2 Tikhronike 1:8 - Siswati 1996 Bible

⁸ Solomoni waphendvula Nkulunkulu, watsi: “Wentela Davide, babe wami, umusa lomkhulu, nami wangenta ngaba yinkhosi esikhundleni sakhe.

2 Tikhronike 1:8 Referencias Cruzadas

2 Samuweli 22:51

Nguwe, Nkhosi, umenti wankhulu, inkhosi yakho uyiphe kuncoba timphi ngetimphi, wentele logcotjiwe wakho umusa wakho longapheli, yebo, Davide netitukulwane takhe phakadze naphakadze.”

1 Emakhosi 3:6

Solomoni waphendvula watsi: “Wentela inceku yakho, Davide babe wami, umusa lomkhulu, ngobe yena abetsembekile kuwe futsi alungile anenhlitiyo lecotfo. Wena uchubeke nawo lomusa wakho kuye, waze wamupha nendvodzana yakhe letawuhlala esihlalweni sakhe sebukhosi lamuhla nje.

1 Tikhronike 17:16

Inkhosi Davide yase iyahamba yayawungena ethendeni lebukhona baSimakadze, yafike yahlala phansi, yathandaza yatsi: “Bengingubani mine, Simakadze Nkulunkulu? Yona indlu yaketfu beyiyini kutsi ungangihola kuze kube ngulapha?

1 Tikhronike 28:5

Emkhatsini wawo onkhe emadvodzana ami lamanyenti Simakadze langiphe wona, Simakadze ukhetse umsa wami Solomoni kutsi ahlale esihlalweni sebukhosi sembuso waSimakadze abuse ka-Israyeli.

1 Tikhronike 29:23

Ngako Solomoni wahlala esihlalweni sebukhosi saSimakadze waba yinkhosi esikhundleni seyise Davide. Wachuma, nema-Israyeli onkhe amhlonipha.

1 Tikhronike 29:28

Wafa asamdzala kakhulu, asatenelisile ngemphilo lendze, nangemcebo, nangekuhlonishwa. Solomoni, umsa wakhe, watsatsa sikhundla sakhe waba yinkhosi.

Tihlabelelo 86:13

Ngobe umusa wakho mkhulu kimi, uwephulile umphefumulo wami ekujuleni kwekufa.

Tihlabelelo 89:49

Awu, Nkhosi yami! Uphi kantsi umusa wakho lomkhulu lowawubonakalisa endvulo, wenta sifungo ngawo kuDavide ngekwetsembeka kwakho?

Isaya 55:3

Bekani indlebe, nite kimi; vanini, kuze imiphefumulo yenu itewuphila. Ngitakwenta sivumelwane saphakadze nani, nginiphe tibusiso lengatetsembisa Davide.