Jems 4 - Meta’

Ənû nɨ tindɨ ɨban ə Ŋwiə̀

¹ Ənû nɨ zɔ̀ŋ mbɨ ənû nɨ chɔb kɨ rɨ ə yi əkaʼ nən ə? Kaʼ à wa kɨ̀ i rɨ ənɨ ɨghɨ mbe nɨ tə fîŋ ə feenɨə, nɨ yeʼ mbe nɨə kɨə zɔ̀ŋ ɨŋga nən ə?

² Mbə mbɨə kə̀b ɨghɨ, àyɨə chəi mbə̀ berɨə, əne mbə mbɨə zwììrɨ ə bə̂d ɨmbə̀ʼ berɨ ɨghɨ mbe. Mbə mbɨə ghə̀ʼnɨ̀ ɨghɨ bə̂d, àyɨə chəi ənɨ tɨ̀ mbə nɨŋ, əne mbə mbɨə chɔbə bə̀ zɔ̀ŋə̀ ɨmbə̀ʼ nɨŋ ɨghɨ rəŋgu. Chəi mbə̀ berɨ ɨghɨ ɨmbə̀ʼ ɨghəm nɨ chəi mbə̀ə nɔnə rɨ əmbɨ ə Ŋwiə̀.

³ Mbə mbɨə nɔn ɨghɨ, àyɨə chəi mbɨə nàʼ ɨ nən ɨmbə̀ʼ ɨghəm nɨ mbə mbɨə nɔnə mbɨ rɨkɔndɨ rɨbɔ̀ŋ. Mbə mbɨə nɔn ɨmbə̀ʼ nɨŋ ghɨ̀ ɨnû mbe nɨ tə nyamnyod ə feenɨə.

⁴ Mbə yɨ ɨghabɨ məyi namɨ nɨə niirɨə mbaŋə̀! Chəi mbə̀ kyerɨ ni wə̀d we nɨə kə̀b jɨg ə̀sə̀ʼ mbɨ ɨsɨg yɨə wə̀d pə̀n Ŋwìə̀ ə? Əne wə̀d mɔʼɔ we nɨ ghaʼ ənû nɨ jɨg ə̀sə̀ʼ mbɨ ɨsɨg yɨə wə̀d pə̀n Ŋwìə̀.

⁵ Kɨ̀ mbə̀ wa kɔndɨ ni à yɨ ətu ə̀kǒ nɨ Ə̀ŋwàʼnɨ̀ ə Ŋwiə̀ ə ghà ni, “Ŋwìə̀ wɨə ghə̀ʼnɨ̀ Əzwî əməd ze nɨ wɨ̀ ghɨ ni zɨə yeʼ ɨŋga na.”

⁶ À yɨə Ŋwìə̀ ə ghɨ̀ ɨ̀chɔ̀m ənɨ ə na ɨmbə̀ʼ tɨ berɨ ɨka nɨ baŋ ɨnû rɨbɔ̀ŋ. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ wɨə tonə bə̂d mbe nɨə nɔ̀ ɨnyod, àyɨə ɨ wɨə ghɨ̀ ɨ̀chɔ̀m ənɨ mbe nɨə swi ɨnyod.”

⁷ Əne mbə̀ zuunɨ ə Ŋwiə̀ ənɨ ɨnû jìm. Mbə̀ ton ə Debɨ̀rə̀, əne wɨ̀ bɨrɨ nod i tɨ ənɨ ə nən.

⁸ Mbə̀ tindɨ ɨban ə Ŋwiə̀, əne wɨ̀ bɨrɨ bɨ tindɨ ɨban nən. Mbə̀n mbe nɨə ghɨ̀ ɨnû rɨbɔ̀ŋ, mbə̀ so mbə ɨbɔ! Mbə̀n mbe nɨ berɨ fîŋ rɨ̀be, mbə̀ zeŋnɨ tə fîŋ!

⁹ Mbə̀ kənə, dì bə̀ chweŋ mɨsɨ. Mbə̀ kwepɨ ɨchəʼrɨ ənɨ əwob, bə̀ kwepɨ ɨghaʼi ənɨ ə̀kə̀nɨ̀.

¹⁰ Mbə̀ swi ɨnyod ɨfě Ə̀nùŋɨ̀sɨg, əne wɨ̀ bɨrɨ nɔ əwən.

Ɨpatɨ ɨmbə̀ʼ ənû nɨ saʼ aŋgɔb

¹¹ Mbɨ bɔŋgɔb, tɨ wə̀d gha i ɨnû rɨbɔ̀ŋ ɨgwɨ wi aŋgɔb. Wə̀d we nɨə ghà ɨnû rɨbɔ̀ŋ ɨgwɨ wi aŋgɔb kɨ̀ beə saʼ əməd wɨə ghàə̀ ni tɨkə rɨ Ŋwiə̀ rɨka kuʼi. Məd wɨə bə̀ saʼə tɨkə rɨ Ŋwiə̀. Àwɔ̀ mɨ yeʼ wə̀d nɨə saʼə tɨkə rɨ Ŋwiə̀, njɨ kaʼ àwɔ̀ wɨə nùŋ e rɨkə te. À wɨə saʼə rɨwən.

¹² Wə̀d nɨə nàʼə̀ rɨkə bə̀ saʼə mɨsaʼi mei we mɔʼ. Àmei məd we tɨ̀ wɨ̀ chɨ̀ bə̂d rəŋgəʼ. Àmei məd we tɨ̀ wɨ̀ bə̀ nimnɨ bə̂d. Əne àwɔ̀ kɨə we nɨ saʼ we aŋgɔb ə?

Ɨpatɨ ɨmbə̀ʼ ənû nɨ goŋ ɨgɔ̂

¹³ Mbə̀ zu, mbə̀n mbe nɨə ghàə̀ ni, “Tə̀chɔ̀ŋ kɨ̀ ɨsɔ tɨ̀ bɨrɨ wo ɨŋga əbeŋ ə mɔʼɔ, pè chub əghəm əwu, ghɨ̀ ɨwin, jɨg njìm.”

¹⁴ Chəi mbə̀ kyerɨ ɨnû mbe nɨ bɨrɨ yeʼe ɨsɔ. Ə ɨ̀tènɨ̀ kɨə ye ə? Mbə yɨ ɨghabɨ ə ndiʼ nɨ nam ɨsɨ ənɨ ɨkə nyùmə̀, əmad ə nɨə zombɨ, zɨ nim i.

¹⁵ Njɨ mbə̀ kə̀ʼ ghà yeʼ ni, “Ə̀nùŋɨ̀sɨg mɨ benɨ, tɨ̀ bɨrɨ chub ɨkǎ ghɨ ənû zɔ̂ kɨ̀ əzɨ ə cherə.”

¹⁶ Tɨ̀nîn, mbə mbɨə nɔ̀ ɨnyod bə̀ goŋ ɨgɔ̂. Ənû nɨ goŋ ɨgɔ̂ yɨ ənû rɨbɔ̀ŋ.

¹⁷ Əne wə̀d we nɨ kyerɨ ənû nɨ kuʼnɨ nɨ tɨ̀ wɨ̀ ghɨ̀, àyɨə chəi wɨ̀ ghɨ̌, fə ghɨ̀ gù ənû.