Rm 2 - Meta’

Ŋwìə̀ wɨə sob mɨsaʼi ɨchî nɨ kuʼnɨ

¹ Kɨ̀ àwɔ̀ kɨə we, tɨrə̀ ghà e ni, “Chəi mə̀ kəʼ kyerɨ” ənɨ àwɔ̀ ə sob mɨsaʼi bə̂d cherə. Àyɨə kyerɨ ni ənɨ àwɔ̀ ə sob ɨsaʼi wə̀d cherə, à wɨə zɨ̀ ɨsaʼi ɨgwɨ ne, ɨmbə̀ʼ ɨghəm nɨ àwɔ̀ we nɨə sob mɨ̀sàʼi wɨə ghɨ̀ àmei ɨnû mbe nɨ məd ə bə̀ ghɨ̀ə̀.

² Tɨ̀ kyerɨ ni Ŋwìə̀ wɨə saʼə bə̂d mbe nɨə ghɨ̀ tɨkwɨrɨ ənû tɔ̂ ɨchî nɨ kuʼnɨ.

³ Kɨ̀ àwɔ̀ kɨə we, à wa kɔndɨ ni ənɨ àwɔ̀ ə sob mɨsaʼi ɨgwɨ ə bə̂d mbe nɨə ghɨ̀ tɨkwɨrɨ ənû tɔ̂, əne à wɨə bə̀ kɨrɨ ghɨ̀ ɨnû rəŋgu, ni à we tɨ̀ à nòrə̀ tɨ ənɨ ɨchî nɨ Ŋwìə̀ bɨrɨ saʼ əwe ə?

⁴ À wɨə wa tə̀ə̀nɨ̀ ɨ̀chɔ̀m nɔnɔʼ we nɨ Ŋwìə̀ ə ghɨ̀ ənɨ ə ne, ɨchî nɨ wɨ sàŋ ni à ghɨ ɨnû mbe nɨ chəi mbɨ kuʼu, bə̀ fɔrɨ ɨchî nɨ wɨə yimə fîŋ ə? Chəi à kyerɨ ni ɨ̀chɔ̀m Ŋwiə̀ yɨ nɨ ghɨ ni à beŋ e fîŋ ə?

⁵ Àyɨə ɨchî nɨ à berɨ fîŋ nɨ kǎ, nɨ chəi ənɨ tɨ̀ mbɨ bèŋ, əne kyerɨ ni Ŋwìə̀ wɨ rəbə sə i ɨtəm sə əbɔʼ ne. Əne wɨ̀ bɨrɨ zɨ ɨchə nɨ ka ɨgwɨ ne əni ze nɨ wɨə sob mɨsaʼi ɨchî nɨ kuʼnɨ.

⁶ Ŋwìə̀ bɨrɨ chwɨ wə̀d mɔʼ mɔʼ ɨchî nɨ wɨ̀ faʼi.

⁷ Wɨ̀ bɨrɨ naʼ ɨ̀tènɨ̀ rɨ mì əmbɨ ə bə̂d mbe nɨə yimə fîŋ ghɨ̀ ɨ̀chɔ̀m, nɨə kə̀b ɨzeŋɨ zeŋɨ mbɨ ɨwumnɨ fɔrɨ ənû nɨ chəi bə̂d bɨrɨ nɔ kwɨ.

⁸ Ŋwìə̀ bɨrɨ sə ɨtəm bə̀ chə mbe nɨə kə̀b ɨghɨ àmei əmbɨ tə nyamnyod, nɨ mbɨə bə̀ ton ɨnû mbe nɨ yeʼ mbɨ rəsìʼ ɨmbə̀ʼ sɨə ghɨ̀ yeʼ ɨnû ɨzɨg.

⁹ Ŋgəʼ nɨ che əbɔ bɨrɨ nyɨ ɨgun ə wə̀d jìm we nɨə ghɨ̀ ɨnû rɨbɔ̀ŋ. Zɨ̀ bɨrɨ be nyɨ ɨgun mɨ̀Jû, beenɨ nyɨ ɨgun ə bə̂d mbe nɨ kaʼi mɨ̀Jû.

