Jems 3 - Meta’

Ənû nɨ yimbɨ ɨnemɨ

¹ Mbɨ bɔŋgɔb, tɨ bə̂d mɨ̀nɔnɔʼ rəkaʼ nən yeʼ əwən məchwiə̀-ɨnû, ɨmbə̀ʼ ɨghəm nɨ mbə̀ fə kyerɨ ə ni Ŋwìə̀ bɨrɨ saʼ mbà mbe nɨə chwi ɨnû ənɨ ɨnə̂njɨ̀ nɨ kaanɨ.

² Mba mɨjìm mbɨə fàn ɨnû ənɨ mɨnə̂njɨ̀ nɔnɔʼ. Wə̀d mɔʼɔ mɨ yeʼ əŋgu nɨ chəi wɨə fàn ənɨ ɨnû mbe nɨ wɨə ghàə̀, njɨ məd ə bɔŋ màànɨ̀, bə̀ kyerɨ ɨchî nɨ yimbɨ i ɨnyod jìm.

³ Tɨ mɨ zɨ̀ ətənɨ ɨŋga ɨchû ngyi ɨmbə̀ʼ zɨ zuunɨ əwa, əne tɨ̀ we tɨ̀ rɨ̀ ghɨ̀ ni zɨ̀ wo əsɨ ze nɨ tɨ̀ kə̀bɨ.

⁴ Mbə̀ bə nèŋ əbaŋ ɨgyɨ̀, ka à bè yeʼi ni zɨə faŋ əfim ə ka ka ə bə̀ tin əməd, əghɨ ze nɨə bèŋ əməd yɨ ətenɨ ə kwa kwa. Wə̀d we nɨə tinə wɨə bèŋ ətənɨ ə kwa kwa ze ghɨ̀ ni zɨə wo əsɨ ze nɨ wɨ̀ kə̀bɨ.

⁵ À yɨ ɨchî nɨ zɨə yeʼ we mbɨ ɨnemɨ. Ɨnemɨ yɨ əsɨ ɨnyod nɨ kaŋ kə, àyɨə ɨ wɨə goŋ ɨgɔ̂ ɨmbə̀ʼ ɨnû kyeŋ. Mbə̀ kɔndɨ ɨchî nɨ akə ɨwid ə tɔ̀nə̀ buʼ kyeŋ!

⁶ Tɨ əbɔʼ ɨsɨ ɨnyod mbe nɨ yeʼ ɨŋga na, ɨnemɨ yɨ ɨsɨg nɨ ɨnû rɨbɔ̀ŋ swi ɨŋga. Ɨ wɨə chèkɨ̀ə̀ nyamnyod wə̀d jìm, bə̀ tɔ̀n ɨ̀tènɨ̀ məd jìm. À yɨ ɨwid rɨ nìmə we nɨ yeʼ əsɨ ɨchə ə tɔ̀n əməd.

⁷ Wə̀d mɨ̀sɔŋɨchù we tɨ̀ wɨ̀ yimbɨ əne fə bə̀ yimbɨ tɨkwɨrɨ nyam jìm fɔrɨ tɨkwɨrɨ tɨnən jìm. Əne yɨə nyam te nɨə kɔ ɨbum ə si mbɨ te nɨ yeʼ ɨŋga ɨgyɨ̀.

⁸ Àyɨə chəi wə̀d mɨ̀sɔŋɨchù mɔʼɔ nɨ tɨ̀ wɨ̀ yimbɨ ɨnemɨ. Ɨnemɨ yɨ ənû rɨbɔ̀ŋ nɨ chəi ənɨ tɨ̀ wə̀d yimbɨ. Mɨtɨg rɨbɔ̀ŋ mbɨ ɨŋga ɨ swi nɨ tɨ̀ mbɨ zwiirɨ wə̀d.

