Jems 5 - Meta’

Ɨpatɨ əmbɨ ə bə̂d mbɔ̂n

¹ Mbə̀n bə̂d mbɔ̂n, mbə̀ zwetɨ! Mbə̀ chweŋ mɨsɨ, zə̀ʼ kwàʼ rɨkǎ ɨmbə̀ʼ ŋgəʼ nɔnɔʼ ze nɨə yeʼe ɨgwɨ nən!

² Mbɔ̂n ze nɨ mbə̀ berɨ fə bèŋ ənɨ ɨghɨ əko. Ɨsəʼɨ fə kud tə ngywɨ̌.

³ Gôl mbɨ ə sɨrɨvà we nɨ mbə̀ berɨ fə bèŋ ənɨ ɨghɨ əko. Ɨghɨ mbɔ̂ nɨ beŋ ənɨ ɨghɨ əko bɨrɨ yeʼ ənweenɨ ɨ nən ni mbə mbɨə ghɨ̀ əjə. Mbɔ̂n ze bɨrɨ tɔn əwən ɨchî nɨ ɨwid ə tɔ̀n ə wə̀d. Mbə fə fetɨ mbɔ̂n nùŋ ɨŋga ɨni mbɔ̂ nɨ sɨ nwìə̀.

⁴ Mbə̀ zə, bə̂d mbe nɨ nyaʼə fàʼ ɨŋga tə mbeŋ, nɨ mbə̀ nyaʼa yim ɨkab mɨ̀mə̌d ənɨ ɨ̀kǎ, mbɨə zə̀ʼ əwob ɨmbə̀ʼ əwən. Əwob ə bə̂d mbe nɨ nyaʼa kwəŋ mbə ɨghɨ fə pè ɨŋga ə̀tǒŋ ə Ŋwìə̀ Ə̀tùmbɨ̀ ɨsɨg.

⁵ Mbə fə chub ɨgwɨ ə si ɨŋga mbɔ̂n. Mbə mbɨə bə̀ ghɨ̀ àmei ɨnû mbe nɨə ghɨ̀ ni tə fîŋ bɔŋə. Mbə fə jɨg faŋ ɨghabɨ ə nyam nɨ mbɨə wo wàd.

⁶ Mbə fə sob ɨsaʼi zwiirɨ bə̂d nɨ chəi mbɨ gu ənû. Chəi ɨchî nɨ tɨ̀ mbɨ fè ə ɨnyod rɨ nən.

Ənû nɨ yim fîŋ əton ə ŋgəʼ

⁷ Mbɨ bɔŋgɔb, mbə̀ yim fîŋ pè əni ze nɨ Ə̀nùŋɨ̀sɨg bɨrɨ wɨrɨ yeʼe. Mbə̀ zə, wə̀d nɨə fàʼə̀ mbeŋ wɨə wòmə̀ ni ɨghɨjɨg kɔʼ ə mbeŋ. Ɨ wɨə yimə fîŋ wòmə̀ kɔ rɨ ənɨ mbə̀ŋ chubɨ wò pè ənɨ mbə̀ŋ ə sobə.

⁸ Mbə̀n bə̂, mbə̀ yim fîŋ ghɨ̀ ə ɨbenɨ kaanə ɨmbə̀ʼ ɨghəm nɨ Ə̀nùŋɨ̀sɨg bɨrɨ zambɨ yeʼe.

⁹ Mbɨ bɔŋgɔb, tɨ mbə̀ ghambɨ ə mbə bɔŋgɔb ɨmbə̀ʼ tɨ Ŋwìə̀ saʼ i əwən. Mbə̀ zə, wə̀d we nɨ bɨrɨ saʼ ɨsɨg fə sɨ i ɨchû nəb!

¹⁰ Mbɨ bɔŋgɔb, mbə̀ kɔndɨ bə̂d ɨ̀kə̀n mbe nɨ nyaʼə ghà ɨnû ənɨ ɨkum Ə̀nùŋɨ̀sɨg. Mbə̀ nɨŋ ənweenɨ rɨ əmbɨ mɨ̀mə̌d nɨ yim fîŋ əton ə ŋgəʼ.

¹¹ Mbə̀ zə, Ŋwìə̀ nyaʼa zɨ̀ əbɔrəbɔd ɨgwɨ mɨ̀mə̌d ɨmbə̀ʼ ɨghəm nɨ mbɨ nyaʼa nyiʼi. Mbə fə zu ɨchî nɨ Job nyaʼa nyiʼi bə̀ zə ɨchî nɨ Ŋwìə̀ nyaʼa ghɨ ɨ̀chɔ̀m ənɨ məd ənɨ ɨnwǐ. Ŋwìə̀ wɨə kɔə mɨsin bə̀ dììrɨ̀ə̀ bə̂d.

