Mathaayo 6:2 - ÎVUKU RÎA ÛVORO MWARO

² “Kwoguo, vîndî îrîa mûravecana indo cienyu nîguo itethie athîni, mûtikendage kwîyonania wata ûrîa mvinga ciîkaga vîndî îrîa irî îvoerorî na thokorî. Mvinga icio ciîkaga ûguo nîguo iganagwe nî andû. Nîramwîra na ma atî, mvinga icio nîirîkîtie kûrîvwa mûcara wacio.

Mathaayo 6:2 Referencias Cruzadas

Thaburi 112:9

Arutaga na ûtaana, akava andû arîa athîni; ûtaana wake ûtûûraga tene na tene; ethagîrwa na vinya na nîwîtigîrîtwe.

Thaburi 37:21

Andû arîa aganu mavoyaga kîndû na maticokagia, nwatî andû arîa athingu nîatana na nîmavecanaga indo ciao.

Nthi 19:17

Mûndû ûrîa ûvecaga mûthîni kîndû, nîta gûkovithia Ngai-Mûnene, Ngai-Mûnene nîakaamûrîva nîûndû wa ciîko ciake.

Nthi 20:6

Andû eengî metucaga atî nî aro, nwatî mûndû mwîvokeku angîuma kû?

Mûvunjia 11:2

Onjorithia mbeca ciaku na njîra nyîngî, nîûndû ndwîcî ûrîa gûgekara.

Isaia 10:6

Natûmire Asîria akaverithie vûrûri ûtaicî Ngai, namwathire akaverithie andû arîa mandakarîtie; akamacune indo na amatave, na amakinyange ta ndaka njîrarî.

Isaia 58:7

Nî kûgaana irio cienyu na arîa avûtu na kwamûkîra athîni arîa maûrûraga mîciîrî yenyu. Mwona mûndû arî njaga, mûkamûva nguo na mûtikarege gûtethereria andû enyu.

Isaia 9:17

Kwoguo Mwathani ndakenagua nî anake aya, ndarî na ntha na ciana ciao cia ndigwa na aka ao a ndigwa, nîûndû andû onthe matiîcî Ngai, na nîeki naaî na maragia maûndû ma waganu. Nîûndû wa maûndû mau monthe, marakara make tî mathiru, nwatî nwa atambarûkîtie njara yake nîguo îverithanie.

Hosea 8:1

Vuva karumbeta! Nthû cienyu ciûkîte ta ndiiû, kûtharîkîra nyomba ya Ngai-Mûnene, nîûndû andû akwa nîmaunîte kîrîkanîro kîrîa narûthire nao, na magîtiganîria watho wakwa.

Mathaayo 15:7

Mue mvinga ino! Na kaî mûrathi Isaia nîwamenyaga rîrîa aarathire ûvoro ûmwîgiî-î!

Mathaayo 16:3

Na kîraûko rîrîa matu marî mathimbu mugaga atî, ‘Ûmûnthî nî gûkura.’ Mue nwa mûrorie matu na mûkamenya ûrîa mûthenya ûkwîthîrwa wîkariî, nwatî mûtingîvota gûtaûra maûndû marîa marekîka mavinda mama!

Mathaayo 22:18

Nake Jesû nîwamenyaga mîvango îo yao mîcûku. Kwoguo nîwamacokeria atîrî, “Mûrangeria nîkî mue mvinga ino?

Mathaayo 23:5

Mekaga maûndû mao monthe nîguo monwe nî andû. Nîmaramagia ithitû ciao na nîmaracavagia mîcivi ya nguo ciao!

Mathaayo 23:6

Mendaga gwîkarîra itî cia ageni a gîtîîo marugarî na gwîkarîra itî cia mbere mavoerorî.

Mathaayo 24:51

Mwathi wa ndungata îo nî akaamîverithia mûno na amîtuîre ûndû ûmwe na mvinga. Kûu nîkuo andû makaarîra na marîe magego nîûndû wa ûrûrû.

Mathaayo 5:18

Nîramwîra na ma atî, îgûrû na nthî itarî nthiru gûtirî gacunjî wana kamwe ka Watho gakaathengutua. Gûtirî gacunjî wana kanini atîa gakaathengutua maûndû monthe marîa marî wathorî matarî mavingu.

Mathaayo 6:16

“Na vîndî îrîa mûrenyerekia tigagani kwiria mothiû menyu ta ûrîa mvinga ciîkaga. Mvinga ciragia mothiû ma cio nîguo cionwe nî andû onthe atî nîirenyerekia. Nîramwîra na ma atî, mvinga icio nîirîkîtie kûvewa mûcara wacio.

