Amose 2:4 - Siswati 1996 Bible

⁴ Naku lokushiwo nguSimakadze, utsi: “Bantfu bakaJuda bone kwaze kwengca, ngaleso sizatfu ngingeke ngihlale ngingabajezisi. Bawulahlile umtsetfo waSimakadze, bangete batigcina timiso takhe, bedukiswe tithico, lekutithico letatikhontwa boyisemkhulu.

Amose 2:4 Referencias Cruzadas

2 Emakhosi 17:19

naso sive sakaJuda asizange siwugcine umyalo waSimakadze Nkulunkulu waso. Salandzela imikhuba lemibi leyase ifakwe baka-Israyeli.

2 Tikhronike 25:14

Watsi Amasiya nakabuya kuyawubulala baka-Edomu, wabuya netithico tebantfu baseSeyiri, wafike watimisa taba tithico takhe, wakhotsama embikwato, washisa imihlatjelo embikwato.

2 Tikhronike 30:7

Ningalingisi boyihlo nabomnakenu, labangazange betsembeke kuSimakadze, Nkulunkulu waboyisemkhulu, ngenca yaloko wabenta baba yinkoyoyo yekuhlupheka, njengobe nibona nje.

Nehemiya 1:7

Sone kakhulu emehlweni akho. Asikayigcini imiyalo, netimiso kanye nemitsetfo yakho lowasinika yona ngenceku yakho, Mosi.

Nehemiya 9:26

“Kodvwa abazange bakulalele, esikhundleni saloko bakuhlubuka, umtsetfo wakho bawufulatsela. Babulala baphrofethi bakho labebabayala kutsi babuyele kuwe; benta tinhlamba letesabeka kabi kakhulu.

Isaya 28:15

Niyatigabatisa nitsi: “Sesente sivumelwane nekufa, sente sivumelwane nelithuna. Ngesikhatsi sivunguvungu lesishisako siphephula sendlula kitsi, singeke sisitsintse tsine, ngobe sente emanga aba siphephelo setfu, sente emacebo aba yindzawo yetfu yekubhaca.”

Isaya 44:20

Utondla ngemlotsa, edukiswe yinhlitiyo lekhohlisiwe; angeke atisindzise nome atsi: “Lentfo lesesandleni sami sangesekudla ayisiwo yini emanga?”

Jeremiya 16:11

Ubobe sewuyabatjela utsi: ‘Kungobe boyihlo bangilahla balandzela labanye bonkulunkulu, babasebentela, babakhonta. Bangifulatsela mine, bangete bawugcina umtsetfo wami, kusho Simakadze.

Jeremiya 16:12

Kodvwa nine senitiphetse kabi kakhulu kwendlula boyihlo. Bukani nje kutsi ngulowo nalowo wenu uyilandzela kanjani inkhani yenhlitiyo yakhe lembi, esikhundleni sekutsi ahloniphe mine.

Jeremiya 17:27

Kodvwa naningangilaleli mine, kutsi nigcine liSabatha lami lingcwele ngekutsi ningetfwali nalomncane umtfwalo ngesikhatsi nisangena emasangweni aseJerusalema ngeliSabatha, ngako ngiyawube sengilumeka umlilo longacimeki emasangweni aseJerusalema, loyawudla netinqaba tayo.’ ”

Jeremiya 6:19

Awu mhlaba, vani! Ngitakwehlisela inhlekelele kulesive, sitselo semacebo abo, ngobe abakawalaleli emavi ami, bawala nemtsetfo wami.

Jeremiya 8:2

Ayawukwenekwa elangeni, nasenyangeni, nakuto tonkhe tinkhanyeti tasemazulwini lababekutsandzile, bakusebentela, bakulandzela, bakufuna, bakukhotsamela. Akayiwubutfwa futsi akayiwungcwatjwa, kodvwa ayawuba njengemfucuta yetibi lelahlwe emhlabatsini.

Jeremiya 8:9

Labahlakaniphile bayawuhlazeka; bayawujabhiswa, babhajwe elugibeni. Njengobe balilahlile livi laSimakadze nje, banakuphi-ke kuhlakanipha?

Jeremiya 9:14

Esikhundleni saloko, balandzele inkhani yetinhlitiyo tabo, balandzela boBhali, njengemfundziso yaboyise.”