¹² Mbɨ bɔŋgɔb, ənû nɨ che ɨnû jìm yɨ ni tɨ mbə̀ kan ə, kɨ̀ à kɨ ənɨ ɨkaŋ, kɨ̀ à kɨ ənɨ ə si, kɨ̀ ənɨ əghɨ ə cherə nɨ tɨ̀ bə̂d kàn ɨgun. Mbə mɨ ben ənû ə mɔʼɔ, mbə̀ gha àmei ni, “Ee”. Mbə mɨ ton ənû ə mɔʼɔ, mbə̀ gha àmei ni, “Chə̂.” Mbə̀ ghɨ àmei əne ɨmbə̀ʼ tɨ Ŋwìə̀ zɨ i ɨsaʼi ɨgwɨ nən.

Ə̀kɔ̀ŋgɨ̀ nɨ wə̀d berɨ ben ə Ŋwiə̀ bɔŋ kɔ̀ŋgɨ̀

¹³ Wə̀d mɔʼɔ rəbɔʼ nən wɨə wa ə ŋgəʼ ə? Wɨ̀ kɔŋgɨ ə Ŋwiə̀. Wə̀d mɔʼɔ rəbɔʼ nən wɨə wa ghaʼrɨ əwi ə? Wɨ̀ kwerɨ ɨkyî yiirɨ ə Ŋwiə̀.

¹⁴ Wə̀d mɔʼɔ rəbɔʼ nən wɨə wa wɔ̀n ə? Wɨ̀ tɔŋ bə̂d mbe nɨə chà ɨfetɨ bə̂d Kristo mbɨ yeʼe kɔ̀ŋgɨ̀ ə Ŋwiə̀ ɨgwɨ məd, bə̀ zɔʼ əməd ənɨ mɨwud ənɨ ɨkum Ə̀nùŋɨ̀sɨg.

¹⁵ Ə̀kɔ̀ŋgɨ̀ ə wə̀d we nɨ ben ə Ŋwiə̀ bɨrɨ ghɨ ni wə̀d əwɔn we bɔtɨ. Ə̀nùŋɨ̀sɨg bɨrɨ ghɨ ni ɨnyod məd wɨrɨ kàànɨ̀. À mɨ yeʼ nɨ wɨ̀ ghɨ̌ ɨnû rɨbɔ̀ŋ mɔʼɔ, Ŋwìə̀ bɨrɨ waʼ ɨnû rɨbɔ̀ŋ mbe.

¹⁶ Əne mbə ben tə rɨ̀gùrɨ-ɨnû əkaʼ nən mbənə mbənə, kɔ̀ŋgɨ̀ ə Ŋwiə̀ ɨgwɨ mbə bɔŋgɔb, ɨmbə̀ʼ Ŋwìə̀ ghɨ ni mbə̀ bɔtɨ. Ə̀kɔ̀ŋgɨ̀ ə wə̀d we nɨ təm kùʼnɨ̀, ə berɨ ɨka kyeŋ nɨ ghɨ ənû ze nɨ wɨ̀ kɔŋgɨ ə Ŋwiə̀ nɔn.

¹⁷ Èlaijà yɨə nyaʼə wə̀d mɨ̀sɔŋɨchù ɨghabɨ ə mbǎ. Wɨ̀ nyaʼa kɔ̀ŋgɨ̀ ə Ŋwìə̀ ənɨ i fîŋ jìm ni tɨ mbə̀ŋ nɔ i. Əne chəi mbə̀ŋ nyaʼa bə nɔ ɨghəm ɨwu tad mbɨ əmɨg rɨ̀fuə.

¹⁸ Ənɨ wɨ̀ nyaʼa wɨrɨ kɔ̀ŋgɨ̀ ə Ŋwiə̀, Ŋwìə̀ nyaʼa ghɨ̀ mbə̀ŋ nɔ, tɨjɨg kɔʼ.

¹⁹ Mbɨ bɔŋgɔb, wə̀d mɔʼɔ rəbɔʼ nən mɨ fèbə̀ tɨ ənɨ rəsìʼ, wɨ cherə wɨrɨ nɨŋ əməd rəbɔʼɔ,

²⁰ wɨ̀ kyerɨ ni wə̀d we nɨ wɨrɨ nɨŋ wə̀d nɨ ghɨ̀ ɨnû rɨbɔ̀ŋ tɨ ənɨ ɨchî nɨ wɨ̀ febə, bɨrɨ chɨ ɨ̀tènɨ̀ wə̀d we nɨə ghɨ̀ ɨnû rɨbɔ̀ŋ rɨ ɨchû ɨvɨ, əne ghɨ̀ Ŋwìə̀ waʼ ɨnû rɨbɔ̀ŋ nɔnɔʼ mbe nɨ wɨ̀ nyaʼə ghɨ̀ə̀.