kanye nabo ngetibonakaliso, nangetimangaliso, nangemisebenti yemandla leyehlukahlukene, nangetipho taMoya Longcwele lataba ngekwentsandvo yakhe.

1 yaPhetro 4:11

Nangabe umuntfu akhuluma, akakhulume ngekwemavi aNkulunkulu; nangabe umuntfu akhonta, akakhonte ngemandla lawanikwa nguNkulunkulu, kuze kutsi kuko konkhe kudvunyiswe Nkulunkulu ngaJesu Khristu, lekukuye bukhosi nemandla phakadze naphakadze. Amen.

Sembulo 11:15

Ingilosi yesikhombisa yashaya licilongo layo, kwase kuba nemisindvo lemikhulu kakhulu ezulwini itsi: “Umbuso walomhlaba sengumbuso weNkhosi yetfu, naKhristu wakhe; iyawubusa kuze kube phakadze naphakadze!”