Mə̀Hibrù 1 - Meta’

Ŋwìə̀ fə chè ənjìm i Wan ghàm əmbɨ ə bə̂d

¹ À nyaʼa əŋwe, Ŋwìə̀ nyaʼa chè ənjìm mbi bə̂d ɨ̀kə̀n ghàm əmbɨ mba mɨ̀mbǎʼ rəŋwe. Ɨ wɨə nyaʼə ghɨ̀ əne ɨghəm nɔnɔʼ bə̀ fɔrɨ ənɨ mɨchî nɔnɔʼ.

² Àyɨə ɨŋga nyùmə̀ wɔ̂ nɨ sɨ nwìə̀, wɨ̀ fə ghàm ɨ na ənjìm i Wan we nɨ wɨ̀ nyaʼa nuŋ ənɨ əjɨnəb ɨgwɨ ɨghɨjìm. Wɨ̀ nyaʼa bə̀ chè ənjìm məd tekɨ ɨsɨg.

³ Wan we wɨə chwi ɨchî nɨ ɨzeŋɨ zeŋɨ Ŋwìə̀ ə teə. Ɨnû jìm ɨmbə̀ʼ əməd mbɨə chwi ɨchî nɨ Ŋwìə̀ ziə yeʼ ə. Ɨ wɨə ghɨ̀ə̀ ni ɨsɨg chub ɨchî nɨ wɨ yeʼ ə. Ɨ wɨə ghɨ̀ əne ənjìm ɨka we nɨ yeʼ ənɨ ɨŋgam məd. Ənɨ wɨ̀ nyaʼa fə ghɨ̌ Ŋwiə̀ waʼ ɨnû rɨbɔ̀ŋ bə̂d, wɨ̀ nyaʼa chub əbà əbɔ ə jɨg ə Məd we nɨ berɨ ɨka jìm.

Wan Ŋwìə̀ ə dabə

⁴ Ŋwìə̀ nyaʼa ghɨ ni Wan məd dabə chè mbɨ̀aŋgɨrə̀, ɨchî nɨ ɨkum we nɨ wɨ̀ nyaʼa naʼ ɨ bɔ bə chè wɨ mɨ̀mə̌d.

⁵ À kɨ əmbɨ aŋgɨrə̀ wi nɨ Ŋwìə̀ nyaʼa kweʼ gha ɨ bɔ ni, “Àwɔ̀ yɨ mɨ Wan, tə̀chɔ̀ŋ mə fə sɨ e Mbǎʼ ə”? Kɨ̀ à kɨ̀ əmbɨ aŋgɨrə̀ wi nɨ wɨ̀ nyaʼa gha ɨ bɔ ni, “Mə bɨrɨ yeʼ Mbǎʼ məd, məd bɨrɨ yeʼ mɨ Wan ə”?

⁶ Ənɨ Ŋwìə̀ nyaʼa cha i wan fə̀d ɨŋga ɨsɨg, wɨ̀ nyaʼa ghà ni, “Mbɨ̀aŋgɨrə̀ Ŋwìə̀ mɨ̀jìm berɨ wumnɨ əməd.”

⁷ Wɨ̀ nyaʼa ghà ɨmbə̀ʼ mbi mbɨ̀aŋgɨrə̀ ni, “Wɨ̀ ghɨ̀ ni mbi mbɨ̀aŋgɨrə̀ yeʼ ɨghabɨ ɨfə, bə̀ ghɨ̀ ni mbi bə̂d ə̀fàʼì yeʼ ɨghabɨ mɨnemɨ ɨwid.”

⁸ Àyɨə wɨ̀ nyaʼa ghà ɨmbə̀ʼ i Wan ni, “À bɨrɨ chub ɨgun e ətən ɨfɔ̀n koŋ koŋ, kyɨə Ŋwiə̀. À wɨə tùmbɨ̀ə̀ mbe bə̂d ɨchî nɨ kuʼnɨ.

⁹ À wɨə ghaʼə ɨnû nɨ kuʼnɨ bə̀ bànə̀ mbe nɨ chəi mbɨ kuʼnɨ, əne Ŋwìə̀, e Ŋwìə̀ fə zɔʼ e ənɨ mɨwud ɨmbə̀ʼ ɨghaʼi swi ɨŋga e fîŋ. Wɨ̀ fə zɔʼ e chè ɨchî nɨ wɨ̀ zɔʼ mbe bɔŋgɔb.”

¹⁰ Wɨ̀ nyaʼa bə̀ ghà ni, “Àwɔ̀ Ə̀nùŋɨ̀sɨg, nyaʼa tekɨ si tɨ ənɨ ɨkɔ. À nyaʼa tekɨ ɨkaŋ ənɨ mbe ɨbɔ.

¹¹ Si mbɨ ɨkaŋ bɨrɨ nim, àyɨə à bɨrɨ tènə̀. Si mbɨ ɨkaŋ bɨrɨ chə̀ə̀rɨ̀ ɨghabɨ ə ngywɨ̌.

¹² À bɨrɨ gwiʼ si bə̀ gwiʼ ɨkaŋ ɨchî nɨ mbɨə gwiʼ ə ngywɨ̌. Si mbɨ ɨkaŋ bɨrɨ kwepɨ ɨchî nɨ mbɨə kwepɨ ə ngywɨ̌. Àyɨə à wɨ e ɨchî. Chəi mbe ɨghəm ɨwu bɨrɨ nɔ mì.”

¹³ À kɨ əmbɨ aŋgɨrə̀ wi nɨ Ŋwìə̀ nyaʼa kweʼ ghà ni, “Chub ənɨ mɨ əbɔ ə jɨgɨ pè ənɨ mə baŋ mbe bə̂d pə̀n əne ghɨ̀ ni mbɨ yeʼ ɨghɨ nɨ à bɨrɨ teerɨ mbe ɨwu ɨgun ə”?

¹⁴ Ɨmbə̀ʼ mbɨ̀aŋgɨrə̀ mɨ̀jìm yɨ ɨzwî nɨə fàʼə̀, nɨ Ŋwìə̀ nyaʼa tom ni mbɨ weerɨ bə̂d mbe nɨ bɨrɨ jwɨ̀ rəŋgəʼ ə?