2 Гоё һайхан эрхэ тангил Сионой басаган усадхагдаха.
Үзэм жэмэсэй сэсэрлигэй хооһон талмай дээрэ ори гансаараа үлэһэн харууһалагшын урса гэрхэн мэтэ, ургасын таряалан дээрэ үлэгшэ үбһэн отог мэтэ Сионой басаган бүһэлэгдэн, ори гансаараа үлэбэл.
Би түрэхэ гэжэ үбдэжэ байһан эхэнэрэй оог хашхараанда адли дууе, түрүүшын үхибүүгээ түрэжэ байһан эхэнэрэй ёолоходол абяае, гараа һунгаад: «Аа, би гасаланда орооб! Намайе алахаяа тэдэ ерэнэ!» – гэжэ амияа абажа ядажа байһан Сионой үхинэй абяае соносооб.
Оо, гай даа! Уур сухал дундаа Эзэн Сионой басагые шэб харанхыгаар хүреэлөө. Израилиин гоо һайханиие огторгойһоо газар руу шэдээ. Уур хилэнтэ үдэртөө нангин үргөө тухайгаашье мартаа.
Иерусалим! Шамда юу гэжэ хэлэхэбиб, юунтэй жэшээлхэбиб? Сионой басаган, шамайе юунтэй сасуулха, яажа һатааруулхабиб? Гай зоболоншни тэнгис далайдал хизааргүй. Хэн шамайе аргалжа шадахаб?
Амтатай эдеэ хоол эдидэг байһан зон мүнөө гудамжануудаар гэдэһээ үлдэжэ үхэжэ байна. Шад улаан һайхан хубсаһа үмдэдэг байһан зон мүнөө хаядаһанай амһартаар эдеэ хоол бэдэрнэ.
Таанадай дунда эгээл зөөлэн, һайн сэдьхэлтэй, урдань юугээршье дуталдаагүй эхэнэр бүһэлэгдэһэн хото соо эдихэ юумэгүй болоходоо, һая түрэһэн үхибүүгээ, мүн набтаһаа эдихэ. Үбгэнтэеэшье, үхи хүүгэдтэеэшье тэрээнһээ хубаалдахагүй.