⁹ Tɨ̀ wɨə nɨŋ ɨnemɨ yiirɨ ə Ə̀nùŋɨ̀sɨg Mbǎʼ. Tɨ̀ wɨə bə̀ nɨŋə zɨ̀ə̀ ndɔ̀n ɨgwɨ ə bə̂d mbe nɨ Ŋwìə̀ tekɨ ni mbɨ yeʼ ɨghabɨ ə məd.

¹⁰ Ənû nɨ yiirɨ ə Ŋwiə̀ mbɨ ənû nɨ zɨ ndɔ̀n ɨgun ə wə̀d mbɨə jwɨ̀ àmei rɨŋga ɨchû mɔʼ. Mbɨ bɔŋgɔb, tɨ zɨə yeʼi əne!

¹¹ Tɨ̀ mɨnib zwɨ̀ mbɨ mbe nɨə nywɨ̀ə̀ jwɨ̀ rɨŋga jwɨ̀-əmboŋ mɔʼ ə?

¹² Mbɨ bɔŋgɔb, tɨ̀ əzed ə maŋgòrə̀ ə kɔ əkwebɨ ə? Kɨ̀ tɨ̀ əzed ə namsɨ̀ ə kɔ mɨ̀tamtɨg ə? Chəi mɨnib nɨə nywɨ̀ə̀ mbɨ mɨnib zwɨ̀ mbe tɨ mbɨ jwɨ̀ rɨ ənɨ jwɨ̀-əmboŋ mɔʼ.

Ɨwe nɨ Ŋwiə̀ ə nàʼə̀

¹³ À kɨə we əkaʼ nən nɨ berɨ ɨwe bə̀ kyerɨ ənû ə? Wɨ̀ berɨ chwi mbi ɨnû chɔ̀m mbe nɨ wɨə ghɨ̀ə̀ ɨchî nɨ wɨə ghɨ̀ ɨnû ənɨ ɨbɔtɨ fîŋ bə̀ fɔrɨ ənɨ ɨwe.

¹⁴ À mɨ berɨ ə̀dìì rɨbɔ̀ŋ, à mɨ bə̀ kə̀b ɨghɨ àmei ɨmbə̀ʼ e ɨghəm, tɨrə̀ goŋ e ɨgɔ̂ ɨmbə̀ʼ əzɨ əwən kɨ̀ bè ton ɨnû mbe nɨ yeʼ mbɨ rəsìʼ.

¹⁵ Kaʼ ɨkwɨ ɨwe wɔ̂ yɨ i we nɨ Ŋwiə̀ ə nàʼə̀. Wɨ yɨ rɨ əmbɨ ə bə̂d rɨ ɨgwɨ ə si, kaʼi rɨ əmbɨ Əzwî ə Ŋwìə̀. Wɨ̀ yɨ rɨ əmbɨ ə Debɨ̀rə̀.

¹⁶ Əsɨ nɨ ə̀dìì mbɨ ənû nɨ wə̀d ə kə̀b ɨghɨ àmei ɨmbə̀ʼ i ɨghəm yeʼ əŋgu, ə̀bùùrɨ̀ mbɨ tɨkwɨrɨ ɨnû rɨbɔ̀ŋ jìm bɨrɨ yeʼ əŋgu.

¹⁷ Ɨwe we nɨ Ŋwiə̀ ə nàʼə̀ wɨə ghɨ̀ə̀ ni tɨ̀ chub zeŋɨ zeŋɨ, chub ənɨ əbɔrəbɔd, berɨ ɨbɔtɨ fîŋ, zwetɨ ɨnû nɨ bə̂d ə ghàə̀, diirɨ bə̂d bə̀ ghɨ̀ ɨ̀chɔ̀m. Ɨ wɨə bə̀ ghɨ̀ ni tɨ rɨ̀ ghɨ a ɨghə mbɨ ni tɨ rɨ̀ ghɨ a ɨbekɨ ɨnû.

¹⁸ Bə̂d mbe nɨə ghɨ̀ə̀ ni bə̂d chub ənɨ əbɔrəbɔd mɨ kon əbɔrəbɔd ɨŋga bə̂d, mbɨ bɨrɨ kwəŋ ɨnû chɔ̀m.