Mathaayo 6:3

Nwatî vîndî îrîa mûravecana indo cienyu itethie athîni, mavecageni na njîra îrîa wana arata enyu arîa anene matakûmenya.

Mathaayo 6:5

“Na vîndî îrîa mûkûvoya, mûtikavoyage ta mvinga! Mvinga ciendaga kûvoya irûngamîte mavoerorî na makathîkanorî ma njîra, nîguo cionwe nî andû. Nîramwîra na ma atî, mvinga icio nîirîkîtie kûvewa mûcara wacio.

Mathaayo 7:5

We mvinga îno! Amba ûrute gîting'û kîrîa kîrî rithorî rîaku we mwene na nîûkûvota kwona waro ûkîruta kîvuti kîrîa kîrî rithorî rîa mûrwanyûkwe.

Maariko 12:39

na mendete kwîthuurîra itî cia mbere mavoerorî na gwîkarîra itî cia ageni a gîtîîo marugarî.

Maariko 7:6

Nake Jesû nîwamacokerie atîrî, “Na kaî Isaia nîwamenyaga rîrîa aarathire ûvoro ûmwîgiî-î! Mue mûrî mvinga. Wa ta ûrîa kwandîkîtwe atî: Ngai arauga atîrî, ‘Andû aya mamvecaga gîtîîo na mîromo, nwatî ngoro ciao irî kûraca mûno nanie.

Luka 11:41

Vandû va gwîka ûguo, vecagani athîni ûtethio na indo cionthe cienyu nî igûtuîka ntheru.

Luka 11:43

“Kaî mue Afarisai mûrî na thîna-î! Nîûndû mue mwendaga gwîkara itîîrî cia mbere mavoerorî wa vamwe na gûkethua na njîra îrî na gîtîîo rîrîa mûrî thokorî!

Luka 12:33

Endiani indo cionthe cienyu na mûcoke mûve athîni mbeca icio. Îîthondekereni tûveeti twa mbeca tûrîa tûtangîthira. Îigîreni mûthithû wenyu îgûrû kwa Ngai, kûrîa ûtangînyiva nîûndû gûtirî mwîi ûngîûkinyîra wana kana mûthûa ûngîûcûkia.

Luka 12:56

Mue mvinga ino! Nwa mûrorie nthî na îgûrû na mûgataûra ûrîa gûgwîkara. Nîndûî vi kîratûma mûrigwe nî vata wa mavinda mama?

Luka 13:15

Nake Mwathani nîwamûcokerie atîrî, “Mue mvinga ino! Kûrî mûndû wana ûmwe gatagatîrî kenyu ûtathaûraga ng'ombe kana mvunda yake nîguo amîvire îthiî îkanyue manjî mûthenya wa thavatû?

Luka 20:46

“Îîmenyerereni kuumana na arimû a Watho arîa mendete kûrûra mekîrîte kanjû ndaca, na mendete gûkethua na gîtîîo kîîngî mûno marî thokorî; na methuuragîra itî cia mbere mavoerorî na makethuurîra vandû varîa varo mûno marugarî.

Luka 6:24

“Na kaî mue andû arîa atongu rîu mûrî na thîna-î! Nîûndû mue mûrî anyitu kîrîa kîmwîganaga ûtûûrorî wenyu.

Luka 6:42

Ûngîvota kwîra mûrûanyûkwe atî nîûkûmûruta kîvuti kîrîa kîrî riithorî rîake atîa, wa rîrîa we ûtangîvota kwona gîting'û kîrîa kîrî riithorî rîaku? We mvinga îno! Amba ûrute gîting'û kîrîa kîrî riithorî rîaku, nîguo ûvote kwona waro ûkîruta kîvuti kîrîa kîrî riithorî rîa mûrûanyûkwe!

Johana 13:29

Nwatî nîûndû Judasi nîke waigaga kathandûkû ka mbeca, arutwa amwe meciragia atî nîkwa Jesû aamwîraga athiî akagûre indo irîa ciavataranagia kîrugorî, wana kana atî athiî akave athîni kîndû.

Johana 5:41

“Nie ndiracaria ngumo kuuma kûrî andû.

Johana 5:44

Mue mûcaragia ngumo kuuma kûrî andû arîa engî, nwatî mûtigeragia kûgîa na ngumo kuuma kûrî ûrîa arîke Ngai.

