Danieli 6:8 - ÎVUKU RÎA ÛVORO MWARO

⁸ Rîu mwathi wetû mûthamaki ruta watho na wandîkwe na ûwîkîre kîrore, nîguo ndûkagarûrwe. Watho ûyû ûkaarûmagîrîrwa nî andû a Mede na a Perisi, na ndûkaagarûrwa.”

Danieli 6:8 Referencias Cruzadas

Esita 1:19

Mûthamaki, ethîrwa nîûkwona kwagîrîrîte athana vûrûri wonthe uge Vashiti ndagakinya mbere ya mûthamaki rîngî. Athana kwandîkwe mawathorî ma Perisia na Media nîguo watho ûyû ndûkagararwe. Nake Vashiti ndagacoke gûka varî we, we Ahasuerusi mûthamaki wetû. Naguo ûvoro wake wa gûtuîka mûka wa mûthamaki ûvewe mwîrîtu wîngî ûrîa mwaro kûmûkîra.

Esita 3:12

Kwoguo mûthenya wa îkûmi na îthatû wa mweri wa mbere, Hamani nîwetire tûrani tuonthe twa mûthamaki na akîmera mandîke maarûa na nthiomi na mîandîkîre ya andû onthe vûrûrirî ûcio. Nîwaugire ivirîrwe arîrîria a vûrûri arîa anene, arîa anini, na andû arîa onthe mathanaga mavûrûrirî. Maarûa icio ciandîkîtwe vandûrî va mûthamaki Ahasuerusi na akîvûrwa mûvûri na gîcûvî gîake.

Esita 8:10

Moridekai nîke wandîkithirie maarûa icio igîkagîrwa mûvûri na caini ya mûthamaki. Andû arîa maaviraga maarûa icio maathiîcaga na mbarathi cia kwa mûthamaki. Mbarathi icio nîciavinyûraga mûno.

Esita 8:3

Esita nîwacokire akîarîria mûthamaki rîngî, nîwegwîthirie nthî magûrûrî make akîrîraga. Nîwamûthaithire arûngamie mûvango mûcûku ûrîa warûthîtwe nî Hamani wa gûcûkangia Ayahudi.

Esita 8:8

Ûndû wa wonthe wathanîtwe nî mûthamaki wîkwe na ûgekîrwa mûvûri na caini yake, ndûngîgarûrwa. Kwoguo nwa mwandîkîre Ayahudi ûndû wa wonthe ûrîa mûngîenda. Nwa mwandîke mûgîtûmagîra rîîtwa na mûvûri wa mûthamaki, nîûndû ûndû wa wonthe wathanîtwe nî mûthamaki na ûgekîrwa mûvûri wake ndûngîgarûrîka.”

Thaburi 94:21

Manyitanagîra vamwe nîguo mathirie andû arîa athingu, na matucagîra andû arîa matarî na mavîtia maûragwe.

Isaia 10:1

Andû arîa matungaga mawatho matarî ma kîvooto kaî marî na thîna-î, mavîtûkagia mawatho ma kûvinyanîrîria.

Danieli 5:28

PARESI; nî kuga atî ûthamaki waku nîmûgaanie kûrî Aamende na Aaperisi.”

Danieli 6:12

Nao onthe nîmaathiîre kûrî mûthamaki na magîcuka Danieli atîrî, “Mûthamaki wetû, kinthî ndûrutire watho na wekîra kîrore, wauga atî îvinda rîa mîthenya mîrongo îthatû, mûndû ûrîa ûkaavoya ngai kana mûndû wîngî tiga we Mûthamaki wetû, nîkwa agaaikua îrimarî rîa mînyambû?” Mûthamaki nîwacokirie atîrî, “Nîguo kûrî, kûringana na watho wa Amede na Aperisia, ûrîa ûtangîgarûrwa.”

Danieli 6:15

Nwatî nthû cia Danieli nîciacokire kûrî Mûthamaki na ikîmwîra atîrî, “Mûthamaki wetû, menya atî kûringana na mawatho ma Amede na Aperizi, gûtirî, îtua kana watho ûvecanîtwe nî Mûthamaki ûngîgarûrwa.”

Mathaayo 24:35

Îgûrû na nthî nîikaathira, nwatî ciugo ciakwa itikaathira.