¹⁰ Àyɨə Ŋwìə̀ bɨrɨ naʼ ɨzeŋɨ zeŋɨ mbɨ ɨwumnɨ fɔrɨ əbɔrəbɔd əmbɨ ə bə̂d mbe nɨə ghɨ̀ ɨnû chɔ̀m. Wɨ̀ bɨrɨ be naʼ əmbɨ mɨ̀Jû, beenɨ nàʼ əmbɨ ə bə̂d mbe nɨ kaʼi mɨ̀Jû,

¹¹ ɨmbə̀ʼ ɨghəm nɨ chəi Ŋwìə̀ ə ghɨ̀ ɨghə.

¹² Bə̂d mɨjìm mbe nɨə ghɨ̀ ɨnû rɨbɔ̀ŋ, nɨ chəi mbɨ kyerɨ tɨkə rɨ Mose, bɨrɨ nim ɨghabɨ bə̂d nɨ chəi mbɨ kyerɨ tɨkə te. Àyɨə Ŋwìə̀ bɨrɨ nɨŋ tɨkə rɨ Mose saʼ bə̂d mɨ̀jìm mbe nɨ kyerɨ rɨkə, àyɨə ɨ mbɨə kɨrɨ ghɨ ɨnû rɨbɔ̀ŋ,

¹³ ɨmbə̀ʼ ɨghəm nɨ kaʼi bə̂d mbe nɨə zu rɨkə mbe ə ghɨ̀ ɨnû nɨ kuʼnɨ. À yɨ mbe nɨə ghɨ̀ ɨnû mbe nɨ tɨkə ə ghàə̀ nɨ Ŋwìə̀ bɨrɨ ben ni ɨnû mɨ̀mə̌d ə kùʼnɨ̀.

¹⁴ Ənɨ bə̂d mbe nɨ kaʼi mɨ̀Jû, nɨ chəi mbɨ kyerɨ tɨkə rɨ Mose, ghɨ ɨnû mbe nɨ yeʼ ɨŋga rɨ̀kə̌ ɨchî nɨ zɨə nɔʼ rɨŋga fîŋ tɨ mɨ̀mə̌d, əne mbɨ fə chwi ni tɨkə te tɨ ɨŋga fîŋ tɨ mɨ̀mə̌d, ka à be yeʼi ni chəi mbɨ kyerɨ tɨkə rɨ Mose.

¹⁵ Ɨ mbɨə chwiə ni mbɨ fə ŋwàʼnɨ̀ ɨnû ze nɨ yeʼ ɨŋga rɨ̀kə̌ ɨŋga fîŋ tɨ mɨ̀mə̌d. Fîŋ ze nɨə saʼə mɨ̀mə̌d ə bə̀ chwiə ni à yɨ rəsìʼ. Tɨkɔndɨ tɨ mɨ̀mə̌d bɨrɨ sɨə saʼə mɨ̀mə̌d ɨmbə̀ʼ ɨnû nɨ kuʼnɨ fɔrɨ ɨmbə̀ʼ mbe nɨ chəi mbɨ kuʼnɨ.

¹⁶ Ɨkə̂n chɔ̀m we nɨ mɨə ghàə̀ ə chwi ni əni ze nɨ Ŋwìə̀ bɨrɨ saʼ ɨsɨg ənjìm ə Yeso Kristo, wɨ̀ bɨrɨ bɨ saʼ tɨkɔndɨ te nɨ yeʼ ənə̀mə.

Ənû nɨ tɨkə rɨ Mose gha ɨmbə̀ʼ mɨ̀Jû

¹⁷ À yeʼ àwɔ̀? À wɨə ghàə̀ ni tə yɨə Jû. À wɨə nuŋ e fîŋ yeʼ ɨgwɨ rɨkə rɨ Mose. À wɨə bə̀ goŋ ɨgɔ̂ ɨmbə̀ʼ ɨchî nɨ à kyerɨ ə Ŋwiə̀.

¹⁸ À kyerɨ ənû ze nɨ wɨə kə̀b ni à ghɨ ə. À fə kwembɨ rɨkə kyerɨ ənû nɨ kuʼnɨ.

