Kòlosè 4 - Meta’

¹ Mɨ̀mbǎʼ ə̀fàʼì, mbə̀ ghɨ mbɨ mbə ɨ̀bòʼò ɨchî nɨ kuʼnɨ bə bɔŋ. Mbə̀ kyerɨ ni mbə bə̀ berɨ Mbǎʼ ə̀fàʼì ɨkaŋ.

Tɨkə cherə

² Mbə̀ kɔŋgɨ ə Ŋwiə̀ ənɨ mɨ̀nyùmə̀ jìm. Mbə mɨ yeʼə kɔ̀ŋgɨ̀ə̀, mbə̀ chub ɨkyèʼe bə̀ nàʼə̀ məben-əwe ɨ bɔ.

³ Mbə̀ bə kɔŋgɨ ə Ŋwiə̀ ə ɨgwɨ na, ɨmbə̀ʼ wɨ̀ naʼ əpan ni tɨ̀ gha ɨnû mbe nɨ yeʼ ənə̀mə ɨmbə̀ʼ ə Kristo. À yɨ ɨnû mbe ghɨ ni mə̀ yeʼ ə nəb ndəŋ.

⁴ Mbə̀ kɔŋgɨ ə Ŋwiə̀ ni mə̀ gha ɨnû mbe mbɨ zeŋ, àmei ɨchî nɨ mə kəʼ berɨ ghɨ̀.

⁵ Mbə̀ we əwən ɨchî nɨ mbə̀ə ghɨ̀ə̀ mbɨ ə bə̂d mbe nɨ kaʼi bə̂d Kristo. Mbə̀ nɨŋ əpan ze nɨ mbə̀ berɨ fàʼ mbɨ mɨ̀mə̌d ɨchî chɔ̀m.

⁶ Ɨŋgam we nɨə jwɨ rɨ ənɨ mbə mɨchû berɨ mɨə nə̀m ɨghabɨ ni mbɨ fə nùʼ ənɨ fɨ̀ŋgwaŋ. Mə kə̀b ni mbə̀ kyerɨ ɨchî nɨ wiirɨ ɨŋgam əmbɨ wə̀d jìm.

Ə̀chàʼrɨ̀ nɨ sɨ nwìə̀

⁷ Taikikùs nɨ yeʼ aŋgɔb nɨ mə̀ ghaʼi kwàʼ rɨŋgəʼ bɨrɨ gha ɨnû jìm ɨ nən ɨmbə̀ʼ əmɨ. Məd wɨə fàʼ ənɨ i fîŋ jìm. Məd yɨə bə wum aŋgɔb ə̀fàʼì ɨchî nɨ tɨə fàʼ əmbɨ Ə̀nùŋɨ̀sɨg.

⁸ Mə fə tom əməd ɨ nən ɨmbə̀ʼ ənû zɔ̂, ni mbə̀ kyerɨ ɨchî nɨ tɨ yeʼe. Mə bə̀ tom əməd ni wɨ̀ timbɨ əwən.

⁹ Məd wɨə yeʼe mbɨ Ònèsimùs, nɨ yeʼ aŋgɔb nɨ mə̀ ghaʼi kwàʼ rɨŋgəʼ. Məd wɨə bə̀ fàʼ ənɨ i fîŋ jìm. Məd yɨ wɨ mɔʼɔ rəbɔʼ nən. Mɨ̀mə̌d mbɔ̂ bɨrɨ gha ɨnû jìm mbe nɨ fə che əgha ɨ nən.

¹⁰ Àristakùs, nɨ mə yeʼ ə nəb ndəŋ mbɨ məd wɨə chàʼrɨ̀ əwən. Mak we nɨ məd mbɨ Banabàs yeʼ bɔn tɨ ənɨ əghaŋ ə wə̀d mɔʼ wɨə bə̀ chàʼrɨ̀ əwən. (Mbɨ fə gha ɨ nən ɨmbə̀ʼ əməd. Wɨ̀ mɨ yeʼe əsɨ nən mbə̀ nɨŋ əməd ɨchî chɔ̀m.)

¹¹ Yeso we nɨ mbɨə tɔŋ ənɨ Jostùs wɨə bə chàʼrɨ̀ əwən. Mbɔ̂ mei mɨ̀Jû mbe nɨ yeʼ əbɔʼ bə̂d mbe nɨə fàʼə̀ mbɨ num ɨmbə̀ʼ ənû ɨfɔ̀n ə Ŋwiə̀. Mbɨ fə kàŋ kəŋgɨ əmɨ kwàʼ ɨchî chɔ̀m.

¹² Epafràs, nɨ yeʼ wə̀d ə̀fàʼì Kristo, nɨ bə̀ yeʼ wə̀d rəbɔʼ nən wɨə chàʼrɨ̀ əwən. Ɨ wɨə kɔ̀ŋgɨ̀ ə Ŋwiə̀ kwàʼ rɨka ɨghəm jìm kɔndɨ əwən ni mbə̀ təm kàànɨ̀ bə̀ jeŋgɨ kyerɨ ɨnû jìm mbe nɨ Ŋwìə̀ kə̀bɨ.

¹³ Mɔ̌ yɨə zərɨmbin ɨ bɔ ni wɨ̀ fə faʼ kwàʼ rɨ̀kǎ ɨ nən bə̀ fàʼ kwàʼ rɨ̀kǎ əmbɨ bə̂d mbe nɨ yeʼ ə Laodisià fɔrɨ ə Hirapolìs.

¹⁴ Luk, nɨ yeʼ wə̀d ɨfuʼ nɨ mə̀ ghaʼi kwàʼ rɨŋgəʼ fɔrɨ ə Demàs bə̀ chàʼrɨ̀ əwən.

¹⁵ Mbə naʼ mɨ ə̀chàʼrɨ̀ əmbɨ ə bɔŋgɔb mbe nɨ yeʼ ə Laodisià, əmbɨ Nimfà fɔrɨ əmbɨ ə bə̂d Kristo mbe nɨə nyɨ ɨfetɨ ɨŋga nəb məd.

¹⁶ Ənɨ mbɨ fə foŋ ə̀ŋwàʼnɨ̀ zɔ̂ əkaʼ nən, mbə̀ zə ni mbɨ bə foŋ ɨŋga ɨfetɨ bə̂d Kristo we rɨ ə Laodisià. Mbə̀ bə zə ni mbə̀ foŋ ə̀ŋwàʼnɨ̀ ze nɨ nɔʼ rɨ ə Laodisià.

¹⁷ Mbə̀ gha əmbɨ Akipùs ni wɨ̀ maanɨ ə̀fàʼì ze nɨ Ə̀nùŋɨ̀sɨg zɨ ɨŋga tɨkyerɨ-ɨbɔ məd.

¹⁸ Àyɨə mɔ̌, Pɔ̂l ŋwàʼnɨ̀ ə̀chàʼrɨ̀ zɔ̂ ənɨ mɨ əbɔ. Mbə̀ kɔndɨ ɨchî nɨ mbɨ kod əmɨ ənɨ mɨ̀kàrə̀. Ŋwìə̀ ghɨ ɨ̀chɔ̀m ənɨ ə nən.