Johana 7:18

Mûndû ûrîa waragia na wathani wake ke mwene, nîgwîkumia ekumagia. Nwatî mûndû ûrîa wendaga ûrîa wamûtûmire akumue nîwîthagîrwa arî mwîvokeku na ndaveenanagia.

Ciîko 10:2

Ke aarî mûndû mwîtîkia Ngai mûno, na vamwe na andû onthe a mûciî wake nîmaagoocaga Ngai. Nake nîwavothagîra Ayahudi arîa maarî athîni arî na ûtaana na akavoyaga Ngai mavinda meengî.

Ciîko 10:31

na akîmbîra atîrî, ‘Korinelio! Ngai nîwîguîte mavoya maku na atî we nîûvothagîra athîni.

Ciîko 10:4

Nake Korinelio nîwamûroririe amakîte mûno na akîmûria atîrî, “Nîndûî Mwathani?” Nake mûraika ûcio nîwamûcokerie atîrî, “Ngai nîwegua mavoya maku. Ke nîwona atî we nîûvothagîra athîni na nîwakûririkana.

Ciîko 11:29

Nao arutwa nîmaatwire marute mbeca kûringana na ûvoti wa mûndû wa mûndû nîguo matethie etîkia arîa maatûûraga Judea.

Ciîko 24:17

“Na vuva wa gwîkara kavinda karaca ndathiîte Jerusalemu, nînaacokire kuo nthiîte kûvira mbeca kûrî andû etû na kûruta magongoona.

Ciîko 9:36

Nakuo îtûûrarî rîa Jopa nîkwarî na mûndûmûka mwîtîkia wetagwa Tabitha. (Rîîtwa rîu rîake na Kîngiriki nî Dorokasi, na nî ta kuga “nthiia.”) Nake nîwamenyerete gwîkaga ciîko mbaro na gûtethagia athîni.

Aroma 12:8

Ûrîa ûrî na kîveo gîa kûûmanîrîria, nwanginya aûmanagîrîrie. Ûrîa ûrî na kîveo gîa kûvecana indo ciake, nî avecanage na ûtaana. Mûndû ûrîa ûrî na kîveo gîa ûtongoria nî atongoragie na kîîo. Mûndû ûrîa ûrî na kîveo gîa kwîgucanîra ntha nîegucanagîre ntha akenete.

1Akor 13:3

Nwa mvecane indo cionthe irîa nîrî nacio, wana nginya nwa ndute mwîrî wakwa nîguo ûvîvue, nwatî ethîrwa ndirî na wendani, ndingîgunîka wana vanini.

Agal 2:10

Ûndû ûrîa maatûririe nî atî tûririkanage andû arîa marenda ûtethio marî ikundirî ciao, ûndû ûrîa mbîthîrîtwe ngîrirîria.

Aefeso 4:28

Mûndû wa wonthe wîaga nîatigane na wîi na ambîrîrie kûruta wîra nîguo ethûkûmagîre na njîra îno mbagîrîru kîrîa avatarîte ûtûûrorî na avotage gûtethia athîni.

1Ath 2:6

Tue tûtiacaria ûrîa tûngîkumua nîmue kana nî andû engî.

1Tim 6:18

Atha itonga ituîke andû aro na ituîke itonga cia mawîra marîa maro. Maathe matuîke andû ataana na andû a kûgaana indo ciao na andû arîa engî.

File 1:7

Mûrû wa îthe wetû, wendo waku nîûtûmîte ngîe na gîkeno kînene na ûkanyûmîrîria mûno! We nîûcanjamûrîte ngoro cia andû onthe a Ngai.

Ahib 13:16

Mûtikariganîrwe nî gwîka waro na gûtethania mûndû na ûrîa wîngî, nîûndû mama nîmo magongoona marîa makenagia Ngai.

1Pet 4:11

Mûndû ûrîa ûvunjagia nwanginya avunjagie ndûmîrîri ya Ngai, na ûrîa ûtungataga nwanginya atungatage na vinya îrîa aveetwe nî Ngai, nîguo Ngai akumague na njîra ya Jesû Kristû maûndûrî monthe marîa mûgeekaga nîûndû riiri wonthe na vinya nî ciake tene na tene. Ameni.

1Sam 15:30

Saûlo nîwacokirie na akiuga atîrî, “Nie nînjîvîtie, nwatî mva gîtîîo mbere ya atongoria a andû akwa a Isiraeli. Tûcoke nawe nîguo ngagooce Ngai-Mûnene, Ngai waku.”