Hezekeli 13:22

Njengobe nibajabhisile labalungile ngalamanga enu, ngibe mine ngingakabadzabukisi, nangenca yekutsi nikhutsate lababi kutsi bangaphendvuki etindleleni tabo letimbi kuze basindzise timphilo tabo,

Hezekeli 20:13

“ ‘Noko bantfu baka-Israyeli bangivukela ehlane. Bangete bahamba ngetimiso tami, bayala imitsetfo yami, noko umuntfu loyilalelako uyawuphila ngayo, bawona kakhulu emaSabatha ami. Ngako ngatsi ngitawutfululela lulaka lwami etikwabo ngibabhubhisele ehlane.

Hezekeli 20:16

ngobe bayala imitsetfo yami, bangete bahamba ngetimiso tami, bawona emaSabatha ami. Ngobe tinhlitiyo tabo babetinikele ngalokuphelele etithicweni tabo.

Hezekeli 20:18

Ngakhuluma kubantfwababo ehlane, ngatsi: “Ningatilandzeli timiso taboyihlo, futsi ningagcini nanemitsetfo yabo, nome nitingcolise ngetithico tabo.

Hezekeli 20:24

ngobe abayilalelanga imitsetfo yami, kodvwa batala timiso tami, bawona emaSabatha ami, emehlo abo anaka tithico taboyise.

Hezekeli 20:30

“Ngako-ke khuluma kuyo indlu yaka-Israyeli, utsi: ‘Naku lokushiwo yiNkhosi Simakadze, itsi: Nitawutingcolisa yini nani njengaloku boyihlo benta bakhanukana netitfombe tabo letenyanyekako?

Hezekeli 22:28

Baphrofethi balo bahuca letento tabo ngemcakaco ngemibono leyinkhohliso nekubhula lokungemanga. Batsi: ‘Naku lokushiwo yiNkhosi Simakadze,’ kube Simakadze angakaze wakhuluma lutfo.

Hezekeli 22:8

Utedzelele tintfo tami letingcwele, wawona emaSabatha ami.

Hoseya 12:2

Simakadze ubeka Juda licala, utawujezisa Jakobe njengekwetindlela takhe, amkhokhele ngangekwemisebenti yakhe.

Hoseya 12:3

Esiswini wabamba sitsendze semnakabo; asangumuntfu lomdzala walwa naNkulunkulu.

Hoseya 6:11

“Nawe-ke, Juda, ulungiselwe kuvunwa. “Nase ngifuna kubuyisela inhlalakahle kubantfu bami,

Amose 1:3

Naku lokushiwo nguSimakadze, utsi: “Bantfu baseDamaseko bone kwaze kwengca, ngaleso sizatfu ngingeke ngihlale ngingabajezisi. Baphatse sive sakaGileyadi ngensila nakabuhlungu, basihhudlisa phansi njengetihliphi nanjengetihhudlo.

Amose 3:2

“Ngini kuphela lenginikhetsile emkhatsini wato tonkhe tive temhlaba; ngako-ke ngitanijezisa ngenca yato tonkhe tono tenu.”

Mikha 6:12

“Bantfu bakini labatinjinga baphanga laba labamphofu, nani nonkhe ningulabacalemanga nalabakhohlisanako.

Habakhuki 2:18

“Sinamsebenti muni sithico, njengaloku sibatwe ngumuntfu nje? Yebo, sisitani sitfombe lesifundzisa emanga? Ngobe lowo losibatako wetsembela emsebentini wetandla takhe, wakha tithico letingeke tize tikhulume.

KubaseRoma 1:25

Baguculele liciniso laNkulunkulu balenta emanga; bakhonta, badvumisa indalo kunekukhonta nekudvumisa uMdali lokunguyena abongeka kuze kube phakadze. Amen.

1 kubaseThesalonika 4:8

Ngako-ke lomelana naloku, akamelani namuntfu, kodvwa umelene naNkulunkulu lonipha Moya wakhe Longcwele.

1 yaPhetro 1:18

Nati kutsi nahlengwa ngani ekuhambeni kwenu lokwakulite, lenakunikwa bokhokho. Anihlengwanga ngetintfo letigugako njengesiliva negolide;

Tikhulu 10:6

Baka-Israyeli baphindza benta lokubi emehlweni aSimakadze. Bakhonta boBhali, nabo-Ashtarothe, nabonkulunkulu base-Aramu, nabonkulunkulu baseSidoni, nabonkulunkulu baseMowabi, nabonkulunkulu bema-Amoni, nabonkulunkulu bemaFilisti. Baka-Israyeli bafulatsela Simakadze, bamyekela, bangabe basamkhonta,