¹⁹ À kàŋ kyerɨ e ni tə wɨə yimə mbàŋ əmbɨ ɨfɨgɨ. À bə̀ kàŋ kyerɨ e ni tə yɨ ɨzeŋɨ zeŋɨ əmbɨ ə bə̂d mbe nɨ yeʼ ɨŋga ɨsɨ firɨ.

²⁰ À wɨə ghàə̀ ni tə wɨə kəərɨ ɨneŋ. À wɨə bə̀ ghàə̀ ni tə wɨə chwi ɨnû əmbɨ ə bɔn kwa. À wɨə ghà əne ɨmbə̀ʼ ɨchî nɨ à kyerɨ ni ɨwe jìm mbɨ rəsìʼ jìm wɨ ɨŋga rɨkə.

²¹ À mɨ yeʼə chwi ɨnû əmbɨ ə bə̂d cherə, chəi ənɨ tɨ̀ à bə̀ chwi əmbɨ e ɨnyod ə? À mɨ yeʼə ghàə̀ ni tɨ bə̂d jɨ ə, à wɨə wa bə̀ jɨ ə?

²² Àwɔ̀ we nɨə ghàə̀ ni tɨ wə̀d ni i ɨwi kɨ̀ ɨnom wə̀d cherə, à wɨə wa bə̀ ni ɨwi kɨ̀ ɨnom wə̀d cherə ə? Àwɔ̀ we nɨə bànə̀ mbɨ̀anèŋ, à wɨə wa jɨ rɨŋga mbàn tɨ mɨ̀ŋwìə̀ ə?

²³ Àwɔ̀ we nɨə goŋ ɨgɔ̂ ni tə kyerɨ tɨkə, à wɨə wa tìbrɨ̀ə̀ Ŋwiə̀ ɨchî nɨ àwɔ̀ ə gù rɨkə te ə?

²⁴ Ə zɨ ɨŋga Ə̀ŋwàʼnɨ̀ ə Ŋwiə̀ ni, “À yɨ mbə̀n ə ghɨ̀ ni bə̂d mbe nɨ kaʼi mɨ̀Jû zɔ̀m ə Ŋwiə̀.”

²⁵ Ənû nɨ ne mbaŋə̀ yɨ ənû ə chɔ̀m əwù ze nɨ à nùŋ rɨkə. À mɨ yeʼə gùə̀ rɨkə, əne à fə sɨ ɨghabɨ ni chəi mbɨ kɨrɨ ne əwe.

²⁶ Mbaŋə̀ ze nɨ chəi mbɨ kɨrɨ ne əməd mɨ yeʼə ghɨ̀ ɨnû mbe nɨ yeʼ ɨŋga rɨ̀kə̌, njɨ chəi mbɨ wa bɨrɨ nɨŋ ni mbɨ fə nè əməd ə?

²⁷ Mbaŋə̀ ze nɨ chəi mbɨ kɨrɨ ne məd, àyɨə ɨ wɨə nùŋ rɨkə, bɨrɨ zɨ ɨsaʼi ɨgwɨ ne, àwɔ̀ we nɨ kyerɨ rɨkə mbɨ bə̀ nè əwe, àyɨə chəi àwɔ̀ ə nùŋ rɨkə te.

²⁸ Ka wə̀d yɨ i Jû rəsìʼ àmei ɨmbə̀ʼ ɨchî nɨ à yɨə Jû gywɨ əməd. Chəi ənû nɨ mbɨ ne mbaŋə̀ ə chwi ni məd yɨə sɨə Jû.

²⁹ Wə̀d yɨə Jû rəsìʼ ɨŋga fîŋ. Ənû nɨ ne mbaŋə̀ yɨ ənû rɨŋga fîŋ. À yɨə bə̀ yeʼ ənû nɨ Əzwî Ŋwiə̀ ə ghɨ̀ə̀. Ka Jû rəsìʼ yɨ i ɨchî nɨ mbɨ ŋwaʼnɨ ɨŋga ə̀ŋwàʼnɨ̀. Kaʼi bə̂d ə wumnɨ ə Jû rəsìʼ. À yɨə Ŋwiə̀ ə wumnɨ əməd.